Færslur: 2009 Febrúar

28.02.2009 00:52

Ófeigur og Þorri.





Þetta eru Ófeigur og Þorri þeir eru fæddir 25 janúar 2009.
Þið getið skoðað fullt af nýjum myndum af þeim hér á síðunni undir hnappnum ,,albúm,,
síðar ætla ég að segja ykkur meira um þá bræður.




27.02.2009 23:12

Fimleikar og ýmislegt fleira.






Þetta er hann Léttir hann er sonur Randvers frá Nýja-Bæ og hennar Sunnu okkar.

Einn frambjóðandi í viðbót kom hér í dag hann drakk með mér morgunkaffið og spjallaði um daginn og veginn. Gaman að fá allar þessar heimsóknir, en þess ber að geta að ég er ekki haldinn valhvíða þrátt fyrir úrvalið. Er búinn að raða þessum flottu frambjóðendum í sín sæti svona fyrir mig. Fer svo á fund á sunnudaginn og staðfesti þessa uppröðun mína.

Mummi kom heim frá Hólum í gær alltaf jafn gaman að fá hann heim. Hann er í löngu helgarfríi og byrjar ekki aftur í skólanum fyrr en á þriðjudaginn.

Við vorum í ströngum æfingum í dag, sætisæfingum, leiðtogaæfingum, fimleikaæfingum já (bannað að hlæja) og svo mætti áfram telja. Verð sennilega að byrja á teyjuæfingum í fyrramálið ef að ég á að geta hreyft mig eðlilega síðdegis.
Alltaf sama niðurstaðan eftir svona æfingar, rosalega held ég að það sé gaman á Hólum.
Það var svo gaman í hesthúsinu að húsfreyjan fór ekki heim að elda fyrr en rúmlega átta svo að steikti fiskurinn var ekki snæddur fyrr en klukkan var langt gengin í tíu. Bara fínn tími fyrir kvöldverð svona stundum.




26.02.2009 23:00

Sá ekki aðþrengdar vinkonur mínar.




Í dag kom hann Jan vinur okkar frá Slóveníu til landsins hann ætlar að vera hér í nokkrar vikur skoða og prófa hross einnig að rifja upp hvernig var að vera í atinu með okkur.
Það er svo gaman þegar þessir frábæru krakkar ,,okkar,, koma í heimsókn.

Ég var á miklum þeytingi í dag gleymdi lyklum, týndi síma, mætti of snemma, kom of seint og ýmislegt fleira sem er ekki prennthæft. En svona eru bara sumir dagar allavega hjá mér. Verst af öllu var samt að gleyma ,,bestu,, vinkonum mínum aðþrengdum eiginkonum. En það er svo sem allt í lagi ég horfi bara á kellurnar í kringum mig og lít í eigin barm fram að næsta þætti. 
Ég hef alltaf nóg að gera sama hvort það er venjulegur dagur eða óvenjulegur dagur. En það versta er dagurinn er alltaf búinn löngu áður en ég er búin að því sem ég ætlaði að gera. Þannig var það í dag.

Þorri og Ófeigur fengu góða heimsókn í kvöld, önnum kafinn frambjóðandi úr Reykjavík gaf sér tíma til að renna með börnin í sveitaferð. Hvolparnir voru aðalnúmerin og mjög ánægðir með alla athygglina. Ég lofa frumsýningu á hvuttunum hér á síðunni um helgina því Mummi og myndavélin eru komin heim frá Hólum.


25.02.2009 23:11

Fambjóðendur - kjósendur





Dagurinn var bara góður eins og flestir aðrir, reyndar leiðinda veður fyrripartinn en skánaði svo undir kvöldið. Mikið riðið ,,út,, inni járnað og ýmislegt fleira gert sem passaði í svona veðri.
Fyrirmyndarhestur dagsins var hún Jara Kjarnadóttir þrælefnileg hryssa.
Þetta var líka dagurinn sem að frambjóðendur komu í heimsókn gott að hafa ekki langt á milli svo að maður hafi samanburðinn. Annar kom og spjallaði yfir ,,sprengidagsbaunasúpunni,, sem borðuð var í dag sökum anna húsfreyjunnar í gær og hinn kom í kvöldkaffi. Ég raðaði þeim í fyrsta og annað sæti ekki amalegt dagsverk það. Kannske koma 3 og 4 sætið á morgun hver veit?
Nýr hestur kom líka í hesthúsið í dag eftir langt ferðalag og meira að segja siglingu.
Það verður spennandi að sjá hvernig hann verður.

