Færslur: 2011 Janúar

30.01.2011 22:43

Folöldin með mínum augum



Dómarar á folaldasýningunni voru Valberg Sigfússon og Þorvaldur Kristjánsson með þeim er einkaritarinn þeirra Iðunn Svansdóttir.

Efsta folaldið í hryssuflokknum var Blómalund frá Borgarlandi undan Smára frá Skagaströnd og Vigdísi frá Borgarlandi.  Í öðru sæti var Spurn frá Minni-Borg undan Spyrni frá Þúfum og Löpp frá Hofsstöðum. Í þriðja sæti var svo Silja frá Söðulsholti undan Sólon frá Skáney og Hildi frá Sauðárkróki.

Efsta hestfolaldið var Spói frá Hjarðarfelli undan Friði frá Búlandi og Fjöður frá Hjarðarfelli. Í öðru sæti var Ófeigur frá Söðulsholti undan Hákoni frá Ragnheiðarstöðum og Blæju frá Svignaskarði. Í þriðja sæti var Jaðrakan frá Hellnafelli undan Dyn frá Hvammi og Hettu frá Útnyrðingsstöðum.

Folald sýningar valið af áhorfendum var Ófeigur frá Söðulsholti.

Öll þessi folöld voru virkilega frambærileg og ræktendum sínum til sóma.
Til hamingju eigendur og ræktendur.

Það er virkilega erfitt að gera uppá milli þessara folalda því að þau eru mjög ólíkar hestgerðir.
Blómalund heillaði mig mjög mikið um leið og ég sá hana hreyfa sig, hún er hreyfinga mikil, skrokkmjúk og  með tandur hreinar gangtegundir með miklu rými.
Ég er sannfærð um að Ásta á Borgarlandi fær þarna algjört hestagull.
Eitt merfolald sem þó var ekki í úrslitum vakti athygli mína en það var hryssan Dís frá Ólafsvík sem er undan Hruna frá Breiðumörk og Perlu frá Einifelli. Gerðin var kannske ekki sérstök en hreyfingarnar og ganglagið var skemmtilegt auk þess var hún einstaklega litfögur beiksokkótt.
Spói frá Hjarðarfelli er virkilega spennandi folald hreyfinga góður og fallegur. Eins og áður sagði er hann undan Friði frá Búlandi sem er sonur Dalvars frá Auðsholtshjáleigu og Baldursdóttur frá Bakka. Friður þessi er ósýndur en átti nokkur afkvæmi á sýningunni sem komu frá fjölskyldunni á Hjarðarfelli. Afkvæmi hans eru mjög áþekk og virkilega spennandi hestefni, nú er bara að bíða og sjá hvort að kappinn kemur ekki fram í vor.
Ófeigur frá Söðulsholti er stór og glæsilegur með frábært brokk, það verður spennandi að sjá hann þegar líður nær tamningaaldri. Amman Hátíð frá Úlfsstöðum var allavega með 10 fyrir tölt og 9.5 fyrir fegurð í reið.
Ófeigur var folald ,,brekkunnar,, og var vel að því kominn.
Valur frá Haukatungu undan Vilmundi frá Feti og Mynd frá Haukatungu var lipur og kom skemmtilega fyrir. Ég er ekki frá því að Valur hafi verið mun betur rakaður en eigandinn Ólafur frændi minn Pálsson.
Faxi frá Borgarnesi sonur Döggva frá Ytri-Bægisá er lipurt og skemmtilegt hestefni. Eigandi hans Þorgeir Ólafsson var sannarlega búinn að leggja sig fram og var Faxi örugglega best bustaði og hirti folinn á sýningunni.

Já það er alltaf jafn gaman að spá í hross ættir, gangleg og útlit svona sýning kyndir bara upp þann áhuga.

Eftir góðan dag í Söðulsholti var svo farið heim og gefið að því búnu var svo brunað á heimaþorrablót hjá góðu fólki í Borgarhreppnum þar sem við áttum góða kvöldstund og auðvitað var spjallað um hross.
Takk fyrir skemmtilegt kvöld kæru vinir.

Fleiri myndir koma þegar netsambandið hjá mér er betra en það hefur verið í kvöld.

30.01.2011 14:08

Folaldasýning í Söðulsholti.



Svona veður var boðið uppá í Hlíðinni í gær, sannarlega ekkert hestakerrufæri og því fórum við folaldslaus á folaldasýninguna í Söðulsholti.



