Færslur: 2010 September

27.09.2010 20:37

27 september 2010



Hér er mynd sem tekin var í leitunum yfir Hafurstaði og Hlíðarvatn.
Myndin er tekin af Skálarhyrnunni.
Myndgæðin eru ekki sérstök þar sem að vélin er ,,imbi,, en myndin sýnir samt hversu lítið er í Hlíðarvatni.
Við eigum fullt af myndum sem að teknar voru í leitunum sem að ég á eftir að koma hér inná síðuna.



Þessi mynd er aftur á móti tekin af Hlíðarmúlanum.

Í dag slepptum við nokkrum ráðsettum smalahestum sem lokið hafa störfum í haust, nóg er samt eftir og rúmlega 30 á járnum. Mér finnst þetta alltaf skemmtilegur tími til að ríða út og vinna í ungum tryppum tala nú ekki um þegar svona vel viðrar.
Já í dag var 14 stiga hiti og blíða hér í Hlíðinni.

Dagleg skoðunarferð í folaldagirðinguna var skemmtileg í dag allt í ró og næði gott veður og folöldin bara nokkuð hress. Flest þeirra eru fljót að koma og skoða þessi furðuverk þegar við komum og setjumst á þúfu. Athygglivert að fylgjast með hvað þau eru mismunandi framfærin og hvernig framkoma þeirra hvert við annað er. Ekki ósvipað krakkahóp sum eru hress og kát önnur þung og hafa hreinlega ekki eins gaman af lífinu.

25.09.2010 22:30

Laufskálarétt........nei nei það er ekkert gaman :(:(

Nei nei mig langaði ekkert í Laufskálarétt..............allavega fór ég ekki þetta árið en stefni staðföst á næsta ár. Já maður getur ekki verið á mörgum stöðum í einu því er nú ver, en ég sendi fulltrúa svo að þetta er í góðu lagi.

Í dag var réttað í Vörðufellsrétt, við hér í Hlíðinni fengum rétt um hundrað kindur. Skilamenn úr Kolbeinssstaðahreppi gamla voru 7 sem að allir höfðu með sér voldug fluttningatæki sem öllu voru fyllt og rúmlega það því að við fórum tvær ferðir.
Skemmtileg rétt og fullt af fólki sem að átti góðan dag á Skógarströndinni.
Myndavélin gleymdist en sem betur fer átti ég mynd sem að tekin var í Mýrdalsrétt af þeim feðgum Jóel og Jóngeiri á Bíldhóli.


Spekingslegir þarna feðgarnir.



Þessa mynd tók ég líka í Mýrdalsrétt þarna er hreppstjórafrúin að fylgjast með hvort að allt fari ekki vel fram.



Þeir eru búralegir þarna þessir höfðingjar sem skoðuðu mannlífið í Mýrdalsréttinni.
Haukur á Snorrastöðum og Sveinbjörn í Hlíð.



Svo eru hér fleiri heimildarmyndir frá réttarhaldinu í Hlíðinni um síðustu helgi.
Þarna er Borgarnesdeildin öflug að vanda....................



Og enn fleiri heimildir og margar eftir ég reyni að týna þær hér inn við tækifæri, það verður gaman að skoða þessar eftir nokkur ár.

Þó svo að ég sé hundfúla yfir því að hafa ekki komist í Laufskálarétt í dag þá verð ég örugglega ánægð með það á morgun.

24.09.2010 01:42

Skútan heim og leyndarmálið okkar.



Þessi mynd heitir ,,Hópdrykkja,, hljómar kannske ekki vel en ef að þið skoðið nánar þá er það ekki mjög áfengt sem drukkið er heldur hreint og tært Hlíðarvatn.

Bara svo að það fari ekkert á milli mála þá hef ég sett inn nýjar myndir hér á síðuna sem teknar voru í réttunum. Vonandi eru allir sáttir við þessa birtingu enda allar myndir innan velsæmismarka. Eina sem að ég hafði áhyggjur af er það hvort að allir hafi nú verði vel til hafðir og ferskir. Mér sýndist allir þola samanburð nema þá helst húsfreyjan en hún er ýmsu vön svo þetta sleppur.

Eins og áður sagði fóru 402 lömb í slátur frá okkur í fyrra dag, hér hefur verið beðið eftir því að vigtartölurnar kæmu í hús. Að sjálfsögðu er alltaf spenningur að fá fyrstu tölur já svona eins og í kosningunum. Ég hef séð á fésbókinni að það er misjafnt hvort að fólk birtir þessar tölur en ég hef talið mér trú um að þeir einir birti tölurnar sem að eru þokkalega ánægðir með tölurnar. Ég er enn að spá í hvort að okkar tölur séu nógu góðar til birtingar, er ekki alveg viss. En þar sem að þið eruð nú orðvör og vel innrætt þá læt ég þær flakka og sjáið til svona okkar á milli. Meðalvigt á 402 lömbum 15,83 kg og einkun fyrir gerð 9,1.

