17.07.2009 22:58
Sparisjóður hugsar ekki um ESB.
Já hann Sparisjóður minn er hugsi yfir ástandinu og skyldi engan undra, ég held samt að hann sé ekki að horfa til ESB. Heldur að dáðst að blíðunni sem var hér í dag.
Það hefur ýmislegt á dagana drifið síðan ég skrifaði síðast, ber þar hæðst skemmtileg ferð útá Löngufjörur með skemmtilegu fólki og góðum hestum. Fyrsta daginn var riðið hér að heiman og niður í Kolviðarnes síðan frá Kolviðarnesi í Traðir. Við fengum ljómandi veður og Guðdómlegt færi á fjörunum. Á næstu dögum verður ferðinni haldið áfram og innan tíðar komið heim í Hlíðina.
Skrifað af Sigrún Ólafsdóttir
12.07.2009 23:20
Bjargvættir, afmæli og stjórnlausar útihátíðir.
Góðir Íslendingar við sauðkindurnar höfum haldið í ykkur lífinu í gegnum aldirnar, fætt ykkur og klætt......................o... er ekki komin lengra með áramótaræðuna. En er ekki svipurinn góður? Svona föðurlands eða forsetalegur.
Þetta er hún Fáséð litla heimalingur sem hefur sett sig þarna í flotta forsetastellingu, hún er sannfærð eins og ég að íslenska sauðkindin, bændur, sjómenn og verkamenn séu líklegir til að færa þjóðina til betri vegar. Stéttir sem eru ýmsu vanar hafa breið bök og sterk bein.
Myndina tók vinkona okkar hún Ansu frá Finnlandi.
Undanfarna daga hefur blíðan í Hlíðinni verið einstök, já jafnvel svo mikil að ég fór úr flíspeysunni. Það er ákveðinn mælikvarði annara ábúenda hér að sannarlega sé skæð hitabylgja að ganga yfir. En grínlaust rúmlega 20°hiti, sól, logn og blíða það er nú alveg á mörkunum fyrir fjallabúa með lélegt termó. En svo kom rok í dag og ég er strax byrjuð að kvarta ógjörningur að gera mér til hæfis.
Heyskapurinn potast áfram búið að rúlla niður á Rauðamel, Melum og Haukatungu. Og ef að Kári lofar verður klárað í nótt á Kolbeinsstöðum. Ég lifi í voninni að heyið sem var slegið hér heima í gær verði ekki fokið allt útí veður og vind á morgun.
Mummi átti afmæli í gær varð 23 ára gamall, ég er nú frekar efins svona ykkur að segja um að það sé rétt. Þetta getur varla verið ? Það er alveg örstutt síðan hann fæddist allavega finnst mér það. Man það eins og gerst hafi í gær. Svo eldist maður ekki neitt sjálfur....... skrítið. Það gerast bara svona skrítnir hlutir sem engin skýring er á t.d verður lengra uppí ístæðið, hestarnir stækka þannig að hoppið berbakt verður hærra, maður þarf meira súrefni til að hlaupa og elta hrossin og hendurnar styttast og eru ekki nógu langar til að halda lesefninu í réttri fjarlægð. Svo kíkir maður í spegilinn..............jú hann Mummi minn varð sannalega 23 ára í gær það er enginn vafi.
Það var afar líflegt á tjaldstæðunum hjá okkur um helgina margir góðir gestir sem voru sér og sínum til mikillar fyrirmyndar.
Ófeigur og Þorri búa nú um stundarsakir við skert persónufrelsi þeir urðu nefninlega uppvísir af því að fara á eigin vegum á útihátíð á tjaldstæðið. Græddu þeir félagarnir pylsur og ýmislegt góðgæti sem að þeim líkaði vel. Verst þótti þeim hvað eigendur þeirra voru þröngsýnir og leiðinlegir að leyfa þeim ekki að njóta þessara velgjörða lengur.
Það er ekki alltaf samhljómur um það hjá unglingum og forráðamönnum þeirra hvenær sé tímabært að leyfa frjálsar ferðir á útihátíðir.
Skrifað af Sigrún Ólafsdóttir
07.07.2009 21:36
Góður Hlátur og aukinn Arður.
Þarna sjáið þið strokufanga á heimleið.
Nokkur af tryppunum okkar fengu smá útrásarveiki og lögðu af stað í heimsreisu að hætti útrásarvíkinga. Skynsemin náði þó fljótt yfirhöndinni hjá þessum folum og því ákváðu þeir að hunskast heim.
