Færslur: 2010 Nóvember

29.11.2010 23:11

Aðventuannir..........



Eins og þið sjáið þá er jólaundirbúningur hafinn hér á bæ og þar sem að húsfreyjan hefur verið þó nokkuð upptekin að undan förnu, réð hún starfskraft í verkið.
Salómon svarti er liðtækur í margt.
Það er spurning hvort það var af nærsýni eða vandvirkni sem að kappinn var svona staðsettur við ,,vinnuna,, en allavega var áhuginn nægur.
Þegar vel liggur á okkur Salómon og rittíminn nægur ætlum við að deila með ykkur lífsreynslusögu.
Sagan er dramatísk, spennandi og með hrollvekjuívafi enda komumst við svo sannarlega í hann krappan.  Og erum við þó engir ,,kettlingar,,
Já njósnir, eftirför, flótti, neyðarkall og jafnvel enn alvarlegri mál koma fram í sögunni.........
Bíðið þið bara.............

Í dag var kíkt í ,,jólapakkana,, eins og það er kallað hér á bæ en það er  þegar Edda dýralæknir mætir á svæðið og sónar hryssurnar. Það er skemmst frá því að segja að allar hryssurnar sem að sónaðar voru og til stóð að væru fylfullar stóðust prófið.
Ég ætti nú að vera dugleg einhvern daginn og smella inn myndum af hryssunum og stóðhestunum sem eiga von á afkvæmum næsta vor.

Nú er hrútaskráin komin á náttborðið með gleraugun ofaná, svo að nú fara hlutirnir að gerast




29.11.2010 01:42

Örfréttir.

Góð helgi að baki þar sem farið var í skemmtilegt afmæli, árshátíð og matarboð.
Já alltaf gaman að hitta skemmtilegt fólk.
Afmælisveislan var hjá sextugum Svani sem að sló upp glæsilegri veislu með frábærum veitingum að hætti Kela verts á Görðum. Fyrrverandi borgarstjóri stjórnaði veislunni og fórst það afar vel, hagyrðingar fóru á kostum og múrarakórinn var flottur.
Virkilega gaman takk fyrir skemmtilega kvöldstund.

Flottar frænkur mættu líka í heimsókn um helgina ,,Hildirnar,, eins og ég kalla þær, hljómar samt ekki vel. En meiningin góð Hildur, E.Hildur, Ásthildur og Matthildur.
Nýbakað og flott af því tilefni í því efra.

Matarboð hjá yngra settinu í Skáney klikkar ekki, áttum skemmtilega kvöldstund þar með frábærum veitingum. Litli skemmtikrafturinn stóð sig líka vel og kunni vel að meta hversu auðvellt var að láta gestina hlæja eftir pöntun.

Skítmokstur var drifinn af föstudaginn og laugardaginn með góðri aðstoð ,,okkar,, manna.
Notaleg tilfinning þegar svona verkefni eru frá.

23.11.2010 22:46

Sparisjóður og vindurinn sem blæs............



Er ekki nauðsynlegt að smella inn svona vormyndum öðru hvoru með grænu grasi og blíðu ?
Svo gott fyrir sálina.
Þarna er hann Sparisjóður minn þegar hann var á gelgjualdrinum, alltaf kátur og ljúfur kallinn. Fyrir þá sem að ekki vita þá er Sparisjóður stóðhestur á fimmtavetur undan Gusti frá Hóli og Karúnu frá Hallkelsstaðahlíð. Sparisjóður var taminn þó nokkuð í fyrravetur en veiktist illa í vor og var í fríi í vor og sumar. Nú er hann aftur á móti kominn á járn og bara gaman hjá honum og þjálfaranum. Það eru til nokkur tryppi undan honum og sum bara nokkuð snotur með góðar hreyfingar og skemmtilegt geðslag.