Í gær sóttum við Skútu og Þjóhátíð sem að voru hjá Stíganda frá Stórahofi í Jaðri hjá Krissu og Agga. Klara vinkona mín frá Lambastöðum var þar líka með sitt folald og tókum við hana með heim. Eins og vænta mátti þá voru báðar hryssurnar fylfullar og í mjög góðu standi.
Takk fyrir góða þjónustu Jaðarsbændur.
Og þá eru allar hryssur komnar heim frá stóðhestum og viti menn allar hafa þær sónast fengnar.

21.09.2010 21:27

Smá sýnishorn af réttunum.



Fjalla-Eyvindur ?
Nei reyndar ekki bara tveir vaskir smalar að störfum án fjórhjóls og án hesta.

Já nú er aðalfjörið frá sem sagt sex daga skorpa sem að gekk alveg ljómandi vel með hjálp góðra manna og kvenna.
Heimtur bara nokkuð góðar og 402 lömb farin í Skagafjörðinn...........nú er bara að bíða eftir meðavigtinni. Mér hefur sýnst á fésbókinni að þeir sem að eru ánægðir með vigtina sína  segja frá henni en hinir þegja samviskusamlega. (Alveg eins og hjá konunum)
Nú er bara spurningin hvort vigtin verður hér gefin upp?



Hér kemur smá sýnishorn í myndum seinna kemur það í máli...............smá þreyta í gangi.



Hér kemur mynd af systrunum sem að stóðu í ströngu í eldhúsinu og sáu um að enginn færi svangur.
Bara fyrir þá sem að alltaf rugla nöfnunum á þeim fv Lóa, Stella, Fríða, Svandís og Sirrý.



Stemmingin var frábær 0g jafnt stórir sem smáir nutu veðurblíðunnar.



Og svona var nú gaman þegar sest var niður og spjallað..............

Það voru teknar nokkur hundruð myndir þessa daga sem að ég reyni að koma inn við fyrsta tækifæri.

Það var frábært að fá allt þetta góða fólk til að hjálpa okkur í leitum, réttum eða eldhúsinu.

Takk kærlega fyrir frábæra daga kæru vinir við hér í Hlíðinni erum ykkur afar þakklát.

16.09.2010 23:03

Fyrsti í réttum og hryssufréttir með.



Nú er allt að verða klárt fyrir réttirnar hér í Hlíðinni en þó vantar einn góðan í hópinn sem því miður getur ekki komið þetta árið. En hann kemur bara næst og verður með okkur.
Bestu kveðjur til Danmerkur Per frá öllum smölunum í Hlíðinni:)

Við byrjuðum aðeins að smala í dag hér í kring nánar tiltekið ,,inní hlíð og útá hlíð,,
Á morgun er það svo Oddastaðafjallið, veðurspáin er góð svo að það lítur bara vel út.

Í gær sóttum við Karúnu og Tign sem voru hjá honum Alvari frá Brautarholti útí Fellsöxl.
Karún var með 45 dag fyl og  Tign með 35 daga fyl aldeilis flott og nú bíður kella bara eftir því að fá hryssur :)
Perla vinkona mín frá Lambastöðum var líka hjá Alvari og að sjálfsögðu fylfull líka.
Fylprósentan hjá Alvari var mjög góð eins og reynar hjá velflestum hestunum sem að voru í boði hjá Hrossaræktarsambandinu hér á Vesturlandi.
Núna er það bara Skúta sem að er ókomin heim frá stóðhestum en hún er enn í góðu yfirlæti hjá Krissu vinkonu minni í Jaðri. Verður sótt strax eftir réttir.

Ég mun reyna að setja inn sjóðheitar réttarfréttir eins oft og færi gefst...........................

14.09.2010 23:22

Folaldaskoðun á Gunnlaugsstöðum.



Þessum varð vel til vina við fyrstu kynni Eyvindur og Moldi litli á Gunnlaugsstöðum.

Já í gær var brunað upp að Gunnlaugsstöðum til að líta á folöld.
Hugmyndin var að hjálpa góðum grönnum að finna fermingargjöf handa ungri dömu.



