Færslur: 2013 Apríl

30.04.2013 20:05

Lífið í sveitinni



Astrid og Auðséð á góðri stundu.

Mér varð svo kalt í dag að ekki kom annað til greina en hafa hlýlegar vormyndir hér á blogginu. Enda styttist nú í að hryssurnar fari að koma í köstunarhólfið svo betra verði að fylgjast með þeim. Þær fyrstu eiga að kasta undir miðja maí en sumar eru bráðlátar og flýta sér svo það er gott að vera við öllu búin.
Já það var sultardropaveður í dag sól og blíða að sjá alveg þangað til maður var komin út.
Birrrr...........
Hrossin voru samt kát með blíðuna og báru sig ekki eins illa og húsfreyjan.




Þessar vinkonur hafa báðar stækkað mikið frá því að þessi mynd var tekin enda komin nokkur ár síðan. Daníela frænka mín og Skríttla eru fyrirtaks fyrirsætur og tóku hlutverkið alvarlega.
Hér er allt að verða klárt fyrir sauðburðinn sem hefst um og uppúr helginni næstu.

Lóan, tjaldurinn og endurnar eru komin í Hlíðina svo nú hlýtur að vera vor handan við næturfrostið.  Kærkomnir vorboðar alveg þangað til endurnar fara að fæla undan húsfreyjunni. Nú er bara að bíða eftir hrossagauk, spóa og steklnum málglaða.



Þessa skemmtilegu mynd rakst ég á þegar ég var að renna í gegnum gamlar myndir. Þarna eru þeir bræður Ófeigur og Þorri ungir og sætir, núna eru þeir bara sætir.
Eftir þennan texta kemur ekki mynd...... því hún átti að vera af okkur..............er ekki viss um að textinn passaði.



28.04.2013 22:26

Gleðilegt sumar



Sigurður Heiðar Birgisson hlaut ásetu og reiðmennskuverðlaun Félags tamningamanna.

Gleðilegt sumar kæru lesendur.

Skeifukeppni nemenda Landbúnaðarháskólans á Hvanneyri fór fram á sumardaginn fyrsta eins og venjulega. Auk þess öttu kappi nemendur Reiðmannsins en það er áfangaskipt tveggja ára nám í hestamennsku við skólann. Voru nemendur verðlaunaðir fyrir árangur vetrarins bæði fyrir tamningar og reiðmennsku. Eins og áður kom fram hlaut Sigurður Heiðar ásetu og reiðmennskuverðlaun FT.
Morgunblaðaskeifuna hlaut Harpa Birgisdóttir, Gunnarsbikarinn hlaut Jónína Lilja Pálmadóttir, og Reynisbikarinn hlaut Jón Óskar Jóhannesson.
Nokkur undanfarin ár hef ég komið að dómstörfum hjá skólanum við þetta tækifæri og svo var einnig nú. Oftast höfum við verðið tvö auk kennara skólans sem höfum dæmt þessar keppnir og í ár var það Þórarinn Eymundsson, tamningameistari FT sem dæmdi auk mín.
Mestan veg og vanda af kennslunni sem varðar hestamennsku við skólann hafa þeir Heimir Gunnarsson og Gunnar Reynisson.
Mér fannst öllu umgjörð og yfirbragð Skeifudagsins til mikillar fyrirmyndar og gaman að fylgjast með þegar nemendur og kennarar kynntu hvað þeir hafa verið að gera í vetur. Greinilegat var að mikið hefur verið lagt uppúr fjölbreyttum vinnubrögðum með áherslu á léttleikanna.
Ágúst Sigurðsson rektor skólans lagði áherslu á það í setningarræðu sinni að menn ættu ekki að gleyma sér í harðri keppni og gleyma gleðinni í hestamennskunni.
Virkilega orð í tíma töluð og þörf áminning til okkar hestamanna.
Ekki spillti svo fyrir að við Astrid fengum báðar folatolla í happadrættinu sem nemendur seldu á staðnum. Astrid fékk toll undir Hvítserk frá Sauðárkróki en ég undir Hróa frá Skeiðháholti og Hákon frá Ragnheiðarstöðum.

Takk fyrir góðan dag.

Það hefur sennilega ekki farið fram hjá neinum að við íslendingar gengum að kjörborðinu í gær.

Ofurspennandi kosninganótt að baki þar sem húsfreyjan festi ekki blund fyrr en kl 7 um morguninn.
Vaknaði brosandi og hefur átt góðan dag.
Nánar um það síðar en af gefnu tilefni og til upprifjunnar fyrir þá sem fylgjast með pólutískum umræðum á netinu.