Það er allt komið á fullt í hesthúsinu og það orðið fullt eins og vera ber á þessum tíma. Meðalaldurinn er ekki hár en skemmtanagildið er hátt og margt bara nokkuð spennandi.
Ungu tamningahrossin eru meðal annars undan Glym frá Skeljabrekku, Krafti frá Bringu, Baugi frá Víðinesi, Gosa frá Lambastöðum, Hersveini frá Lækjarbotnum, Blæ frá Hesti og Arði frá Brautarholti. Svo eru það söluhross og þjálfunarhestar sem margir eru undan góðum höfðingjum eins og Gusti frá Hóli, Hróðri frá Refsstöðum, Randver frá Nýja-Bæ, Stæl frá Miðkoti og nokkrum fleirum.

Á næstu dögum verður formlega gengið frá hrútaviðskipum ársins og lofa ég myndum af því tilefni. Eitt skyggir þó á þegar rætt er um hrúta á þessum bæ en Sindri minn Kveiksson er ennþá týndur. Eins gott að snúa útúr og  ,,trúa ekki því versta en vona það besta,,

Ég efast stórlega um að ég hafi greind til að kjósa til stjórnlagaþings svo sómi sé að svo  líklega sleppi ég því bara. Er samt á því að maður eigi alltaf að nota kosningaréttinn sérstaklega ef að maður er kona. Þannig að til þess að vera sjálfri mér samkvæm verð ég að reyna að vitgast stórlega þessa síðustu daga fram að kosningum.
Er reyndar nokkuð viss um að lítið muni koma útúr þessu veseni og finnst að margir frambjóðendur hafi verið orðnir svo æstir að komast í framboð í ,,einhverju,, að þeir hefðu gripið tækifærið óháð málefnum. En vafalaust er þetta allt hið vænsta fólk.
Annars er margt sem að ég ekki skil.................ætla að deila nokkrum atriðum með ykkur.
Í kvöld hlustaði ég á fréttirnar á Ruv þar var rætt við ráðherra sem að taldi það mikla gæfu að flytja málefni fatlaðra til sveitafélaganna. Ekki ætla ég að leggja mat á það en sperrti eyrun þegar hann dásamaði hversu gott það væri að hafa þetta allt í ,,nærumhverfinu,, flytja málefnið ,,heim,, ................eitthvað svo notalegt.
Einhverntímann heyrði ég að nálægðin væri versti óvinur lítilla samfélaga, kannske hef ég bara misskilið.
Annað mál hef ég sennilega líka misskilið...................mér finnst ég oft hafa heyrt fólk tala um það með talsverðu þjósti og í leiðinda tóntegund að eitthvað sé í ríkiseigu.
Svo nefnir þetta sama fólk atriði sem að best væru komin í þjóðareign ( orðið þjóðareign er þá gjarnan sagt lágt og í mjög ljúfum tóni)

Mín niðurstaða er að einhvers misskilnings gæti jafnvel meðal annara en mín.

Ríkiseign og þjóðareign ?????????? 

Nærumhverfi og ,,heima við hjá fólkinu,, ????

Amma sagði stundum ,, svona eins og vindurinn blæs,, góða.

Hvað finnst ykkur?





16.11.2010 22:57

Hún er vinsæl og veit af því



Sumir eru hreinlega vinsælli en aðrir...............hún Golsa á allavega marga vini og aðdáendur.

Um síðustu helgi komu nokkrir af vinum Golsu í heimsókn og í tilefni dagsins fékk hún pela.
Golsa er geðprýðis kind þó svo að hún sé með allt sitt algjörlega á tæru og svona heimsóknir kann hún vel að meta. Það eru aðallega þrengslin í réttunum og svoleiðis óþægindi sem að henni falla ekki vel í geð. Eins geta bæði smalar og smalahundar verið ansi þreytandi að hennar mati enda veit hún alveg hvar helstu nauðsynjar eru og er fullfær um að finna þær.
Þar sem að tími jólaklippinga í fjárhúsunum stendur sem hæst var upplagt að Golsa fengi klippingu á meðan aldáendurnir voru í heimsókn. En fyrst varð hún náttúrulega að fá pela.