22.02.2009 20:29

Salómon notar Porche og konubolludagurinn.




Salómon hefur einfaldan og látlausan smekk því velur hann Porche til að gá til veðurs.

Í dag byrjar Góan sumir kalla það konudaginn en hjá mér eru allir dagar konudagar svo þetta var bara venjulegur dagur. Góður Góudagur.emoticon

Í gær fór ég inní Búðardal að dæma vetrarmót hjá þeim Glaðsmönnum, gott mót og margir góðir hestar. Skemmtilegt þegar að vetrarmótin eru ekki bara töltmót heldur líka keppt í fjórgangi, um að gera að nýta ferðin þegar að fólk þarf að koma langt að eins og er hjá mörgum hestamannafélögunum á landsbyggðinni. Leit við hjá góðum vinum og skoðaði í nokkur hesthús. Alltaf gaman að koma í Dalina.

Einn höfðingi fór úr hesthúsinu í dag og um leið kom ný dama sem er nú öllu fyrirferðameiri en mjög spennandi. Hestar með stórbrotinn persónuleika eru alltaf heillandi.
Tveir vaskir Skagfirðingar komu í heimsókn til okkar í gær, gistu í nótt og tóku út bændur og búalið í dag. Við sýndum þeim nokkur vel valin spor á völdum gripum áður en þeir smelltu sér norður aftur.
Takk fyrir komuna drengir.

Við vorum boðin í ,,bollukaffi,, uppí ,,efra,, um miðjan daginn, ljómandi fínt að taka svona forskot á sæluna. Ég var að rifja upp skemmtilegar minningar frá því ég var ung (yngri en í dag emoticon ) og notaði bolluvönd. Forlátan bolluvönd framleiddan af henni Siggu sem var vinkona Fríðu frænku minnar. Fríða sá alltaf um að við frændsyskini hennar ættum svona verkfæri. Á bolludagsmorgun dreif ég mig á fætur til að ná örugglega að flengja alla á heimilinu. Mér hafði verið talin trú um að ef að ég næði þessu ekki þá væri ekki víst að ég fengi bollu. Seinna komst ég að því að þetta væri óþarfa fyrirhöfn og ég gæti alveg fengið bollu án teljandi vandræða. En bolluvöndinn fallega á ég enn.

Takk fyrir allar heimsóknirnar í vefgluggann okkar og munið endilega eftir að skrifa í gestabókina.





17.02.2009 21:31

Rok og rigning - keppni og pappír.





Það er matartími.......

Það var rok og rigning í dag ég var inni að róta í pappírum og vinna bókhald.
Hlustaði á útvarpið með öðru eyranu, mikið rosalega eru fréttirnar annars þreytandi og ég sem er algjör fréttafíkill. Eftir að hafa hlustað á fréttirnar á klukkutíma fresti frá því í morgun er ég orðin viss um að það gerist ekkert jákvætt í veröldinni lengur. Kannkse er það staðreynd, en er alveg nauðsynlegt að segja okkur það svona oft?
Jú, jú að sjálfsögðu gerist fullt af  jákvæðum hlutum það eru bara ekki til fréttamenn sem þora að segja okkur það. Þannig að við verðum bara að passa okkur á því að muna eftir hvað margt er gott í veröldinni. Rok og rigning  er ágætis blanda allavega þegar maður er inni í bókhaldi. Og þetta var bara ljómandi dagur.