Myndin er tekin 23 júní 2009.
Ekki byrjaði nú heyskapurinn gæfulega rigning í morgun og því lítið rúllað í dag. En veðurspáin er góð svo að þetta stendur allt til bóta.
Hún Létt átti rauðan hest í dag undan Arði frá Brautarholti, það var búið að bíða lengi eftir þessu folaldi. Gullfallegur hestur og að sjálfsögðu ánægja annað væri fullkomið vanþakklæti. Verð nú samt að játa bara svona okkar á milli að ég var að vona að þetta yrði skjótt hryssa.
Nafnaval er í vinnslu.
Það var mikið riðið út í dag enda gott veður. Fyrirmyndarhestur dagsins var hann Hlátur minn næmur og skemmtilegur foli undan Karúnu minni og Vetri sem nú er frúarhestur í Borgarnesi.
Nokkrir veiðimenn börðu vatnið í dag með góðum árangri og brostu breitt þegar þeir sögðu frá aflatölum dagsins.
Skrifað af Sigrún Ólafsdóttir
07.07.2009 00:10
Fjórðungsmótið búið og byrjað að heyja.
Þessi mynd heitir slökun..............þetta er þó ekki slökun eftir nein sérstök skemmtileg heit.
Síður en svo...............
Þarna liggja og hvíla sig Glaumgosi Gosason, Tryggur Hágangsson, Jarpur Glottason, Klammi Hæringsson og Kolamoli Molason eftir geldinguna hjá honum Rúnari dýralækni. Gamla húsið í baksýn myndin er tekin 12 júní 2009.
Annars er það helst að frétta að frábæru Fjórðungsmóti á Kaldármelum lauk í gær, góðir hestar, gott veður og gott fólk. Gestirnir okkar bæði menn og málleysingjar eru farnir og allt að færast í venjulegt horf. Já þetta var mjög skemmtilegt mót og vel heppnað vonandi verður framhald á þessu samstarfi. Þeir voru margir hestarnir sem heilluðu á mótinu en ég verð að játa að í mínum huga stendur hann Kiljan frá Steinnesi upp úr, þvílíkur gæðingur.
Þytur frá Skáney, Uggi frá Bergi, Grásteinn frá Brekku, Grettir frá Grafakoti, englakroppurinn Penni frá Glæsibæ og fleiri og fleiri.........er örugglega að gleyma einhverjum. Og nú er ég bara að rifja upp í huganum stóðhestaflokkana.
Ég var að þula í barna og unglingaflokkunum svo að ég sá allar sýningar í þeim flokkum, þar gaf að líta mjög efnilega knapa sem svo sannarlega eiga bjarta framtíð sem knapar. Þessir krakkar eru orðin svo magnaðir reiðmenn prúð og snyrtileg. Já stundum er talað um mannauð, þetta er svo sannarlega ,,reiðauður,, sem þarna er á ferðinni.
Reiðmennskuverðlaun Félags tamningamanna hlaut einmitt ung og efnileg dama sem að m a sigraði ungmennaflokkinn. Hún heitir Helga Una Björnsdóttir og kemur norðan úr Húnavatnssýslu. Meira um Fjórðungsmótið síðar.
Hér í Hlíðinni byrjaði heyskapur fyrir alvöru í dag slegið á Rauðamel og niður á Melum. Að sjálfsögðu var búið að prufu keyra vélarnar því ekki má byrja heyskap á þessum bæ á mánudegi. Hafa skal nú hefðirnar í hávegum.
Ég brá mér niður í sveit og smellti örmerkjum í fjögur falleg folöld. Alltaf jafn gaman að skoða folöld já og hross yfirleitt. Svona er að vera með dellu.
Hvenær skildi hún Létt eiginlega kasta???????? á bágt með að bíða.
Annars allt gott ................nema hænurnar eru komnar í varpverkfall. Ég held að þær séu að mótmæla einhverju, kannske er það bara ríkisstjórnin???????
Skrifað af Sigrún Ólafsdóttir
30.06.2009 00:28
Útilega með eða án Fjórðungsmóts?
Líf og fjör í útilegu.
Það hefur verið líflegt á tjaldstæðunum hjá okkur að undan förnu enda veðrið leikið við okkur í Hlíðinni. Veiðin hefur líka verið góð og það er sko fljótt að fréttast á milli manna.
Þið sem að viljið kannske ekki vaka jafn lengi og hörðustu partýljónin á Fjórðungsmóti rennið bara til fjalla og við munum gera okkar besta til að finna friðsælan blett.