Á sýningunni voru margir flottir gripir þarna er t.d Faxi frá Borgarnesi sonur Döggva frá Ytri-Bægisá. Eigandinn Þorgeir Ólafsson en Ísólfur bróðir hans er þarna á myndinni.



Hér er Lárus Hannesson kennari með meiru sennilega að kenna þeim bleika að lesa, góð leturstærð á Bónuspokanum.



Gunnar og Sigríður á Hjarðarfelli komu með nokkur afar athyggliverð folöld á sýninguna.



Föngulegur hópur hestamanna var mættur á sýninguna þessir strákar eru flestir úr Ólafsvík.
En ég saknaði Högna Bærings úr Stykkishólmi sem að alltaf hefur mætt á þessar sýningar.



Í lokin var svo kosið folald sýningarinnar af áhorfendum, sannarlega erfitt verkefni þar sem úrvalið var mikið.
Á myndinni er Auðunn bóndi á Rauðkolsstöðum í þungum þönkum, ætli hann hafi kosið rétt????



Þarna er Söðulsholtsbóndinn með krakkana sína sem hjálpuðu afa að taka við verðlaununum.

Frábær dagur í Söðulsholti, ég tók slatta af myndum sem að ég smelli inná síðuna við fyrsta tækifæri. Eins ætla ég að segja ykkur hvaða gripir mér eru efstir í huga eftir sýninguna. Hef vonandi tíma í kvöld.

26.01.2011 21:00

Konungleg útför í þágu vísindanna

Þetta var nú góður dagur.
Það var gott veður hér í Hlíðinni mikið riðið út, þjálfað og tekinn villtur rekstur í dag.
Ég hef trú á að bæði menn og hestar sofi vel í nótt eftir allt þetta at.
Meðal aldur hestanna í hesthúsinu er ekki hár um þessar mundir stór hluti á fjórða vetri og annað eins á fimmta vetri síðan örfá eldri.
Flestir þessir fjórfættu nemendur eru komnir vel á veg í tamningu og sumir lofa bara nokkuð góðu.
Nú bíð ég bara frétta af stóðinu mínu á Hólum spurning hvort að þögnin lofi góðu eða sé til komin vegna einhverra hamfara.
Fyrirmyndarhestur dagsins var hann Vörður minn og það hefur sko ekkert með eignarhald að gera.

Fyrir nokkrum dögum gerðist það að ein kollan í fjárhúsunum gaf upp öndina, svo sem ekki í frásögu færandi en læt það flakka. Heilsu Kollu hafði hrakað mjög skyndilega svo að vart gafst tími til mikilla aðgerða. Þar sem að hún var ung og átti líka að vera spræk og langlíf hugsaði ég með mér að rétt væri að láta kryfja Kollu til að fá úr því skorið hvað hefði orðið henni að bana. Ég hef stundum séð það á prennti að ,,auðvita,, eigi bændur að láta rannsaka gripi sem að drepast af óútskírðum ástæðum.
Ég hringdi í Rúnar dýralæknirinn minn og bar þetta undir hann, hvatti Rúnar mig til að kanna málið og ekki síst verðið sem að mér fannst á þessum tímapunkti vera smáatriði.
Við hvattninguna efldist ég til mikilla muna og fylltist ábyrgðartilfinningu af flottustu gerð. Nú skyldi vísindunum lagt lið í þágu íslensku sauðkindarinnar. Göfugt málefni það.
Ég snarast inní bæ finn símanúmerið á Keldum og hringji.
Eftir að hafa þvælst á milli manna og kvenna um símalínur fyrirtækisins í nokkurn tíma fékk ég loks samband við konu sem svarað gat mínum spurningum.
Hvað kosta að kryfja kind og hvernig á ég að senda hana ?
Ekki stóð á svarinu.
Það kostaði sem sagt kr 43.000.- að kryfja Kollu og æskilegt væri að ég bara renndi með hana í bæinn sem fyrst svo að hún yrði ,,fersk,, og fín í aðgerðinni.
Kr 43.000.- plús 130 km x 2 eru 260 km x kr 92.- gera kr 23.920.- samtals: kr 67.180.-
,,Já sæll,, eins og góður maður sagði eitt sinn.
Margt flaug í gegnum kollinn á mér þegar hér var komið við sögu og sennilega hefur þögnin í símanum verið nokkuð þrúgandi því blessuð kona tjáði mér að sennilega gæti ég fengið 70% afslátt. Þá skyndilega rofaði til í kollinum á mér og ég náði að anda að mér þokkalegum skammti af súrefni.  Uppí hugann kom mynd af skeggjuðum og þreyttum Steingrími Joð með  staurblankan ríkissjóð á herðunum.
Ó nei............ ekki ætlaði ég að bera ábyrgð á frekari þrengingum á þeim ,,bænum,, með ónauðsynlegum vísindarannsóknum sem að sennilega yrðu í besta falli í mína þágu og sauðkindarinnar.
Sumt krefst einfaldlega tillitsemi.
Ég andaði djúpt gerði röddin eins elskulega og ég gat kvaddi síðan konuna með þökkum en gleymdi að segja henni að Kolla kæmi ekki til hennar þar sem að ljáðst hefði að safna í vísindasjóð henni til handa.
Líklegt er að andlát Kollu hafi stafað af einhverjum algengum kvilla en óneitanlega hefði verið fróðlegt að fá nánari upplýsingar um það.
Nú er Kolla komin undir frost og klaka en hún fékk afar virðulega útför allt að því konunglega því að ýmislegt er nú hægt að gera fyrir minna en 67.000 þúsund krónur.
Já það er ekkert grín að deyja í þágu vísindanna.