Á laugardaginn skruppum við upp að Miðfossum þar sem haldið var vetrarmót Faxa, heilmargar skráningar og fullt af fólki. Keppnin var færð inní reiðhöllina því ísinn var ekki talinn góður. Skúli keppti á honum Gosa og gekk þeim félögum bara nokkuð vel komust í úrslit og höfnuðu síðan í 4 sæti.
Sunnudagurinn bauð uppá vorblíðu en fína útreiðafærið sem verið hefur undanfarið er farið.
Skjöldur vinur okkar er farinn heim þar mun hann melta námsefni liðins mánaðar. Ég sakna hans úr hesthúsinu skemmtilegur persónuleiki sem á örugglega bjarta framtíð sem fyrirmyndar reiðhestur.

Hér á síðunni hef ég verið með könnun í gangi þar sem ég var að kanna hvað fólk teldi mikilvægasta eiginleika reiðhestsins. Í ljós kom að tölt, vilji og geðslag eru þeir eiginleikar sem að flestir telja eftirsóknarverða. Þetta kemur ekki mikið á óvart og staðfestir að flestir vilja geðgóðan og viljugan töltara sem reiðhest.

17.02.2009 01:08

Hugleiðingar um dómaramál.


Var að koma heim af endurmenntunnarnámskeiði íþróttadómara. Hefði viljað fá meiri fróðleik og fyrirlestra eins og í fyrra, en það er ,,kreppa,, svo að það hefur ef til vill verið ill framkvæmanleg. Ekki margir sem fá að dæma það mikið að þeir vilji leggja í mikinn kostnað til að halda réttindunum. Það er mjög slæmt og tel ég það ákveðið áhyggjuefni hvernig þessum málum er háttað. Alvarlegast er þó hvað það er erfitt að koma á einhverju skipulagi varðandi úthlutun dómara á löglegmót sem haldin eru eftir reglum LH. Eðlilegast og það sem talað hefur verið fyrir af stórum hópi dómara og knapa er að úthlutun á öll löglegmót fari fram í gegnum LH eða dómarafélögin. Með því að gera það að skildu að dómurum sé úthlutað í gengum LH eða dómarsfélögin aukum við trúverðuleika og auðveldara verður að gæta hlutleysis þegar sami háttur er hafður á við öll mót. Úthlutað yrði á hvert mót með góðum fyrirvara og þess gætt að ekki dæmdu alltaf sömu dómarar hjá hverju félagi. Við úthlutun væri nauðsynlegt að sem flestir dómarar fengju að spreyta sig og þannig gert keift að fá reynslu. Góð menntun, mikil reynsla, samviskusemi og heiðarleiki eru þeir kostir sem prýða þurfa góðan dómara. Þessa eiginleika þurfum við að leggja rækt við og efla til þess að þeir sem leggja margra mánaða og ára vinnu í hendur dómara fái réttlátan dóm. Dómarar þurfa æfingu hana fá þeir ekki nema að vera virkir og nái að dæma nokkur mót á hverju ári.
Hestamennskan er harður heimur leggjum okkar af mörkum til að gera dómgæsluna faglega,heiðarlega og þannig að við öll getum verið stolt af.

16.02.2009 23:00

Smalinn á Hólum.


Jæja þar sem ég hef ekki verið duglegur að setja inn fréttir frá Hólum ákvað ég að skella inn einni dagbókarfærslu sem við eigum að skrifa á hverjum degi. Þetta er sem sagt dagbók fyrir nemenda hestinn minn hann Fannar. Vonandi skiljið þið hvað ég er að fara, en við notum fullt af hlutum og aðferðum sem ég nefni þarna eins og þið séuð búin að lesa dagbókina frá upphafi.

16.02.09

Markmið tímans: æfa okkur fyrir smala prófið.