Ekki vantaði nú litadýrðina í þetta stóð rauðskjótt, moldótt, brúnskjótt, jarpskjótt og margir fleiri skemmtilegir litir.................



Hér kemur svo mynd af aðal erindinu en þetta er gripurinn sem að varð fyrir valinu og bíður þess nú að verða happagripur nýs eiganda. Hún sýndi ljómandi tilþrif bæði á tölti og brokki.
Ekki skemmir fyrir að hryssan er með hvíta kríumynd á hálsinum en auðvitað hinu megin.
Spurning hvort að það á eftir að hafa eitthvað með nafngiftina að gera?




Eftir að hafa skoðað allt stóðið vandlega með Þórði bónda var röllt heim í kaffi þar sem við áttum skemmtilegt spjall. Rifjaðar voru upp gamlar og nýjar sögur af góðum sveitungum.
Já það er alltaf gaman að rifja upp skemmtilega tíma með góðu fólki.
Takk fyrir okkur Þórður og Lína.


12.09.2010 23:15

Hressir krakkar á strumpastrætó..........



Þarna sjáið þið ,,Strumpastrætó,, af bestu gerð sem meðal annars hefur það hlutverk að flytja fólk í hesthúsið. Eins og þið sjáið þá er mannskapurinn vel við aldur og því alveg nauðsynlegt að fá far, meira að segja Snotra sleppir ekki svona ökuferð.



Hér eru hressar dömur þær Astrid frá Danmörku, Anne frá Þýskalandi og Sandra frá Svíþjóð.
Hún Sandra frá Svíþjóð hefur verið hjá okkur í viku en hún er hér á landi að kynna sér Landbúnaðarháskólann á Hvanneyri og í leiðinni að kynnast lífinu hjá okkur í sveitinni.
Sandra hefur hjálpað okkur mikið þennan tíma og vonandi hefur hún haft gagn og gaman af.
Í dag fór svo Sandra frá okkur á vit ævintýranna í Borgarfirði.
Takk fyrir skemmtilegan tíma Sandra.

Það rigndi heilmikið í dag en ekki gat ég nú séð að mikið hækkaði í vatninu, óumflýjanlegt að fara að huga að langri girðingu út á leirana svo að féð tolli heima meira en smá stund.

Ég horfði á stórskemmtilegan þátt um Ómar Ragnarsson í kvöld, þátturinn var gerður í tilefni af 70 ára afmælinu hans. Það var gaman að sjá öll myndbrotin sem að voru sýnd og rifja upp hvað hann hefur afrekað margt skemmtilegt.

Hreint ótrúlegur kallinn og athyggliverð spekin hans ,,láta sér leitt ljúft þykja,,
alltaf svo gaman að heyra eitthvað sem fær mann til að hugsa...............
,,

11.09.2010 22:21

Spennandi tamninga og söluhross.



Já þau eru mörg skemmtileg hrossin sem eru hjá okkur núna og eins og ég var búin að lofa um daginn þá koma hér fleiri myndir af tryppunum.
Þarna eru Krapi Gustsson og Mummi að leika sér á góðum degi.



Krapi er í miklu uppáhaldi hér á bæ enda ekki skrítið þar sem hann er bæði bráðefnilegur og skemmtilegur.



Þarna er eigandinn að athuga hvort það sé ekki allt með feldu hjá Krapanum.
Eins og þið sjáið þá fór vel á með þeim og alveg öruggt að Krapi þekkti eigandann vel.
Vonandi ber hann okkur þokkalega söguna.................hann Krapi.



Þetta par rakst ég líka á útá vegi þarna eru Anne og Muggur hress að vanda.

Annars er það helst að frétta héðan úr Hlíðinni að í dag var algjört hitamet miðað við að það er kominn 11 september. Hér komst hitinn í 22.5 stig svo að dagurinn var hreint yndislegur.
Mér var hugsað til þeirra sem að voru að smala í dag full heitt fyrir hesta, menn og tölum nú ekki um kindurnar sem alltaf eru í lopapeysunni.
Við erum búin að semja um gott veður næstu vikuna og sérstaklega næstu helgi, bíðum bara eftir formlegu svari.
Það er mikið riðið út þessa dagana enda hörkulið hér hjá okkur núna og fullt af skemmtilegum hrossum. Undirbúningur fyrir réttirnar er í fullum gangi svo það er í mörg horn að líta.
Húsfreyjan tekur rispur í bakstri á kvöldin og nær bara ágætis tilþrifum (að eigin áliti, svo kemur í ljós síðar hvort það á við rök að styðjast).
Er búin að baka sírópslengjur, formkökur, sítrónukökur, Frú Áslaugu og fleira.
Allt að gerast í Hlíðinni.................