24.01.2011 08:34

Sparisjóður fluttur

Helgi afreka er liðin þar sem folöld voru rökuð, nýjar ásetuæfingar æfðar af miklum móð og heilmikið annað gert. Í gær brunaði svo Mummi norður að Hólum með Sparisjóðinn minn og að auki frænku hans Hlíð sem er undan Kolskör og Glym frá Skeljabrekku einnig Sjaldséð sem er undan Venus frá Magnússkógum og Baugi frá Víðinesi. Ég verð nú að játa að mikið sakna ég Sparisjóðs og finnst hesthúsið hálf tómt þó svo að öll plássin hafi fyllst um leið.
Já sumir eru einfaldlega skemmtilegri en aðrir.
Ég veit að þetta gengur ljómandi vel hjá Mumma og stóðinu mínu.
Það hefur verið sumarblíða síðustu daga hiti og rigning svo nú heyrist ekkert kvart yfir hörðu reiðfæri.
Bara spennandi dagar framundan.

21.01.2011 22:34

Þorri kallinn.

Til hamingju með daginn kæru bændur í borg og til sjávar og sveita.

Hér heilsaði dagurinn með þýðu og vorveðri svo það hefði ekki væst um nokkurn mann að hoppa í kringum bæinn á nærfötunum einum klæða. Ég varð ekki vör við að neinn á þessu heimili gerði það en ýmislegt fer nú framhjá mér.
Venjulega hef ég haft þjóðlegan mat á boðstólnum þennan dag en núna var breytt út af þeirri venju og í stað hákarls og punga var það steik og bernes. Mun bæta úr þessu þegar líður á Þorrakallinn.

Margt hefur á dagana drifið síðan ég skrifaði síðast, eins og ein Reykjavíkurferð á fund í Sjávarútvegs og landbúnaðarráðuneytinu og margt fleira.
Í ráðuneytinu vorum við í Þróunarsjóðsnefndinni að hittast og ræða málin.
Í gær var svo fundur í Háskólaráði Hólaskóla fróðlegur og góður fundur.

Þorvaldur á Skeljabrekku kom og tók DNA úr folöldunum svo að nú er það frá og vonandi allt rétt feðrað og mæðrað.

Það var gaman í hesthúsinu í dag og ekki skemmdi það fyrir að hafa vor í lofti þegar út var komið. Tryppin kunnu vel að meta það og reiðfærið mun mýkra en undanfarið.
Mummi kom heim frá Hólum í kvöld svo að nú verður gramsað í námsefninu og reynt að læra svolítið. Nýjasta og skemmtilegasta efnið er boltaæfingar af ýmsum toga, eins gott að engum datt myndavél í hug á meðan ég var að æfa mig.
Á morgun eru það svo folaldaklippingar og prufureiðtúrar.
Fyrirmyndarhestur dagsins var klárlega Riddari frá Lækjarbotnum sem að sýndi sínar allra bestu hliðar í dag.