Ég smelli nokkurum myndu af viðburðinum og setti þær hér inná síðuna undir myndaalbúm.
Eins eru líka nýjar myndir af þeim Snotru og Badda í myndaalbúminu.

15.11.2010 09:23

Snotra og Baddi frændi



Snotra mín og Baddi frændi úr Garaðabænum............vá hvað þú ert flottur frændi.

Baddi er fæddur hér í Hlíðinni undan gömlu Snotru minni og Rebba sem að lengst af bjó í Hundadal. Baddi flutti í Garðabæinn ungur að árum og hefur átt þar draumaævi hjá Erlu Guðnýju og fjölskyldu.
Hann er samt alltaf kátur að koma í heimsókn á æskuslóðirnar og fá smá útrás.



Og svo smá sirkus á hestasteininum í sólinni.

Ég set inn fleiri myndir af Snotru og Badda við tækifæri.

Við fengum góða heimsókn um helgina og var ýmislegt brallað en það er alveg klárt að Golsa heimalingur var í aðalhlutverkinu.
Myndir frá því koma inn þegar ég hef meiri tíma.

Alltaf nóg um að vera á næstunni stendur til að klára aftekningar, skítmokstur og  fundir eru á döfinni, tamningar og margt fleira.

12.11.2010 21:42

Veturinn er kominn



Æi það hefur verið svo leiðinlegt veður hér í Hlíðinni að undan förnu að mér fannst vel við hæfi að setja inn vormynd.
Þarna eru mæðgurnar Karún og Auðséð Sporðsdóttir að sóla sig og smakka á græna grasinu.

Um síðustu helgi var tekin sú ákvörðun hér á bæ að taka elstu folöldin undan og setja þau inn.
Yngstu folöldin fá að vera lengur með mæðrum sínum hér heima á túni. Ekki er annað að sjá en að allt gangi vel og eru allir að verða nokkuð kátir þó að mæðurnar séu farnar.
Veturgömlu tryppin voru tekin sér og hafa tún og rúllu útaf fyrir sig.
Nú hafa allir hestar hér í Hlíðinni fengið vetrarormalyfið sitt og ættu því að vera í góðum málum.

Síðustu dagar hafa verið járningardagarnir miklu hjá Mumma og nú er allur hópurinn að verða kominn á skafla, ekki veitir af.

Ég hef aðeins verið að ,,spjalla,, við litla vin minn hann Kát Auðsson síðustu daga til að kynnast honum betur. Kátur er styggari en afkvæmi Karúnar hafa verið en viðmótið svipað. Hann er svolítið efins um að ég sé eitthvað áhugaverð og finnst þessar heimsóknir í stíuna hans frekar þreytandi og tilgangslausar. Sennilega hálfgert kellingatuð.

Ég fékk góðar fréttir af Glotthildi sem að nú sprangar um í Svíaríki og hefur það greinilega mjög gott. Gaman af því.

Í dag kom ein af óheimtu kindunum í leitirnar og með í för var lamb sem hafði komið heim fyrr í haust en stungið svo af á vit ævintýranna.
Þá er hægt að skrifa mínus tveir á blaðið góða.
Rúningur potast áfram en slatti reyndist eftir þegar síðasta talning fór fram í dag.

09.11.2010 22:57

Smá..........



Nú er að verða síðasta tækifæri hjá kindunum þetta árið að njóta veður blíðunnar útá túni.
Dágóður skammtur er tekinn inná hverjum degi og klipptur en tíminn fer líka í margs konar stúss.
Í gær heimtum við tvílembu sem að Flosi bóndi á Emmubergi fann, alltaf ánægjulegt þegar fækkar á listanum. En ég bíð enn og vona að Sindri minn komi í leitirnar.

Hér kemur ein mynd úr gamla safninu sem ég er svo upptekin af um þessar mundir.



Já það leynist ýmislegt í safninu, þarna er mynd af Hótel Víkingi sem sigldi á vatninu 1964 og 1965. 

07.11.2010 23:01

Kátur minn og ýmislegt fleira



Þarna er hann Kátur, alltaf svo sjarmerandi auga sem kemur frá henni Karúnu minni.