Nú styttist í Fjórðungsmót og á morgun koma fyrstu ,,nýbúarnir,, til okkar sem verða fram yfir mót. Sumir koma langt að ríðandi en aðrir koma keyrandi með gæðingana.
Svæðið á Kaldármelum er að verða tilbúið og lítur mjög vel út, það stefnir sannarlega í stórmót í vikunni.
Allir að mæta...............
Skrifað af Sigrún Ólafsdóttir
28.06.2009 22:12
Nú er sumar gleðjumst gumar........
Maður þarf nú ekki að muna allt er það????????
Hér með er heimildarmynd af húsfreyjunni í mjög miklvægu hlutverki, sem sagt að telja saman hrossin og athuga hvort að það eru ekki örugglega allir með í hópnum úr fjallinu.
Það er búið að vera alveg dásamlegt veður um helgina sól, logn og blíða. Margt var um manninn á tjaldstæðunum og veiðimennirnir hæst ángæðir því veiðin var góð. Um helgina komu líka góðir gestir sem að ég hafði ekki hitt lengi, voru þá rifjaðar upp skemmtilegar stundir og árin frá samverunni talin aftur og aftur. Það er svo stutt síðan.......en árin samt svolítið mörg. SKR'ITIÐ.
Á föstudaginn fórum við með tvær hryssur undir hestagullið Sporð frá Bergi sem nú er í Hólslandi.
Þetta voru hryssurnar Sunna og Karún. Ég hvet ykkur til að skoða myndirnar af honum Sporði sem eru inná síðunni Hellnafell sem er tengill á forsíðunni hér. Síðan smellið þið á myndasíður svo á nýasti picasavefurinn minn og að lokum smellið þið á stóðhestarnir frá Bergi þá sjáið þið þennan sniðuga hest.
Tignin mín kastaði hestfolaldi á fimmtudaginn þetta er myndar hestur undan honum Sparisjóði mínum. Ég er ekki ennþá búin að nefna hann en er að hugsa.........myndir af honum koma fljóttlega.
Það hefur verið mikið riðið út og góða veðrið notað vel og lengi dag hvern. Mörg skemmtileg tryppi eru hér á járnum og gaman að sjá þau þroskast, læra og verða enn skemmtilegri.
Við erum farin að skoða 4v tryppin okkar aðeins og ég verð að segja að mér líst rosalega vel á tryppin undan honum Arði frá Brautarholti. Þið ykkar sem eruð að fara á Fjórðungsmót skoðið endilega hryssuna hennar Söru í Álfhólum sem skráð er til leiks í tölti. Hryssan heitir Díva og er Arðsdóttir, ég hef séð hana nokkrum sinnum í vetur og er stórhrifin.
Eins er hér afar skemmtilegur foli undan Huginn frá Haga og fleiri og fleiri................
Skrifað af Sigrún Ólafsdóttir
22.06.2009 20:29
Fannar fimmari.....
Sætar sauðburðarskvísur.
Þarna eru nokkrar af dömunum sem aðstoðuðu okkur við sauðburðinn í vor þær eru Daniella, Björg og Hrefna Rós. Síðan er þarna ónefnd gibba með þeim á myndinni.
Nú er aðeins ein kind eftir að bera sú næst síðasta bar í gær, sauðburðurinn alveg að verða búinn.
Tími til kominn.
Um helgina var brunað í dalina og tekið þátt í Hestaþingi Glaðs í Búðardal. Mummi og Fannar voru í nokkuð góðu stuði eins og um síðustu helgi og gerðu sér lítið fyrir og sigruðu 150 m skeiðið með bara ljómandi góðan tíma 15.53 sek. Þeir félagar voru svo í b úrslitum í tölti og höfnuðu svo í 4 sæti í fimmgangi.
Myndir frá mótinu koma svo fljótlega inná síðuna undir hnappnum albúm.
Fyrsti hestahópur sumarsins kom hér við um helgina og höfðu nokkrir tugir hrossa hér næturdvöl.
Það lítur út fyrir mikla umferð hestahópa hér um slóðir í sumar og þá sérstaklega í kringum Fjórðungsmótið sem haldið verður um mánaðamótin.
Snör og Mói litli komu heim í dag eftir að hafa dvalið í góðu yfirlæti hjá ábúendum á Skák í nokkurn tíma. Nú er bara að krossa fingur og vona að eitthvað spennandi fæðist næsta vor undan Snör og Ramma frá Búlandi sem að hún var að heimsækja. Gaman að vinna í happdrætti.