Ég byrjaði á því að teyma Fannar um höllina og sína honum allt sem fyrir augu bar. Síðan byrjaði ég á að teyma hann upp á pallinn sem búinn er til úr brettum og var nú í fyrsta sinn orðinn þrjár brettahæðir. Hann labbaði rakleitt uppá pallana og þá losaði ég gjörðina á honum til að gefa honum umbun fyrir að fara þarna upp. Með því að losa svona gjörðina náði ég að gera þetta annars litla svæði að þægilegum stað og fannst honum bara nokkuð gott að vera þarna fyrst hann fékk umbun! Svo næst kastaði ég gærunni nokkrum sinnum í hann á alla mögulega og ómögulega staði og var hann alveg salla rólegur við það. Þá skellti ég mér á bak og prófaði að fara í að opna og "reyna" að loka hliðinu. Það gekk ekki alveg eins og ég hefði viljað svo ég verð að taka mér meiri tíma í það næst. Svo fór ég að boltanum og fór að reyna að koma honum á milli hringpunktanna  sem gekk bara furðu vel að mér fannst. Fannar er farinn að leyfa mér að drippla boltanum við hliðina á sér meðan ég er á baki, síðan hjálpaði Ísó mér við að drösla boltanum með mér á bak og var Fannar bara salla rólegur með það. En býsna erfitt verður að koma boltanum rétta leið þar sem hann lætur ekki alveg af stjórn og fótboltahæfileikar Fannars ekki alveg nógu góðir!:/ en það kemur hjá okkurJ Svo skeltum við okkur í að hoppa yfir tunnurnar í fyrsta skiptið með mig 100kg manninn á bakinu. Hann var aðeins smeykur fyrst enda ekki við öðru að búast þegar á að hoppa með svona ,,léttavarning,, yfir tunnur. Hann sveigði frá í fyrstu skiptin og við hittum ekki á tunnurnar. En þá kom Ísó okkur til bjargar og stóð við endann á tunnunum þannig að það var ekki um annað að velja en að fara á tunnurnar. Fyrsta stökkið enduðum við á maganum vegandi salt ofaná tunnunni, en svo í næsta stökki lenti ég á spari stellinu í hnakknum og verð víst bara að taka afleiðingunum af því. Þá kom að þriðja og okkar besta stökki þennan daginn og tókst það bara nokkuð vel!:) Svo var komið að lambinu ljúfa sem reiða þarf á tölti yfir tré ramp á tölti. Ég náði í lambið af gólfinu og gekk það bara furðu vel í dag að síga út á hlið hestsinns og ná því uppá. Svo var slegið í og riðið á tölti yfir og stöðvað hinumegin við pallinn og lambið lagt mjúklega niður svo ekki myndi það merjast. (eða eins og Ísó segir gjarnan "lítið fæst fyrir marið lamb")

Þetta var þræl fínn tími og gekk bara nokkuð vel miða við það sjokk í morgun sem við fengum þegar okkur var gerð grein fyrir kröfum í tveim næstu reiðmennsku prófum sem eru ekkert lilla dæmi!!

Jákvætt: Fannar var rólegur og yfirvegaður, flest gekk upp.

Það sem þarf að bæta: Verð að æfa mig meira í að opna og loka hliðinu í næstu tímum.




13.02.2009 23:05

Hóladrengir Mummi og Vinningur.




Hér sjáið þið Mumma og hann Vinning minn Gautason hann fór ,,brokkandi,, norður að Hólum eftir áramótin en er bara farinn að stíga vel í spari ganginn. Mér sýnist fara vel á með þeim félögunum í það mynnsta á þessari mynd.emoticon

Annars er allt gott úr Hlíðinni færið og veðrið undan farna daga hefur verið gott og þá sérstaklega í gær. Vildi sko fá fullt af svoleiðis dögum.
Fyrirmyndarhestur gærdagsins var Freyja Hlynsdóttir, hún var síðasti hestur dagsins hjá mér og toppaði alla sem ég hafði farið á fyrr um daginn. Hennar tími var í gær.
Í fyrra dag fórum við uppí stóð og sóttum þrjú hross Skilding sem er að fara í skóla með einum vini okkar, svo Snerpu og Vörð sem eru komin í biðsalinn og koma inní hesthús fljóttlega.

Í dag fengum við góða gesti úr Gnúpverjahreppi með þeim fórum við í smá bíltúr um sveitina og skoðuðum búskapinn á nokkrum bæjum. Alltaf gaman að skoða búskapinn hjá góðum sveitungum.

11.02.2009 20:59

Létt(ir) fundir og fé.