Þarna er Kátur með vini sínum úr Borgarnesi.



Tómas á Kistufelli  skilaði folunum í ljómandi standi alveg hægt að mæla með góðri þjónustu þar á bæ.
Og ekki var nú amalegt að fá sér göngutúr í Lundareykjadalnum þegar folarnir voru sóttir, algjör blíða.

Í dag komu þrír synir Hersveins frá Lækjarbotnum í tamningu, fjallmyndarlegir og spennandi folar þar á ferð. Það er alltaf svo gaman að fá hross í tamningu undan hrossum sem að við höfum ekki kynnst áður.

Í gær byrjuðu feðgarnir að klippa féð og er þó nokkur fjöldi kominn með ,,haustlínuna,,
Já það er eins gott að tolla í tískunni jafnvel þó maður sé bara rolla.

Fyrir stuttu fór einn kynbótahrútur frá okkur það var mókollóttur garpur sem að hlaut nafnið Lokkur Hlíðar frá Hallkelsstðahlíð. Til lukku með kappann Benni og Sigga.
Vonandi verður hann sér og sínum til sóma á nýjum slóðum.



Þá eru það þessar gömlu..................



Og þá er komið að gamla bæ dagsins hvar stóð þessi bær í Kolbeinsstaðahreppi???

05.11.2010 23:07

Gamlar myndir með nýjum fréttum



Þessi mynd var tekin fyrir ,,nokkrum,, árum sko þegar ég var ung og Gjósta folald.

Í dag var brunað uppí Lundareykjadal nánar tiltekið að Kistufelli en þar hafa þrír folar verið í geymslu hjá Tómasi bónda í sumar. Ég tók nokkrar myndir en tæknin var eitthvað að stríða mér svo að ég verð sennilega að bíða eftir að tæknimaður heimilisins komi heim og bjargi málunum. Folarnir sem þarna voru í geymslu eru Kátur sonur Auðs frá Lundum og Karúnar, Léttlindur sonur Hróðs frá Refsstöðum og Léttar og Blástur sonur Gusts frá Hóli og Kolskarar. Þeir litu ljómandi vel út og höfðu greinilega haft það gott hjá Tómasi bónda.
Myndir koma síðar.



Ég og Þóra frænka mín með tvö lömb sem að ég held hafi verið undan henni Heimalingsgolsu minni. Takið eftir uppstillingunni myndin gæti heitið ,, snúum bökum saman,,

Þar sem að ég hef safnað að mér fullt af gömlum myndum sem að ég er að manna mig uppí að setja hér inní albúmin ætla ég að koma með smá sýnirhorn.
Byrja á mér og mínum svo að þetta valdi ekki titringi............



Hér er svo annað hús sem að eitt sinn stóð í Kolbeinsstaðahreppi, vitið þið hvar?

04.11.2010 22:49

Glotthildur flutt og margt fleira.



Ungfrú Glotthildur Glottadóttir......................

Gleðifrétt úr Hlíðinni,  nú hefur hún Glotthildur eignast nýjan eiganda og er flutt til Svíþjóðar.
Þó svo að það geti verið erfitt að kveðja góða gripi þá er gaman að geta komið sér upp góðum fulltrúum á erlendri grundu.
Ég efast ekki um að Glotthildur á eftir að verða sér og sínum til sóma í framtíðinni.
Til hamingju með Glotthildi Helen.

Nú er veturinn kominn hingað í Hlíðina og kom að sjálfsögðu á óvart eins og alltaf. Einhvern veginn er það alltaf svo að fleira er á dagskrá en hefst af eða er það bara svoleiðis hjá mér ?
Það er alltaf góð tilfinning hér á bæ þegar búið er að ganga frá kjöti og allt sláturstúss er að baki. Í gær var rekinn enda hnúturinn á það þetta árið og að sjálfsögðu komu okkar góðu hjálparhellur við sögu eins og síðustu árin. Takk fyrir hjálpina telpur.
Já það er frábært þegar þetta er frá og nú á bara hangikjötið eftir að fara í reyk en það ,,slakar,, nú á í pæklinum.