Fyrirmyndarhestur helgarinnar var að sjálfsögðu Fannar sem er óðum að breytast úr fjórgangara í þennan fína fimmgangara.
Skrifað af Sigrún Ólafsdóttir
19.06.2009 21:30
Smá fréttir.
Þetta er Kátur frá Hallkelsstaðahlíð sonur Karúnar frá Hallkelsstaðahlíð og Auðs frá Lundum.
Hann stendur þarna eins og ,,alvöru,, töffari hvílir tvo fætur og stendur í tvo. Töffffffff.
Í dag fóru Kolskör, Þríhella og Perla frá Lambastöðum undir glæsi hestinn Aldur frá Brautarholti.
Hann fór í ljómandi góðan dóm nú í vor aðeins fjögura vetra gamall. Hann fékk 8.08 fyrir bygging þar fór hann hæðst fyrir bak og lend fékk 9.0 þá einkun fékk hann líka fyrir prúðleika. Fyrir hæfileika hlaut hann 8.28, þar af fyrir skeið 9.0 og tölt, vilja og geðslag 8.5 aðaleinkun 8,20
Nýir hestar komu í tamningu í dag spennandi tryppi sem vonandi verða bara skemmtilegir nemendur. Stóðið tók smá skoðunnarferð í dag en er nú aftur komið á réttar slóðir.
Fyrirmyndar hestur dagsins var Bleik Ófeigsdóttir frá Þorláksstöðum er að verða mjög skemmtileg.
Túnrollurnar halda áfram hörðum árásum og víla ekki fyrir sér að vaða langt út í vatn fram fyrir girðingar og varnargarða. Spurning hvort ekki sé ráð að skilja íslenska fjára minn eftir suður við vatn og láta hann eiga ,,orð,, við þær þegar þær koma? Nei kannske ekki Snotra mín er kvöldsvæf og myrkfælin. Þolir líka ekki vel að verða einmanna og túnrollur eru ekki góður félagsskapur.
Ég er umhverfissinni það er ekki spurning, að hluta til bæði í orði og líka verki.
T. d á ég lifandi ,,moltutunnur,, þær taka uppí sig sjálfar og það sem meira er þær losa líka afraksturinn út í náttúruna. Já þið viljið vita hvar ég keypti þær???? og hvaða tegund og framleiðandi???? Þær eru svartar, hvítar og segja örsjaldan voff, heita Ófeigur og Þorri.
Það er alveg með ólíkindum hvað þeir félagar éta, auðvita kjöt, þurrfóður og alla afganga, en hundar og hrásalat. Ekki það fyrsta sem manni dettur í hug með öðrum orðum þeir éta allt sem að kjafti kemur en vonandi ekki hann bróðir minn líka.
Skrifað af Sigrún Ólafsdóttir
18.06.2009 21:51
Stór þjófnaður og annir hjá Sparisjóðnum.
Á myndinni er Mói litli Sparisjóðsson að gera ,,Hólaæfinguna,, fram og niður og æfir í leiðinni aukna skrefastærð og fimi.
Já það var framinn stór þjófnaður hér í dag en ábúendum tókst með snarræði og lipurð að skakka leikinn og góma þjófinn án aðstoðar lögreglu.
Þannig var að hún Upplyfting kastaði þessu líka fína merfolaldi rauðstjörnóttri hryssu sem hlotið hefur það frumlega nafn Stjarna. Hryssan er undan Feyki Andvarasyni frá Háholti.
Gletta gamla sem að missti sitt folald fyrir nokkru er óvön því að hafa ekki folald á sínum snærum. Folaldið sem að hún missti var það þrettánda í röðinni. Tók hún því til sinna ráða í morgun rak Upplyftingu í burtu og ákvað að eiga Stjörnu litlu og stinga af með hana. Þetta gekk allt eins og í sögu hjá henni þangað til að folaldaeftirlitið í gamla bænum komst í málið.
Rauk þá her manns til og elti ,,barnaræningjann,, uppi kom böndum á hann og flutti heim í hús. Upplyfting var að vonum mjög fegin og þakklát fyrir hjálpina en Gletta var nú ekki eins kát. Eins gott að folaldaeftirlitið í gamla bænum klikkar ekki.
Hann Sparisjóður minn fékk fyrstu dömu sumarsins í heimsókn í dag, myndar hryssu sem kom alla leið af suðurlandinu. Svo á næstu dögum fer garpurinn útí girðingu að sinna embættisverkum sínum. Sparisjóður er hér rétt við húsvegginn svo að það er auðvelt að fylgjast með honum og spjalla við hann öðru hvoru.