20.01.2011 22:56

Fjórðungur kominn heim til Anne



Þarna er hann Fjórðungur um það bil að stíga á erlenda grundu, Anne tekur að sjálfsögðu á móti honum.



Já sæll/sæl langt síðan við höfum sést..................mannstu ekki eftir mér ?????



Jú auðvitað þekkjumst við og erum svo ánægð með endurfundinn.



Ví......................hver sagði að það væri ekki víðátta í Þýskalandi ???????


17.01.2011 21:40

Fjórðungur farinn



Þetta er Fjórðungur frá Hallkelsstaðahlíð 5 vetra foli sonur Arðs frá Brautarholti og Sunnu frá Hallkelsstaðahlíð.
Um þessar mundir er Fjórðungur á leið til nýrra heimkinna í Þýskalandi en þar mun hann eiga góðar stundir með henni Anne okkar sem nú hefur eignast hann.
Til hamingju Anne vonandi gengur allt sem allra best hjá ykkur Fjórðungi.
Svona til að upplýsa ykkur aðeins um álit mitt á Fjórðungi þá er skemmst frá því að segja að ég er byrjuð að leggja drög að því að fara með Sunnuna aftur undir Arð næsta vor.
Segir það ekki allt sem segja þarf ?

Fínasta veður í dag og mikið um að vera í hesthúsinu sem veitir hreint ekki af þegar margt er á járnum. Ég get eiginlega ekki gert uppá milli og valið hest dagsins..........................
Í gær var gestkvæmt hjá okkur og heldur betur líflegt í hesthúsinu, takk fyrir komuna það var gaman að fá ykkur í heimsókn.


15.01.2011 22:19

Dalirnir og fleira.................



Ég var boðin í kvöldverðarskemmtun/fund inní Búðardal í gær þar sem að hestamenn hittust, fræddust og skemmtu sér og öðrum gestum. Af því tilefni voru þessar myndir teknar en veislustjórinn stjórnaði ,,útsvars,, spurningakeppni sem var hin mesta skemmtun.
Á myndinni hér fyrir ofan er annað liðið sem var skipað þeim Svanhvíti húsfreyju í Lindarholti, Valberg bónda og kynbótadómara Stóra-Vatnshorni og Guðbirni bónda og landpósti í Magnússkógum.



Þarna er svo hitt keppnisliðið sem var skipað Margréti bónda í Miklagarði, húsfreyjunni í Gufudal sem að ég því miður veit ekki hvað heitir og Sigurði Hrafni bónda og þúsundþjala á Vatni.

Keppnin var æsispennandi en lauk með sigri Sigurðar og kvennanna, sennilega var það snarræðið við að ná bjöllunni sem að gerði gæfumuninn. Siggi alltaf sprækur.
Alltaf gaman að koma í dalina og hitta hresst hestafólk.

Gleði dalamanna hefur svo haldið áfram í kvöld þegar dalamaðurinn í söngvakeppninni komst áfram í forkeppninni. Til hamingju Halli Reynis.

Á fimmtudaginn brunaði ég í bæinn til að funda með stjórn Félags tamningamanna og nokkrum öðrum félögum. Þessum fundi hafði áður verið frestað vegna veðurs sem að reyndist svo litlu skárra þennan dag. Allavega var ég ánægð að vera á þungum og traustum trukki sem að mér finnst stundum svifaseinn en lofaði í þessari ferð.
Fundurinn var góður og margt af spennandi hlutum að gerast.

Loksins kom gott verður og færi til að ríða út eins gott að nýta það því veðurkortin bjóða víst uppá frost og rok innan skamms. En bannað að kvarta...........

Hér á bæ er reynt að fylgjast með handboltanum eins og kostur er en frekar er það nú frumstæður máti sem boðið er uppá núna. Reyndar náðum við leiknum í gær á netinu en ekkert gekk í kvöld.
Til að koma orkunni í lóg sem fara átti í spenning yfir leikjunum er Stöð 2 bölvað svolítið svo að ekki sé nú talað um hugsanlegt eignarhald á gripnum.
Já en einhversstaðar verða vondir að vera.......................