Ég hef mjög gaman af stjórnmálum og vangavelltum þar um, en er mjög hugsi eftir síðustu yfirferð um netheima.
Hatursfullar umræður með mannorðsmorðum, dónaskap og svívirðingum segja meira um þá sem þær aðferðir nota en þá sem fyrir þeim verða.

Það sem sagt og gert er á fésinu er sýnilegra en sumir virðast halda.

24.04.2013 22:26

Í mörg horn að líta



Þessir kappar voru í úrslitum í fimmgangi á íþróttamóti Hestamannafélagsins Glaðs um síðustu helgi. Ámundi Sig, Skjöldur Orri, Mummi, Styrmir í Gufudal og Þórarinn í Hvítadal.

Við smelltum okkur í dalina og Mummi tók þátt í mótinu sem haldið var í fallegu en köldu veðri. Hann og Fannar urðu í þriðja sæti í fimmgangi og sigruðu 100 metra skeiðið.
Skemmtilegt mót og alltaf gaman að koma í dalina.

Verkefni vikunnar hafa verið fjölbreytt, pólutíkinni var sinnt í gærkvöldi en þá var haldinn opinn íbúafundur í Lyngbrekku með fulltrúum framboða í NV kjördæmi.
Ég brá mér í hlutverk fundarstjóra sem að stæðstum hluta var starf tímavarðar þar sem framboðin voru mörg og tíminn naumur. Sumum fannst tíminn sem þeir fengu til að sannfæra kjósendur úr ræðustól naumt skammtaður. Til marks um það er vísa sem ég fékk frá Lárusi Hannessyni vini mínum.

Hér höfum við rætt um net og síma
og höldum, á þótt fölni skíma.
En Sigrúnin mín
svo sæt og fín
því hefur þú fyrir mig svo lítinn tíma.

Í lok fundar kom líka vísa frá Guðbrandi bónda á Staðarhrauni en Össur var honum ofarlega í huga.

Össur segir allt í fína
ekki er af baki dottinn.
Hann er að selja kjöt í Kína
og kemur oss í lukkupottinn.

Já þeir eru skemmtilegir kallarnir.

Eftir ljómandi reiðtúra í dag brunaði ég svo suður að Hvanneyri að dæma flotta krakka en Skeifukeppni skólans er á morgun.

19.04.2013 22:08

Vorið og flottar fyrirsætur


Það kemur ýmislegt í ljós þegar gramsað er í gömlum myndum............eins gott að fyrirsæturnar nái ekki í mig núna. Á myndinni sem notuð var til að auglýsa Stellulopapeysurnar góðu eru Gróa Björg og Mummi með Örlát á milli sín.
Stella prjónar lopapeysur eftir pöntunum, litlar, stórar og allaveganna svo það er bara um að gera að slá á þráðinn ef ykkur vantar peysu.

Takið sérstaklega eftir flottu klippingunni á Mumma :)
Þegar þessar myndatökur fóru fram var mikið hlegið og aldrei að vita nema síðar komi fleiri myndir  af öðrum fyrirsætum. Ég þori ekki að birta fleiri myndir að sinni.

Ég held að vorið sé alveg að koma því þegar ég labbaði heim úr hesthúsinu áðan var komið vorhljóð í Múlann. Nú bíð ég bara eftir að heyra í fuglunum sem hér í Hlíðinni eru ljúfir vorboðar.

Já vorið það er tíminn sem kemur þegar allt er orðið ,,tilbúið,, hjá manni, svona eins og á jólunum. Eða það dreymir mig allavega um en sumir draumar eru fjarlægir og því best að halda bara áfram að láta sig dreyma.
Og þó það var bara nokkuð margt sem var tilbúið fyrir vorið þegar að var gáð. Rollubók, lambamerki, hjálpartæki og áhugi voru klár í fjárhúsunum. Sléttjárn, botnar, sílikon og vorstress klárt í hesthúsinu.  Sauðburðardressið, keppnisgallinn og girðingagallinn, allt klárt í íbúðarhúsinu.
Lítur bara vel út við fyrstu sýn............eða hvað ???
Girðingarnar fara ekki neitt, kartöflurnar spýra, sauðburðarbaksturinn..........hans tími mun koma og silungurinn syndir í vatninu.
Allt samkvæmt áætlun.




17.04.2013 11:12

Hann veit nú margt.........



Það hefur  blásið ansi hressilega síðustu daga hér í Hlíðinni og lítið lát þar á.
Á myndinni hér að ofan er Mummi á Gangskör minni sem er hryssa á fjórða vetri, undan Kolskör frá Hallkelsstaðahlíð og Adam frá Ásmundarstöðum. Blásturinn var svo mikill að það er engu líkara en taglið og faxið sé allt fokið af Gangskör minni en hún lét rokið ekkert á sig fá.