Hann tekur á móti hryssum hér heima í allt sumar ef að einhver hefur áhuga.
Faðir hans er Gustur frá Hóli og móðirin Karún frá Hallkelsstaðahlíð.
Í kynbótamati hefur hann í aðaleinkun 120.
Fyrirmyndarhestur dagsins..............já auðvitað hún Gletta gamla sem að reyndi sitt besta til að ala upp folald eins og venjulega.
Skrifað af Sigrún Ólafsdóttir
16.06.2009 23:31
Sitt lítið af hverju og túnrollur með.
Á myndinni eru þeir félagarnir Mummi og Fannar sem gerðu sér lítið fyrir og sigruðu gæðingaskeiðið á íþróttamótinu á Kaldármelum um síðustu helgi. Sigurinn var sætur þar sem að þetta er í fyrsta sinn sem að þeir taka þátt í gæðingaskeiðskeppni. Þeir höfnuðu svo í 4 sæti í fimmgangi og Mummi og Dregill urðu í 5 sæti í töltúrslitunum. Sprækir strákarnir.
Þið getið séð nokkrar myndir frá mótinu hér á síðunni.
Af folaldshryssunum er það helst að frétta að Sunna eignaðist gullfallega rauða hryssu undan Feyki Andvarasyni frá Háholti. Hryssan hefur hlotið nafnið Rjóð eins og móður amma hennar. Skeifa kastaði myndar hryssu sem líka er undan Feyki. Eitthvað stendur nafngyftin í eigandanum og verð ég að bíða enn um sinn með að upplýsa það.
Ég hef nefnt hryssuna mína undan Kolskör og Adam hún hefur hlotið nafnið Gangskör.
En það skiptast á skin og skúrir í hestamennskunni eins og allir vita, heiðurshryssan hún Gletta gamla kastaði rauðstjörnóttri hryssu sem að því miður kafnaði í belgnum. Afar leiðinlegt en svona er það stundum, sumir hlutir eiga bara að gerast hvað sem tautar og raular.
Nú eru 5 hryssur ókastaðar þær Skúta, Létt, Dimma, Upplyfting og Tign.
Það eru komnar nýjar myndir af folöldunum undir ,,myndaalbúmflipanum,,
Á sunnudaginn fór hún Rák Stælsdóttir undir höfðingjann Pilt frá Sperðli, við höfum lengi átt hlut í honum og oftast notað plássið okkar og afraksturinn reynst afar vel.
Rák slasaðist í vetur og er ekki enn orðin góð svo að nú lætur hún sér batna í fæðingarorlofi.
Síðasta fimmtudag kom Rúnar dýralæknir og gelti hér 14 fola frá nokkrum eigendum. Það gekk alveg ljómandi vel og nú höfum við sleppt öllum tryppum okkar í fjallið.
Það má nú eiginlega segja að sauðburðurinn sé alveg búinn en samt eru tvær rollur eftir inni sem að eru óbornar. Ég er svo hjátrúarfull að ég vill ekki sleppa þeim óbornum út úr þessu held alla daga að þær séu nú alveg að fara að bera. Það hlýtur að fara að koma að því samt grunar mig að þær séu að plata mig eitthvað því þær rollur sem var sleppt út í vor sökum þess að það væri svo langt þar til þær bæru eru örugglega bornar.
Túnrollur já það eru skemmtilegar skeppnur eða hitt þá heldur. Við Deila höfum staðið í ströngu við smalamennskur undanfarna daga höfum reyndar svolítið gott af trimminu en erum samt að verða leiðar á þessu streði. Lalli og Astrid girða og Skúli og Mummi byggðu varnargarð við vatnið. En túnrollurnar bara skelli hlæja og líta á það sem skemmtilega ,,fittneskeppni,, að komast í túnið.
Og bræðurnir Ófeigur og Þorri láta sig dreyma vilta drauma um það hvernig þeir verji túnið í framtíðinni.
Nú er búið að bera á allt bæði tún og hestagirðingar, sá grasi í Melatúnið og bara eftir að sá fóðurkálinu á Steinholtið. Það verður að vera tilbúið á réttum tíma fyrir lömbin í haust.
Skrifað af Sigrún Ólafsdóttir
08.06.2009 00:34
Kynbætur............