Sauðfjárhornið.........
Í morgun voru hrútarnir teknir frá gemlingunum og fækkað í krónum hjá rollunum. Þannig að nú er bara einn hrútur eftir í hverri kró og allar stíur teknar í burtu. Einskonar tiltekt.
Hrússi úrilli vinur minn er kominn í frí fram að næstu jólum og getur því byrjað að safna kröftum þangað til. Vonandi verða þeir kraftar samt notaðir til góðra verka.
Þegar allar stíur höfðu verið fjarlægðar fengu sumar kindurnar háfgert víðáttubrjálæði og hlupu og hoppuðu út um allar krær.
Hrútarnir sem að urðu þeirrar gæfu aðnjótandi að verða eftir með um það bil 70 kindum hver æddu fram og til baka í leit að ,,einhverju,, en varð lítið ágengt. Sem betur fer.
Ég veit ekki afhverju mér datt í hug orðið ,,hálfþrjúmaður,, sem að ég heyrði eitt sinn notað í grátbroslegri merkingu.

11.01.2011 20:58

Garrinn á góðum degi



Það er yndislegt að fá sér blund í sólinni sem léttir lund og bætir geð.............
Á myndinni er Kalsi litli sem er undan Kolskör og Aldri frá Brautarholti í draumalandinu.

Norðan garrinn er enn til staðar hér í Hlíðinni og lítið lát á skemmtilegheitunum.
En það sem ekki drepur það herðir hefur stundum verði haft á orði hér á bæ.........og dugað vel.

Nú hefur Hrútaskráin vikið af náttborðinu fyrir stórum bunka af stóðhestablöðum sem skoðuð eru af miklum móð þessa dagana. Alveg undarlegt hvað maður nennir alltaf að skoða þau aftur og aftur. Nokkrir stóðhestar vekja meiri væntingar en aðrir og alltaf er spennandi að fylgjast með hvaða hestar verða hér í nágreninu við okkur í sumar.
Bíð eftir listanum á hrossvest.

Ég var að skoða mótaskrá LH og sá að hún er orðin þétt setin fyrir keppnistímabilið sem verður greinilega spennandi. Eins eru félögin farið að auglýsa spennandi dagskrá fyrir veturinn með margvíslegum viðburðum.
Nú er allt komið í fullan gang við undirbúning á 40 ára afmælishátíð FT sem haldin verður í Víðidalnum 19 febrúar n.k. Takið daginn frá.
Nánar um það síðar hér á síðunni en ég get þó upplýst að fjöldinn allur af okkar færustu reiðkennurum og tamningamönnum munu verða með sýnikennslur og fyrirlestra.

Já ekki má nú gleyma fréttum úr sauðfjárhorninu góða.
Allt var með kyrrum kjörum í dag svo að vonandi eru þessi læti að baki og frekari aðgerða ekki þörf. Hrússi hafði hægt um sig og lét eins og allar elskurnar hans væru óaðfinnanlegar, svona líka ljúfur og góður þessi elska.
En svona til öryggis hef ég vellt orsökunum aðeins fyrir mér í dag og fengið álit hjá til þess bærum aðilum. Nú hef ég helst hallast að því að þessar geðsveiflur stafi af svefntruflunum, óreglulegum matartímum og enn og aftur af aldurstengdum pirringi.
Já það er ekki grín að vera kall á þessum síðustu og verstu tímum.

10.01.2011 20:26

Fjórir kappar farnir á Hóla...........

Nú er hann napur að norðan.................
Ég held að góða veðrið að undaförnu hafi bara gert mann að aumingja því að um leið og eitthvað kólnar er ég farin að væla.
Nú verður föðurlandið, ullarsokkarnir og lambhúshettan staðalbúnaður á næstunni.

Ég nefndi fjörureið í síðasta bloggi og viðbrögðin létu ekki á sér standa, tölvupóstar og læti. Er ekki spurning um að gera eitthvað spennandi......................?????

Í dag fór Mummi norður að Hólum en námið á reiðkennarabrautinni hefst hjá honum á miðvikudaginn. Hann fór með þá félagana Fannar og Gosa sem að hann fer með í námið auk þess tók hann einn uppáhalds prins úr Borgarfirðinum með.
Um næstu helgi er svo stefnt að því að sækja fleiri gripi og fara með norður. Bara spennandi.

Í gær fengum við góða gesti sem komu og enduðu jólin með okkur kaffispjall og notalegheit. Nú er sem sagt jólaskrautið alveg að komast á sinn stað þó með smá undantekningum.
Hver sagði að það þyrfti að fara strax????