Eins og þið hafið kannske tekið eftir höfum við sett inn nokkur ný söluhross og fleiri bætast við á næstunni. Svo erum við alltaf með fleiri hross til sölu sem að ekki hefur komist í verk að setja inná síðuna. Hvet ykkur til að fara inná Worldfeng og skoða hrossin okkar nóg að setja inn bæjarnafnið sem sagt frá ,,Hallkelsstaðahlíð,,

06.09.2010 21:58

Staðan í dag............



Þarna sjáið þið Guðdómlegan Hnappadal í baksýnisspeglinum mínum.

Já það getur verið nauðsynlegt að líta í ,,baksýnisspegilinn,, vega og meta stöðuna, rifja upp góðar stundir og gleyma þeim leiðinlegu. En það er víst eins gott að gleyma sér ekki við að horfa í spegill eins víst að maður keyri þá bara útaf.

Síðast liðinn fimmtudag var sónarskoðað hjá höfðingjanum Hlyn frá Lambastöðum eins og vænta mátti voru allar hryssurnar fylfullar. Dimma okkar var hjá kappanum og með 30 daga gamalt fyl. Allt undir,,kontrol,, hjá Eddu sem að klárlega er einn öruggasti sónarskoðari hér um slóðir og örugglega þolinmóðasti dýralæknir sem ég hef kynnst.
Við vorum í smá basli með að sannfæra eina hryssuna um að við værum traustsins verð og óhætt væri að láta okkur ná sér. Girðingin var stór og þýfð, hryssan stygg og við ,,rosalega,, hlaupaleg eða þannig.
Ég ætla ekki að segja ykkur hvernig þetta gekk en Edda og bláberin í stóðhestagirðingunni höfðu sem betur fer róandi áhrif á okkur svo að málið fékk farsælan endi.

Heldur betur hljóp nú snærið hjá húsfreyjunni þegar hún fékk sendingu af vestfjörðunum um daginn. Með öðrum orðum nú á ég fullt af dýrindis aðalbláberjasafti sem hressir, bætir og kætir. Þökk sé okkar góðu vinum í vestrinu.

Í gær smöluðum við stóðinu heim og tókum frá hóp af hestum sem að við vonumst til að geta notað í leitirnar. Útlitið benti ekki til þess að þau hafi liðið skort að undanförnu.
Þessar elskur hafa verið í fríi í nokkrar vikur en eru nú vonandi komin í stuð aftur.
Við fengum góða heimsókn úr Borgarnesi til stússa í þessu með okkur.
Takk fyrir komuna Þorgeir og co.

Nú er Anne okkar komin aftur og einnig hún Sandra frá Svíþjóð sem að ætlar að vera hjá okkur í viku. Duglegar og áhugasamar stelpur sem munar heldur betur um í öllu atinu.
Astrid kom heim í helgarfrí en er nú farin á vit ævintýranna noðrur í Eyjafjörð með hóp frá Landbúnaðarháskólanum á  Hvanneyri.






04.09.2010 22:42

Hólaútskrift 2010

 

 Hér á eftir kemur smá sýnishorn úr Hólaferðinni frá því í gær en svo getið þið líka smellt á ,,albúm,, hér á síðunni og séð meira.
Á þessari mynd eru tveir nýútskrifaðir reiðkennarar þeir Sólon Morthens og Sigvaldi Lárus Guðmundsson. Þeir hafa sem sagt lokið þriggja ár námi við skólann.
Aldeilis flottir í Félagsbúningi Félags tamningamanna, til hamingju drengir.




Hér koma þeir svo með sínum betri helmingum Þóreyju og Mörtu.
Báðir þessir reiðkennarar eru starfandi á suðurlandi Sólon í Hrosshaga og Sigrvaldi í Fellskoti.

Á reiðkennarabrautinni síðast liðinn vetur voru sjö nemendur en aðeins tveir mættu við útskrift.




Hér koma síðan ,,mínir,, Hólakrakkar Alma Gulla, Mummi og Halla María, gamla smelli sér með á myndina. En við söknuðum Helga sem stakk af í leitir.
Alma Gulla var að ljúka námi sem hestafræðingur og leiðbeinandi eftir eins árs nám en Mummi og Halla María útskrifuðust sem tamningamenn og þjálfarar eftir tveggja ára nám.




Sylvía Sigurbjörnsdóttir ,,bakaði,, strákana og náði bikarnum góða.
Á myndinni Árni Björn, Sylvía og Mummi.
Innilega til hamingju Sylvía sannarlega flottur knapi þar á ferðinni.