Í dag fóru 5 hryssur undir stóðhesta Karún mín fór undir Stikil frá Skrúð, Snör undir Ramma frá Búlandi, Andrá undir Þrist frá Feti, Tryggð og Spóla fóru svo undir höfðingjann og reiðhestaföðurinn Hlyn frá Lambastöðum. Og nú er bara að bíða og sjá hvað kemur út úr þessum ævintýrum. Eini hesturinn af þessum sem að ég hafði ekki séð var Rammi frá Búlandi en eins og ég hef áður nefnt þá fékk ég tollinn undir hann í happdrætti reyndar eins og tollinn undir Stikil. Já kellingin er stundum heppin.
Ég verð að játa að Rammi var langt fyrir ofan mína væntingar, gull fallegur og með frábærar hreyfingar. Ólafur bóndi í Skák sýndi okkur svo hryssur undan Ramma sem að eru ljómandi fallegar og efnilegar. Sem sagt ég mæli hiklaust með því að fólk skoði þennan hest og fylgist með afkvæmunum sem farið hafa í dóm og eru á leiðinni þangað.
Á föstudaginn síðasta eignaðist hún Kolskör mín brúna hryssu það var sko alveg eins og ég var búin að biðja hana um. Faðirinn er Adam frá Ásmundarstöðum. Ég hef enn ekki ákveðið undir hvaða hest Kolskör fer nú í sumar en hugsa mikið þessa dagana. Nafnið á hryssuna kemur svo von bráðar þarf líka umhugsunnarfrest svo að það verði vönduð vinnubrögð á þessu hjá mér.
Nú eru allar hryssurnar sem koma til með að kasta í sumar komnar heim svo að auðvelt er að fylgjast með þeim. Sumar eru alveg komnar að köstun en aðrar kasta þegar líður á sumarið.
Við rákum allt stóðið heim úr fjallinu á fimmtudaginn tókum hryssurnar og nokkur tryppi úr því, síðan slepptum við öllu uppfyrir aftur og bættum öllum tveggja vetra dekurrófunum saman við.
Nú hefur hún Skuggsýn flutt sig um set og fengið nýtt heimili við vonum að hún standi sig vel og verði okkur til sóma á nýja staðnum.
Mikil hreyfing hefur verið í hesthúsinu undan farið margir að fara heim og jafnóðum koma nýir í staðinn. Mjög mikið af skemmtilegum tryppum og spennandi verkefnum.
Fyrirmyndarhestur dagsins (vikunnar) er hann Fannar ,,minn,, hans Mumma. Prófaði hann í vikunni eftir nokkurt hlé og fannst hann alveg frábær er eiginlega alveg í skýjunum ennþá.
Rosalega flott unnin hjá stráknum.
Ég verð að játa að Rammi var langt fyrir ofan mína væntingar, gull fallegur og með frábærar hreyfingar. Ólafur bóndi í Skák sýndi okkur svo hryssur undan Ramma sem að eru ljómandi fallegar og efnilegar. Sem sagt ég mæli hiklaust með því að fólk skoði þennan hest og fylgist með afkvæmunum sem farið hafa í dóm og eru á leiðinni þangað.
Á föstudaginn síðasta eignaðist hún Kolskör mín brúna hryssu það var sko alveg eins og ég var búin að biðja hana um. Faðirinn er Adam frá Ásmundarstöðum. Ég hef enn ekki ákveðið undir hvaða hest Kolskör fer nú í sumar en hugsa mikið þessa dagana. Nafnið á hryssuna kemur svo von bráðar þarf líka umhugsunnarfrest svo að það verði vönduð vinnubrögð á þessu hjá mér.
Nú eru allar hryssurnar sem koma til með að kasta í sumar komnar heim svo að auðvelt er að fylgjast með þeim. Sumar eru alveg komnar að köstun en aðrar kasta þegar líður á sumarið.
Við rákum allt stóðið heim úr fjallinu á fimmtudaginn tókum hryssurnar og nokkur tryppi úr því, síðan slepptum við öllu uppfyrir aftur og bættum öllum tveggja vetra dekurrófunum saman við.
Nú hefur hún Skuggsýn flutt sig um set og fengið nýtt heimili við vonum að hún standi sig vel og verði okkur til sóma á nýja staðnum.
Mikil hreyfing hefur verið í hesthúsinu undan farið margir að fara heim og jafnóðum koma nýir í staðinn. Mjög mikið af skemmtilegum tryppum og spennandi verkefnum.
Fyrirmyndarhestur dagsins (vikunnar) er hann Fannar ,,minn,, hans Mumma. Prófaði hann í vikunni eftir nokkurt hlé og fannst hann alveg frábær er eiginlega alveg í skýjunum ennþá.