Úr sauðfjáhorninu er það helst í fréttum að farið er að síga á seinni hlutann á fengitímanum.
Flest hefur gengið með ágætum og þó.....................
Ég verð að nefna eitt sem valdið hefur mér hugarangri að undanförnu en það er andlegt ástand nokkura ,,karlkindanna,, þeir hafa haft í frammi afar grófa ofbeldistakta með slæmum afleiðingum. Já það er ekki nóg fyrir þá að skeyta skapi sínu á milligjörðum og steinveggjum með barsmíðum og látum heldur verða virðulegustu kindur að þola ýmislegt. Hvort að þetta stafar af útvarpshlustun, efnahagsástandinu eða einhverjum aldurstengdum pirringi veit ég ekki en slæmt er það.





08.01.2011 21:28

Dreymin............



Þegar það er kalt og hvasst er gott að skoða gamlar myndir af ,,góðu,, veðri og skemmtilegum hestaferðum. Þessa mynd rakst ég einmitt á í einni svoleiðis skoðunarferð.
Þarna eru ég og Proffi minn á góðri stundu, ég fylltist mikilli löngun til að annarsvegar ríða á förurnar og hinsvegar að taka Proffan minn inn.
Best að bíða með Proffan í nokkrar vikur í viðbót og ferðalagið til vorsins en að sjálfsögðu má láta sig dreyma.
Annars á ég miklum skyldum að gegna næsta sumar hvað varðar fjöruferðir þar sem að ég hef lofað góðri vinkonu minn og starfsmanni FT að ríða með henni á Löngufjörur.
Kellan sú er nú heldur betur vel ríðandi svo það er sennilega best að fara bara að þjálfa strax til að hafa við henni.
Já það verður sko Ferðin með stórum staf og skyldi einhver vilja koma með okkur????

Enn er það valkvíðinn sem þvælist fyrir mér því að nú fækkar dögunum þangað til Mumminn fer norður. Ég ákveð reglulega hvaða hross ég á að senda með honum en skipti svo jafnharðan um skoðun.
Spennandi að sjá hvar ég verð stödd í ferlinu þegar kappinn leggur íann.
Kemur í ljós á morgun..........................

05.01.2011 22:31

Kvatt í kulda



Tveir draumaprinsar þeir Þorri og Ófeigur Deilu og Kátssynir.

Það var orðið svo langt síðan ég hef sett inn mynd af þeim hér á síðuna að mér fannst það orðið alveg tímabært. Þeir eins og aðrir hundar hér í gamla Kolbeinsstaðahreppi fengu heimsókn frá Rúnari dýralækni í gær. Rúnar sér alltaf um hundahreinsunina og er uppáhalds vinur hundanna allavega hér á bæ því að hundahreinsitöflunum fylgir alltaf hnetusmjör eða lifrarkæfa.

Það var heldur betur kalt hér í dag frost og strekkingur, þrátt fyrir það voru sýnd hér mörg hross. Já það voru margir eigendur á ferðinni í dag og líka í gær.

Þessa dagana eru hestar að koma og aðrir að fara, eins gott að veðurspáin og veðrið verði gott á næstunni. Mér finnst alltaf jafn leiðinlegt að ferðast með hestakerru í vondu veðri.

Í dag kvöddum við líka nokkra höfðingja sem að héldu til nýrra ,,heimkynna,, þetta voru þau Spóla, Skeifa, Taktur, Frosti og Sólmundur.
Takk fyrir samfylgdina, svona er lífið...............

04.01.2011 00:11

Jólin og vangavelltur



Það finnst flestum gaman á jólunum en biðin eftir pökkunum getur verið allt að því óbærilega fyrir suma. Hér er ein uppáhalds frænka mín sem hlustaði með athyggli á reynslusögur Mumma af ,,pakkabið,,



Einhverju hafði hún við að bæta sem vert var að deila.....................



...............hún er ekki alveg viss um að sagan hjá Mumma sé alveg sönn ?????

Jólamyndirnar munu rata inná síðuna við tækifæri en netsambandið og þolinmæði húsfreyjunnar eru ekki alveg samstíga þessa dagana svo sýnið biðlund.