Svo sætar mæðgur.............mamman á nú heilmikið í þessu til lukku með stelpuna Fríða :)



Og hér koma ennþá fleiri monntnar mömmur og Hólakrakkar.
Til hamingju öll bæði mömmur og pabbar.

 

03.09.2010 23:45

Sýnishorn af útskrift.....



Þarna eru sætu Hólakrakkarnir mínir að útskrifast...............vantar bara Helga Eyjólfs.
Alma að útskrifast sem hestafræðingur og leiðbeinandi af fyrsta ári en Mummi og Halla María sem tamningamenn af öðru ári. Innilega til hamingju með áfangana elskurnar.

Ég sem sagt brunaði norður að Hólum í dag til að vera við útskriftina, er komin heim en frekar löt svo að þetta verður að duga í bili. Tók fullt af myndum sem að ég kem hér inná síðuna vonandi á morgun.



02.09.2010 11:16

Mikilvægar dagsetningar.



Tíminn líður hratt og óðum styttist í réttirnar svo það er eins gott að birta hér mikilvægar dagsetningar.
Farið verður í nauðsynlegan undirbúning á næstu dögum svo sem panta gott veður, huga að veitingum, dusta rykið af gítarnum og ýmislegt fleira........................

Fimmtudagurinn 16 sept smalað ,,inní hlíð og útá hlíð,, (skiljanlegt fyrir þá sem til þekkja)
Föstudagurinn 17 sept smalað Oddastaðafjall.
Laugardagurinn 18 sept smalað Hlíðar og Hafurstaðaland. Aðalsmaladagurinn.
Sunnudagurinn 19 sept réttað, vigtað og valið. Stóri kjötsúpudagurinn.
Mánudagurinn 20 sept sláturlömb rekin inn.
Þriðjudagurinn 21 sep lömb sett í slátur.

Hlökkum til að sjá ykkur og munum leggja okkur fram um að láta ykkur ekki leiðast.
Gott væri að heyra frá ykkur sem að eru væntanleg...............gott að vita hvort raða þarf uppá rönd eða stafla í gistingu.

01.09.2010 00:56

Jamm og jæja......


Allt í basli svo að það verður engin mynd á blogginu í kvöld, þið hugsið ykkur bara fallega mynd og segið mér svo afhverju hún er.

Stundum er ég hugmyndasnauð og á í mestu vandræðum með að finna eitthvað til að setja hér inn en núna hafði ég fullt af hugmyndum sem flestar voru nátengdar myndum.
Örugglega út af því að ég get ekki sett inn myndir núna. Bíður betri tíma.

Ég brá mér á kynningafund út að Breiðabliki fyrir stuttu, þar var Nýsköpunarmiðstöð Íslands að kynna verkefni sem að heitir Vaxtasprotar á Vestulandi.
Sannarlega sniðugt og skemmtilegt verkefni sem gaman væri að taka þátt í.

Ég var þó verulega hugsi eftir að hafa hlýtt á þetta góða fólk sem dældi á okkur hugmyndum um margt sem hægt væri að gera í sveitinni. Það rann upp fyrir mér sú gamal kunna staðreynd að líklega hefði ég yfirdrifið nóg að gera og þyrfti alls ekki að vera að þvælast af bæ til að fá fleiri hugmyndir.
Eftir að hafa verið hugsi í nokkurn tíma var ég öskureið já eins gott að þið hittuð mig ekki þá.
Það sem að erti mína ,,góðu,, lund var nefninlega það hvað það er ergilegt og fúllt að bændur séu alltaf í þeirri stöðu að þurfa að hugsa um að koma sér upp einhverri auka búgrein eða vinnu utan bús. Bændum vantar ekki vinnu þeim vantar tekjur góðir hálsar.
Til að gera langa sögu stutta og ykkur ekki graut fúl þá ætla ég að renna yfir nokkur starfsheiti sem að svona meðalbóndi verður að ráða við ef að allt á að fara vel hjá honum.

Bóndi = bóndi, trésmiður, járnsmiður, þúsundþjalasmiður, vélfræðingur, verkfræðingur, viðskiptafræðingur, lögfræðingur, markaðsfræðingur, fóðurfræðingur, jarðfræðingur, kynbótafræðingur, skipulagsfræðingur, dýralæknir, kjötiðnaðarmaður, kokkur, ræstitæknir og hagfræðingur. Bara svo eitthvað sé nefnt......................

Og að auki vera í góður formi andlega og líkamlega því að stundum bilar fjórhjólið og fýkur í frúnna.

  • 1