Rosalega flott unnin hjá stráknum.
Skrifað af Sigrún Ólafsdóttir
31.05.2009 23:26
Svartasunna og ýmislegt fleira.
Þrír gráir.
Þessi mynd er tekin á reiðsýningu Háskólans á Hólum þegar brautskráning fór fram nú um daginn.
Þarna eru eins og þið sjáið þrír gráir, fremstur á myndinni er Sören Madsen sem á þessum degi raðaði inn verðlaunum. Í hans hlut komu Morgunblaðshnakkurinn, Ástundarhesturinn og LH styttan. Þetta er frábær árangur og óskum við Sören innilega til hamingju með þetta. Sannarlega hestamaður með bjarta framtíð. Þið getið lesið nánar um þessi verðlaun og margt fleira á heimasíðu Félags tamningamanna.
Það er tengill inná síðuna hér á forsíðunni FT.
Mummi datt í lukkupottinn í dag þegar Bráðlát hans kastaði brúnu merfolaldi undan Sparisjóði mínum. Hryssan hefur hlotið nafnið Svartasunna og getið þið nú af hverju?
Veðrið var með ágætum í dag og rákum við flest allt féð af túninu og uppí fjall. Ört fækkar inni og eftir morgundaginn verður hægt að fara að birta tölur þar um. Þetta hefur allt gengið þokkalega en heimalingunum fer þó fjölgandi okkur til ama en litlu gestunum til ánægju.
Við höfum smellt inn svolítið af myndum það er svona sitt lítið af hverju endilega skoðið.
Skrifað af Sigrún Ólafsdóttir
30.05.2009 23:16
Góðar stundir og áburðardreifing.
Þessi mynd var tekin á útskriftardegi Háskólans á Hólum þarna eru Mummi á Fannari og Franzi á jörpu.
Við áttum frábæran dag með skemmtilegu fólki, fyrst í Lindartungu svo á Rauðamel. Tilefnið var minningarstund um systkinin frá Syðri Rauðamel. Það var svo gaman að rifja upp gamla daga, sjá gömul myndbönd og myndir en síðast en ekki síst hittast og spjalla.
Mummi og Jón Ben byrjuðu að bera á túnin í dag og afrekuðu eins og við var að búast alveg helling. Fara vonandi langt með áburðardreifinguna á morgun ef að veður leyfir.
Ég bíð og bíð eftir fleiri folöldum en án árangurs enn sem komið er. Kolskör mín er samt alveg að springa. Á næstu dögum vindum við okkur svo í að fortemja veturgömlu tryppin pínulítið áður en við sleppum þeim í fjallið. Já og auðvitað gelda það sem gelda á.
Undan farna dag hafa staðið yfir miklar járningar og eru flest hrossin að verða bara nokkuð fín. Dömurnar Astrid og Ansu hafa svo verið að snyrta og pússa.
Bræðurnir Ófeigur og Þorri hafa í ýmsu að snúast þessa dagana, þeir eru svo ljómandi hlýðnir að þeir bíða bara fyrir utan húsið heima þegar að við förum í hesthúsið. En landhelgi þeirra er nú samt alltaf að stækka pínu lítið. Fyrst fóru þeir ekki út fyrir mölina í hlaðinu, síðan var það radíusinn kringum húsið í passlegri fjarðlægð og núna eru landamærin afleggjarinn heim að húsinu og hins vegar vegurinn. En sumir skreppa stundum í útrás þó svo það hljómi nú ekki vel þessa dagana.
Samkomulagið hjá bræðrunum er svona upp og ofan því þarf gæslumann við matardallinn þegar snæddur er morgunverður í hundalandi. Annars er voðinn vís. Það var góð skemmtun að sjá þá bræður borða pylsur um daginn. Áttæknin var þannig að þeir tóku pylsurnar og borðuðu eins og við spakettí, sogið, rennt niður og tuggið sem minnst.
Við eru bara nokkuð sátt við þá bræður og erum þeirrar skoðunnar að við getum hugsanlega fengið góða smalahunda ef að við klúðrum ekki uppeldinu.
Mikil ábyrgð sjáið þið til.