Það var gaman í hesthúsinu í dag mörg hross hreyfð og sum virkilega skemmtileg, vorum líka fjögur að ríða út svo það var gangur í málinu.
En nú eru miklar vangavelltur í gangi því nú styttist í að Mummi fari í skólann norður að Hólum. Vangavellturnar snúast um það hvaða hesta hann eigi að taka með sér fleiri en þá tvo sem að hann notar í námið. Það er að segja Fannar og Gosa.
Hverjir verða fyrir valinu er enn ekki ákveðið en líklega tapar húsfreyjan skemmtilega leikfanginu sínu :)................sjálfviljug.

Á morgun kemur hún Anne okkar mikið veður nú gaman að hitta hana.

02.01.2011 21:14

Góður er andinn á Hafurstöðum

Eins og við var að búast byrjaði árið með stæl.
Eftir friðsamt og gott gamlárskvöld með spilamennsku, sjónvarpsglápi og vinakveðjum var nýársdagurinn tekinn rólega. Árlegt sprengji nýjársboð á Bíldhóli var skemmtilegt að venju og ekki sveik perutertan hjá Halldísi.
Endalaus veisluhöld og ofát hafa einkennt síðustu vikuna svo það er eins gott að hafa nóg að gera úti við á næstunni.
Ég held að mér líði núna eins og smalaklárum sem teknir eru beint af góðum grösum og sendir í leitir. Já það er eins gott að jólin eru bara einu sinni á ári.

Það var vorveður í Hlíðinni í dag hiti, logn og þoka, já svo sannarlega þoka sem reyndist sumum erfið viðureignar. Uppúr hádegi kom tilkynning um að manns væri saknað sem að lagt hafði í göngu frá Hítardal. Voru björgunarsveitir kallaðar út til leitar uppí Hítardal.
Mér varð á orði þegar ég fór í hesthúsið eftir hádegið að sennilega væri best að bruna innað Hafurstöðum sem er eyðibýli hér fyrir innan og finna manninn. Þetta kom uppí hugann en gleymdist fljótt þar sem að gesti bara að garði og frekar var um óskhyggju að ræða en trú að að maðurinn fyndist þar. Hugsaði samt um það hversu auðvelt það væri að beygja aðeins af leið í svona þoku jafnvel þó að maður þekkti vel til.
Það var svo eftir miðjan dag að björgunarsveitir komu hingað til að leita mannsins, stutt var í myrkur og brunaði Mummi með þeim suður að Hafurstöðum.
Og viti menn þar var maðurinn kominn og beið við rústirnar af gamla Hafurstaðabænum.
Já andarnir á Hafurstöðum eru góðir heim að sækja og passa vel uppá góða gesti.
Það var því glatt á hjalla við eldhúsborðið hjá okkur þegar heim var komið, gaman að fá svona marga góða gesti og fyrir mestu að allt fór vel.

Ég er búin að lesa nokkrar bækur og langar að nefna tvær sem að ég hafði mjög gaman af en það eru bækurnar um Möggu í Dalsmynni og Sæmund Sigmundsson.
Magga er eins og ég hef lengi vitað eða frá því að við vorum saman í ,,rófubandalagi,, stórskemmtileg og hefur sýn á lífið sem ég held að mögum væri hollt nú til dags.
Ég held að það væri heillaráð hjá þeim sem eru í leit að andlegum sjálfshjálparbókum að lesa bókina hennar Möggu það leynist ansi margt í henni sem gott er fyrir hugann.
Svo skemmir nú ekki fyrir að hún hefur enn ekki fundið neitt skárra til að kjósa en Framsóknarflokkinn.
Bókin hans Sæmundar er líka skemmtileg og fróðleg lesning sem vert er að gefa sér tíma til að lesa. Góðar frásagnir og ekki skemma myndirnar fyrir sem að lífga uppá bókina.
Já Sæmundur er alltaf flottur.

Á fimmtudaginn síðasta fór ég á kennslusýningu hjá Sigurbirni Bárðarsyni sem haldin var í Gusti. Þar fór kappinn á kostum og fræddi ekki bara viðstadda heldur skemmti þeim að lífi og sál. Fyrst ræddi hann um beislabúnað en síðan kom hann með gæðinginn Líf frá Möðrufelli og sýndu þau í sameiningu ýmsar þjálfunaraðferðir sem hann notar í byrjun vetrar.
Skemmtilegt kvöld og bara byrjunin á því sem að Félag tamningamanna ætlar að bjóða uppá víða um landið í vetur.
  • 1