Myndin sem birtist með blogginu mínu í kvöld er af henni Létt frá Hallkelsstaðahlíð, hún er 1 verðlauna hryssa undan Randver frá Nýja-Bæ og Sunnu frá Hallkelsstaðahlíð. Létt hefur átt tvö afkvæmi Léttfeta sem er geðþekkur 4 vetra foli sem varð til með frjálsum ástum í annari sveit þegar Létt var ung og haldin mikilli þörf fyrir útrás. Hennar útrás varð sem sagt til góðs svona þegar reiði eigandans var frá. Hún er því ekki raunverulegur útrásarvíkingur nútímans. Hitt afkvæmið er hann Léttlindur fallega skjóttur foli undan Hróðri frá Refsstöðum. Létt er núna fylfull við Arði frá Brautarholti.

Þessi vika hafði uppá heila 3 langa fundi að bjóða sem er aldeilis nóg þegar frúin vill vera heima að ríða út. En þetta voru alveg ágætir fundir og sumir bara nokkuð skemmtilegir fyrir utan það að vera gagnlegir. Alltaf gaman að hitta skemmtilegt fólk.

Allt gott að frétta úr hesthúsinu en rosalega var nú kalt að ríða út í dag frost og töluverð gjóla, var samt fínt á móti sólinni. Inni aðstaðan okkar í hlöðunni kom sér líka vel í dag eins og marg oft áður. Fyrirmyndarhestur dagsins var Kollhúfa hún hélt hita á Helga í frostinu í dag.emoticon

Ófeigur og Þorri stækka og stækka og stækka veit ekki hvar þetta endar, eru farnir að sjá og labba. Þó er göngulagið ekki sérlega reffilegt ennþá, mynnir helst á menn sem eru alveg að verða búnir að skemmta sér nóg.

Ný frétt......

Á mánudaginn fór sveit vaskra manna í Bakkamúlann og fann þrjár kindur. Kjartann á Dunk fékk kind með lambi og við fengum eina vetur gamla kind.
Allar kindurnar litu vel út miðað við árstíma. Ekki sem verst að heimta á þessum tíma betra seint en aldrei. Takk vösku sveinar.
 

08.02.2009 22:36

Skúta + Gaumur = eitthvað spennandi





Við bloggið mitt í dag er mynd af henni Skútu frá Hallkelsstaðahlíð, hún er 1 verðlauna hryssa í eigu sonar okkar Guðmundar Margeirs. Faðir Skútu er Adam frá Ásmundarstöðum og móðirinn hún Trilla okkar. Skúta er mikill höfðingi og hestagullið hans Mumma. Skúta hefur átt eitt afkvæmi hana Snekkju litlu Glottadóttur, bráð lipurt og hreyfingafallegt tryppi. Hún vann folaldasýninguna hjá Hrossvest sem haldin var í Söðulsholti í vetur og getið þið séð myndir af henni hér á síðunni og eins með því að smella á ,,söðulsholt,, undir tenglar til hægri á síðunni. Núna er Skúta fylfull við honum Gaumi frá Auðsholtshjáleigu og verður spennandi að sjá hvað kemur þar.

Helgin var alveg ljómandi góð, þorrablótið heppnaðist með allra besta móti og allir skemmtu sér vel og sumir lengi. Maturinn var besti þorramatur sem ég hef smakkað verð að nefna heita saltkjötið og súrmatinn, vel súr og ekkert vatnsbragð...........ummmmmmmmmmm.
Og til fróðleiks (hef engra hagsmuna að gæta) maturinn var frá Módel Venus við Borgarnes.
Morguninn eftir reif frúin sig upp og fór í Borgarnes að dæma ístölt sem haldið var á Álavatni. Þar var prýðisþáttaka og margir flottir gæðingar að keppa, spennandi að fylgjast með hverjir eru nú líklegir fjórðungsmótskeppendur.

Félagarnir Ófeigur og Þorri dafna vel og þurfa endilega að smella sér á vigtina einhvern daginn svo að þið getið ímyndað ykkur hvaða hlunkar þeir eru orðnir. Annars voru þeir að knúsa ljóskur í gær, sofnuðu báðir umvafnir ljósu hári fyrir framan sjónvarpið. Örugglega einhverjir sem hefðu öfundað þá.

Þorrablótsgestirnir týndust svo í burtu sumir í gær en aðrir í dag, við fórum að ríða út og nú fer allt í sinn vana gang. Mummi farinn á Hóla og bara við gamla settið og Helgi eftir heima og já náttúrulega Salli draumaprins líka.