Þessi kappi er nú kátur þegar tekinn er reiðtúr út í víðáttuna og spáir hvorki í vindinn né fylgi stjórnmálaflokkanna. Veit þó vel að léttara er yfir húsfreyjunni þegar vel gengur á ákveðnum vígstöðum.  Að öðrum hestum ólöstuðum þá er þessi nú svolítið uppáhalds hjá húsfreyjunni og kannske fleirum, enda hefur Mummi skellt sér í reiðtúr þegar ég var ekki heima.
Sparisjóður veit að hann er uppáhalds en fer vel með það.

Já hann veit ýmislegt hann Sparisjóður minn :)

Þó svo að það sé ,,sultardropaveður,, í Hlíðinni þennan daginn gæti það svo sannarlega verið verra.  Njótið dagsins.

14.04.2013 00:25

Bara gaman



Það var blíða í Hlíðinni þennan daginn og þá er nú gaman að vera til og njóta dagsins.

Góðir gestir voru á ferðinni í dag sumir að skoða hestana sína en aðrir bara að líta við og taka stöðuna á okkur hér í Hlíðinni.

Fyrir viku síðan skruppum við í skautahöllina til að sjá glæsta gæðinga etja kappi á ísnum.
Margir góðir hestar komu fram og alltaf eitthvað spennandi að sjá, ekki spillti svo fyrir að ,,okkar,, maður af vestulandinu Jakob í Steinsholti sigraði örugglega.
Á miðvikudaginn fórum við svo í Borgarnesi en þar var einmitt Jakob með sýnikennslu.
Fróðlegt og gaman að sjá vinnubrögðin og fá smá innsýn í það hvernig hann þjálfar hestana.
Aðgöngumiðinn að sýningunni gilti svo sem happadrættismiði og var Mummi svo heppinn að fá folatoll undir Abraham frá Lundum í vinning. Nú verður kappinn að velja sér hryssu til að nýta tollinn góða, enda er Abraham bara spennandi hestur.

Nú er Astrid farin í verknám frá Hólaskóla en það tekur hún hjá þeim Randi og Hauki á Skáney. Hún tók Baltasar Arðsson með sér og ætlar að þjálfa hann með verknáminu.
Við smelltum okkur í heimsókn að Skáney m.a til að skoða nýju reiðhöllina og hesthúsið.
Glæsilegt hús og heldur betur góð aðstaða. Innilega til hamingju Skáneyjarbændur.

Við fengum góða gesti í gær en þar voru á ferðinni hressir hrossaræktendur úr Kjósinni.
Veðrið var ekki sérlega gott þegar þau komu en við lofum betra veðri næst, en eins og þið eflaust vitið þá er næstum alltaf gott veður hjá okkur :):)



Þessi höfðingi lét ekki snjóinn aftra sér frá því að njóta blíðunnar í dag enda er sólin bráholl fyrir hefðarketti.
Hann er klárlega fyrirmyndar köttur dagsins en fyrirmyndarhestur dagsins var Trilla Gaumsdóttir, sem var í miklu stuði :)

05.04.2013 21:32

Fullt af fréttum úr Hlíðinni



Það styttist óðum í að hryssurnar fari að kasta svo það er vel við hæfi að koma með mynd því tengdu.
Verð að nýta gamlar myndir á meðan húsfreyjan er myndavélarlaus myndasmiður.

Fyrir viku síðan var brunað á Stóðhestaveislu í Ölfushöllinn, það var sannkölluð veisla og mjög gaman að sjá marga gæðinga og flotta knapa.
Nokkrir hestar heilluðu mig sérstaklega, fyrstan skal telja Arion frá Eystra-Fróðholti sem mér fannst hreint frábær. Óskasteinn frá Íbishóli er ævintýri sem naut sín mun betur en á sýningunni í Borgarnesi þar sem hann var sýndur í ljósgeisla. Gaumur frá Auðsholtshjáleigu var glæsilegur og sýndi ótvírætt hversu góður gæðingur hann er.
Toppur frá Auðsholtshjáleigu, Konsert frá Korpu og Váli frá Efra-Langholti voru líka í feikna stuði.
Knaparnir sem mér eru að öðrum ólöstuðum lang eftirmynnilegastir eru Helga Una Björnsdóttir, Flosi Ólafsson og Þórdís Erla Gunnarsdóttir.
Helga Una og Bikar frá Syðri-Reykjum áttu stórgott atriði, falleg reiðmennska og gott samspil þeirra heilluðu mig. Flosi er einn af mínum uppáhalds ungu knöpum prúð og falleg reiðmennska sem svo sannarlega skilaði árangri á þessu kvöldi eins og oft áður.
Flosi og Möller frá Blesastöðum, já ég er ekkert búin að gleyma þeim.
Þórdís Erla og Gaumurinn eru mér ofarlega í huga eftir þessa kvöldstund og ekki var sýningin hjá henni síðri á Toppi, kraftur, gæði og sjarmi.
Ekki trúi ég öðru en þessir krakkar eigi bjarta framtíð fyrir sér sem úrvalsreiðmenn og þjálfarar. Fáguð reiðmennska sem skilar árangri og síðast en ekki síst falleg og hrokalaus framkoma við samferðafólkið.