Næst á dagskrá er svo að fara að taka inn og  klippa fé, lömb og hrútar eru komin inn.
Þessa dagana standa yfir róttækar rannsóknir á heimtum og eru niðurstöðurnar ekki góðar.
En kannske er þetta bara það sem að við sauðfjárbændur verðum að venja okkur við í framtíðinni ? Allavega hefur ekki verið smalað meira og betur hér um slóðir í langan tíma.
Og ekki getur talist líklegt að tófur verði veiddar á næstunni svona miðað við fréttirnar í gær.
Annars er áhugi á lambakjöti mjög mikill um þessar mundir og þá ekki bara hjá okkur, ESB og tófunni.
Lagannaverðir hafa jafnvel meiri áhuga á hvernig lambakjöti reiðir af eftir bílveltur en fólkinu sem ferðaðist með það.
Fyrsta spurning þegar einn mætti á staðinn......... er ,,það,, stimplað???? síðan hvernig hafið þið það ? ...........
Það er gott að við í þessum sveitum eigum ekki svona löggur.

Gamalt og gott.



Jæja hvaða bær í Kolbeinsstaðahreppi er þetta ???

Á næstunni ætla ég að setja hér inn gamlar og skemmtilegar myndir sem hafa verið skannaðar. Myndirnar eru af mannlífi í Hnappadal langt aftur á síðustu öld en sumar nýrri og ótrúlega fyndnar fyrir þá sem til þekkja.

02.11.2010 14:30

Tryggðarannáll



Á þessari mynd er Tryggð með son sinn Andra sem fæddur árið 2010.

Fréttir eru ekki alltaf skemmtilegar því miður en það er einmitt svoleiðis frétt sem að ég ætla að deila með ykkur núna.
Síðasta laugardag snögg veiktist hryssan mín hún Tryggð og þrátt fyrir að fljótt hafi verið brugðist við og allt gert til að bjarga henni tókst það ekki. Tryggð var önnur hryssan sem að fárveikist svona hjá okkur í haust en hryssan Bráðlát sem veiktist fyrst hresstist og hefur nú náð góðri heilsu. Ég verð að játa að hér á heimilinu er að verða mikið stress í gangi þar sem að eftirlitið hefur verið mjög gott og allt gert til að fyrirbyggja hrakfarir.
En svona er bara veruleikinn í dag góðir hesteigendur eins gott að halda vöku sinni.
Það var skrítin tilviljun að þegar ég kom heim frá reglubundnu eftirliti í folaldshryssuhópinn sl. föstudag var það í fyrsta sinn í langan tíma sem mér fannst allt vera í besta lagi.



Þessi skemmtilega mynd var tekin í vor þegar hryssurnar voru reknar heim og snyrtar.
Hrefna Rós frænka mín að fá lánaða mjúka lokka hjá Tryggð sem tók því með jafnaðargeði sem að var hennar helsta einkenni.



Hér eru ,,tryggir,, vinir og mæðgin Tryggð með son sinn og Hágangs frá Narfastöðum Trygg.



Fáséð frá Hallkelsstaðahlíð er dóttir Tryggðar og Baugs frá Víðinesi hún kom inn fyrir stuttu og er nú byrjuð í tamningu.

Tryggð var fædd árið 1994 undan Tign minni frá Meðafelli og Kjarval frá Sauðárkróki.

Afkvæmi Tryggðar eru: Vetur sonur Hlyns frá Lambastöðum, Flakkari sonur Nasa frá Lambastöðum, Ragna dóttir Arðs frá Brautarholti, Viðja dóttir Faxa frá Hóli, Fáséð dóttir Baugs frá Víðinesi, Tryggur sonur Hágangs frá Narfastöðum og Andri sonur Hlyns frá Lambastöðum sem sagt albróðir Veturs.

Já mörg er búmanns raunin en svona er lífið og við verðum að taka því.

  • 1