05.02.2009 23:36

Kolla mín og danskur dagur




 

Ég er alltaf að reyna að standa mig í því að bæta inn upplýsingum á vefgluggann okkar.
Í dag setti ég myndir inná ,,hrossarækt,,af nokkrum hryssum sem við notum í ræktun. Hér með er mynd af henni Kollu minni sem heitir fullu nafni Kolskör frá Hallkelsstaðahlíð. Hún er 1 verðlauna hryssa undan Dósent frá Brún og Karúnu frá Hallkelsstaðahlíð mikill uppáhalds gripur hjá húsfreyjunni. Kolskör hefur átt tvö afkvæmi Hlíð sem er móvindótt hryssa undan Glymi frá Skeljabrekku og svo Blástur undan Gusti frá Hóli. Núna er hún fylfull við Adam frá Ásmundarstöðum. Spennandi..................

Nú hafa báðir hvolparnir hennar Deilu fengið nafn, að sjálfsögðu heitir hann Ófeigur bara Ófeigur. En nú hefur hinn hann Þorri litli fengið nafn, hann fæddist jú á Þorranum. Þeir dafna ljómandi vel og fara bráðum að sjá.

Í gær hringdi hún Astrid vinkona okkar frá Danmörku, hún var hjá okkur í haust og vetur og var að kanna hvort allt væri ekki í góðu lagi. Þennan sama dag fengum við líka bréf frá honum Per sem er danskur vinur okkar, þannig að þessi dagur var eiginlega ,,danskur,, Alltaf gaman að heyra frá góðum vinum. Takk Astrid og Peremoticon

Á morgun er þorrablótið okkar í Lindartungu, fullt af fólki að koma og við alveg að smella í gírinn. Gaman........................

02.02.2009 23:32

Sigrún ég lofa......





Veistu Sigrún ég er alveg hætt að gelta á hestana ég lofa.........

Dagurinn í dag var með þeim allra fegurstu sem gerast í Hlíðinni snjór, sól, logn og frábært reiðfæri. Hefði svo sannarlega þurft að taka myndir en hafði öðrum hnöppum að hneppa.
Fengum líka skemmtilegar heimsóknir jafnvel með veitingum og flotteríi ekki amalegt það.

Fyrirmyndarhestur dagsins var hún Rák Stælsdóttir sem ég er að þjálfa og Skúli prófaði í dag, var svona rosalega lukkulegur kallinn...emoticon

Á morgun verður vonandi jafn gott veður og færi svo að ég ætla bara að hafa þetta stutt í kvöld og drífa mig í draumalandið.


01.02.2009 22:57

Hestaferð-stjórnin-þorrablótið




Hestaferð 2007 frábær dagur á Stakkhamarsfjörunum.

Við gamla settið fórum í frábært matarboð í gær borðuðum hreindýr og spjölluðum við
góða vini. Rifjuðum upp skemmtilega hestaferð og byrjuðum að skipuleggja nýja.
Mig er strax farið að hlakka til, hestaferðirnar sem við höfum farið í á síðustu árum hafa verið hverri annari betri. Ferð norður í Húnavatnssýslu, ferð suður í Borgarfjörð, margar ferðir niður á Löngufjörur og á fjöllunum í kring um okkur. Hvert eigum við að fara í sumar?

Ný ríkisstjórn leit dagsins ljós í dag vonandi ber hún gæfu til góðra verka fyrir land og þjóð.
Var aðeins að velta fyrir mér hvernig muni ganga hjá Steingrími að höndla þrjú ráðuneyti.
Það virðist alltaf vera hægt að fjölga skúffunum í skrifborðunum nú til dags. Síðast var sjávarútveginum og landbúnaðinum smellt saman og nú fara fjármálin með, væri svo sem ágætt ef að peningarnir væru til. Hvað með tímann? Jú sólarhringurinn hjá Steingrími er örugglega miklu lengri en hjá okkur.

Þorrablótið okkar er á föstudaginn um að gera að fara setja sig í gírinnemoticon


  • 1