Stóðhestaveislan stóð undir nafni gaman að sjá þetta allt saman.
Þulirnir voru frábærir og skiluðu öllum nauðsynlegum upplýsingum til okkar af þekkingu.
Takk fyrir skemmtunina allir þeir sem að þessu komu, mig er strax farið að hlakka til næstu veislu.

Það var góður dagur sem við í stjórn Félags tamningamanna áttum í Skagafirði í gær.
Hluti stjórnarinnar er í Skagafirði um þessar mundir svo við hin brunuðum norður til fundar við þau sem haldinn var á Hólum. Góður fundur þar sem mörg mál voru tekin fyrir og rædd.
Þegar við fórum norður komum við að Syðra-Skörðugili til að taka Elvar bónda með okkur á fundinn. Þar beið okkar dýrindis veisla og frábærar móttökur, ekki skemmdi svo fyrir að fá aðeins að líta við í hesthúsinu og skoða gæðingana. Ekki má svo gleyma því að skoða í fjárhúsin þegar að Skörðugili er komið.
Á Hólum var vel tekið á móti okkur eins og ævinlega, Víkingur fræddi okkur um það sem efst er á baugi þessa dagana. Við fylgdumst með í kennslustund, hittum kennara og nemendur.
Þegar maður kemur í Skagafjörðinn er ekki úr vegi að líta við á einhverjum bæjum og sjá hvað er í gangi hjá hestamönnum þar. Hersingin fór að Þúfum og þar fengum við að sjá marga spennandi gripi sem þar eru á járnum. Einnig skoðuðum við reiðhöllina sem Gísli og Mette hafa ný lokið við að byggja, björt og skemmtilega bygging sem alla hestamenn dreymir um. Dagurinn hefði þurft að vera mikið lengri :) Kærar þakkir fyrir góðan dag.

Já í gær.......ekki má nú gleyma því að höfðinginn hann Salómon svarti varð 14 ára gamall.
Hann tók áfanganum með mikilli ró, mætti á réttum tíma í morgunmat, lagði sig og lét ekkert trufla blundinn sem náði því að verða allt í senn morgun, hádegis, miðdegis og síðdegis.
En þessi elska var eldhress og tók á móti mér útí dyrum þegar ég kom úr Skagafirðinum vel eftir miðnættið. Salómon er snillingur af bestu gerð sem hefur skipað þann sess á heimilinu að engum dettur í hug annað en að hann sé konungurinn.

Freyja litla fjárhundur stundar stífar æfingar og telur eigandanum trú um að nú sé þetta allt að koma. Áhuginn er mikill og sennilega verður mesti vandinn að skemma ekki neitt.
Þó svo að kindur séu helsta áhugamálið hjá henni er það enn svo að hún dáist ómælt að köttum. Ég hef samt þá trú að hún sé ,,sumum,, fremri að greind og muni ekki láta hafa sig útí að smala þeim. Enda hefur Freyja ekki sýnt neitt sem bendir til pólutískraskoðunna, Guði sé lof fyrir það.

Samkvæmt nýjustu niðurstöðu hefur ekkert komið út úr rannsókninni sem gerð var á kindahópnum okkar og ég hef áður nefnt hér á síðunni.
Engar vísbendingar hafa komið fram sem geta rímað við eða skýrt hvað hefur gerst.
Rannsóknin heldur áfram en skemmst er frá því að segja að allt er í góðu hjá kindahópnum.

Fyrstu lömbin komu í heiminn 2 apríl en þá voru allri litlu páskagestirnir sem höfðu beðið óþreyjufullir eftir lömbum farnir. Það voru tvær hvítar gimbrar sem komu í heiminn og eru hinar hressustu.

Sauðburðurin hefst hjá okkur þann 5 maí en þá eiga sæðingsrollurnar tal, þann 7 gemlingarnir og síðan fer allt á fullt þann 9 maí.

Það er líf og fjör í hesthúsinu og mikið riðið út í blíðunni að undanförnu.
Fyrirmyndarhestur dagsins var hann Ábóti frá Brautarholti, sonur Öðu frá Brautarholti og Dyns frá Hvammi.
  • 1