Skrifað af Sigrún Ólafsdóttir
28.05.2009 23:28
Silungur og sauðburður
Jæja þá er silungsveiðin byrjuð og fer bara vel af stað þetta sumarið eins og sjá má á myndinni. Bræðurnir Hallur og Hrannar frændur mínir smelltu út neti um síðustu helgi og fengu þennan fína afla. Hallur kannaði hitastigið á vatninu og óð útí með endann á netinu en Hrannar veitti honum andlegan stuðning frá bakkanum. Hallur er ekkert óvanur því að vökna í Hlíðarvatninu svo að honum var ekkert meint af þessu brasi. Aflinn sem náðist á land þessa dagstund voru 16 stykki, bleikja og urriði í bland. Það sem er á myndinni er gott sýnishorn en þess skal getið að þegar myndin er tekin er Hallur stunginn af með allar stóru bleikjurnar. Einn veiðimaður kom hér í dag í rigningunni og sá ástæðu til að koma við eftir tveggja tíma stopp og sýna 4 vænar bleikjur og einn urriða. Sem sagt góð byrjun á veiðisumrinu.
Núna er að færast ró yfir sauðburðinn og þær örfáu kindur sem að eftir eru taka sér góðan tíma til að dreifa burðinum allan sólarhringinn. En það eru ýmsir snúningar eftir og mikil vinna að koma öllum út, marka og númera. Númerin standa núna í 945 og dágóður slatti eftir enn. Þetta er fyrsta árið sem að ég marka allan hópinn og er ég mjög fegin að hafa fengið góða æfingu í æsku við að marka. Það var nefninlega þannig að þegar ég var lítil og engan veginn fær um, dreymdi mig um að fá að marka. Til að róa stelpurófuna tók Lóa frænka mín það til bragðs að klippa út eyru úr pappírnum sem að kom utan um dagblaðið Tímann í gamla daga. Þegar svo þessi fínu eyru voru tilbúin settist ég með spekings svip og klippti öll mörkin á heimilinu samviskusamlega út. Við þetta naut ég leiðsagnar þeirra móðurbræðra minna Ragnars, Einars og Sveinbjörns. Nú hefur þessi gamli draumur ræst og ég marka og marka og marka. Sumir draumar ræstast sjáið þið til.
Tíminn það góða dagblað var til margra hluta nytsamlegur hvort sem var í pólutísku uppeldi eða til landbúnaðarstarfa.
Fjöldinn allur af fólki hefur hjálpað okkur við sauðburðinn og ætla ég ekki að nefna neinn því engum vil ég gleyma. Vil bara þakka öllum kærlega fyrir, án ykkar værum við með ennþá dekkri bauga, miklu hrukkóttari og Guð veit hvað. Takk fyrir alla hjálpina.
Skrifað af Sigrún Ólafsdóttir
26.05.2009 23:55
Flottir Hólakrakkar og Auðssonur.
Ég var svo stolt af ,,mínum,, krökkum þegar við mættum í útskrift Háskólans á Hólum síðast liðinn föstudag. Sjáið bara hvað þau eru flott ný útskrifuð, Þórdís og Haukur af þriðja ári sem sagt reiðkennarar og Mummi af fyrsta ári sem hestafræðingur og leiðbeinandi.
Það eru vafalaust einhverjir sem spyrja sig hvað ég eigi í þessum krökkum svo því skal fljót svarað hér. Mummi er eftirlætis einkasonurinn, Þórdís uppáhalds tamningakonan og hann Haukur er eiginlega alvöru tengdasonurinn þó svo að enga eigi ég alvöru dótturina. En hún Randi er nú samt næstum því alveg dóttir mín, allavega þykist ég eiga smá í henni.
Til hamingju krakkar þið voruð flott.
Það var mjög gaman að vera viðstödd þessa athöfn á Hólum, það er svo hátíðlegur blær yfir því þegar nemendur skólans eru útskrifaðir. Undanfarin tvö ár hef ég verið boðin sem formaður Félags tamningamanna og haft það hlutverk að klæða ný útskrifaða nemendur reiðkennarabrautar í félagsjakka FT. Táknrænt og skemmtilegt að fá tækifæri til að bjóða þesssa glæsilegu framtíðar reiðkennara velkomna í félagið.
Ég tók svolítið af myndum í ferðinni og mun birta þær við fyrsta tækifæri hér á síðunni.
Annars er búið að vera mikið um að vera hjá okkur undanfarið reyndar eins og alltaf. Og ætla ég að vera dugleg að segja ykkur frá því á næstu dögum.
Læt samt fylgja með eina skemmtifrétt hún Karún mín eignaðist brúnan hest undan Auði frá Lundum á föstudaginn. Ég hef enn ekki fundið nafn við hæfi en er að vinna í málinu.
Silungsveiðin er hafin og byrjaði með stæl, meira um það í næsta bloggi..............
Skrifað af Sigrún Ólafsdóttir