Færslur: 2020 Júní

23.06.2020 22:48

Heiðskír og Himinn þeir eru bræður.

 

Þessi reffilegi hestur heitir Heiðskír frá Hallkelsstaðahlíð.

Móðir hans er Kolskör frá Hallkelsstaðahlíð og faðir Álfarinn frá Syðri Gegnishólum.

Hann er upplitsdjarfur og flaggar fallegu tölti þegar hann hreyfir sig.

 

 

Hlaupagleðin er í hávegum höfð og hér er Heiðskír að leggja af stað í einn góðan sprett.

 

 

En náttúran kallar og auðvita er pissu pása ......................

 

 

Hann var ekki alveg viss hvað honum fannst um kellingu sem sat fyrir honum og smellti af myndum.

 

 

Æi þetta sleppur þar sem mamman er með.

 

 

Á þessar mynd er Heiðskír ansi líkur bróður sínum sem nú er veturgamall og heitir Himinn.

Faðir hans er Heiður frá Eystar Fróðholti. 

Himinn stundar um þessar mundir fortamningar og stefnir að sjálfsögðu á að dúxa.

 

 

Til þess að eiga möguleika á einhverju dúxi verður að borða og stækka.

Heiðskír leggur sig allan fram í því.

 

 

Á næstunni fer Heiðskír í ferðalag með mömmu sinni þar sem Kolskör mun hitta draumaprins þessa árs.

Já það verður að leggja drög að einhverju skemmtilegu.

Nánar um það síðar.

11.06.2020 23:05

Guðdómlegur dagur í Hlíðinni.

 

Dagurinn í gær var einn af þessum dögum sem maður vill ekki að taki enda.

Tilveran verður dásamlega þegar náttúran skartar sínu fegursta og sumarið virðist endalaust.

Listaverk hvert sem litið er, fuglasöngur og vorilmur í lofti.

Fullkomið.

 

 

Það er einmitt á svona dögum sem gaman er að festa herlegheitin á mynd.

Eins og þið sjáið er það bara draumur að sumarið sé komið.

Enn er mikill snjór í fjöllum og úthaginn á langt í land með að teljast kominn í sumarbúning.

 

 

 

Andstæðan í litunum er skemmtileg og gaman að skoða þetta listaverk.

 

 

 

Hrauntangarnir njóta sín eins og reyndar umhverfið allt .

Svo gerir fjarlægðin fjöllin blá ............... o.s.frv...................

 

 

Hlíðarvatn er spegill fyrir skýin sem punta sig í gríð og erg...............

 

 

Þarna sjáum við niður í sveit eins og sagt er hér á bæ.

 

 

Þarna sjáum við hluta Hlíðarvatns sem er í góðri vatnsstöðu núna um þessar mundir.

Enda eru veiðimennirnir kátir þessa dagana og veiða afar vel.

 

 

 

Þarna sjáum við út hlíðina og grillir í Oddastaðavatnið við endan á Hlíðarmúlanum.

 

 

Miklir skaflar í Geirhnúknum og einnig í Djúpadalnum og Hellisdalnum.

 

 

Já veðrið var dásamlegt í gær og mikið af myndum teknar hér í Hlíðinni.

Þetta er bara smá sýnishorn vonandi hef ég af að setja inn fleiri á næstunni.

 

07.06.2020 22:06

Sauðburðarfréttir með dass af góðum minningum.

 

Það er orðið býsna langt síðan ég hef smellt fréttum hingað  inná síðuna en nú skal úr því bætt.

Um þessar mundir er sauðburður og allt það stúss sem honum fylgir að klárast.

Sauðburðurinn gekk frekar vel en þó er alltaf eitthvað sem maður vildi hafa betra. 

Frjósemi var með allra besta móti og á köflum eiginlega óhófleg  að mínu mati.

Vænleiki lambanna var mikill þetta vorið en þrátt fyrir það gekk burðurinn frekar vel.

Sauðburðurinn gekk hratt fyrir sig og á einum sólarhringnum báru 90 kindur og á þeim næsta 83.

Já það var gott að hafa frábært aðstoðarfólk þá sólarhringa sem kunnu réttu handtökin og þekkja vel hvernig heimamenn vilja hafa hlutina.

Eins og áður vorum við einstaklega heppin með aðstoðarfólk. Það er hreinlega ómetanlegt að fá þessa snillinga með okkur og svo er ekki verra þegar nýjir bætast í hópinn og standa algjörlega undir væntingum.

Takk fyrir alla hjálpina þið vitið hver þið eruð.

Gróðurinn hefur heldur farið hægt af stað og lengi vel var frost á nóttunni sem hægði á öllu. Mikill snjór er ennþá í fjöllunum og mikið má nú vera milt sumar ef að allir skaflarnir eiga eftir að hverfa í sumar. Úthaginn var mjög seinn til og fyrsti fjárhópurinn sem sleppt var uppfyrir kom með hraði aftur heim að girðingu.

Já geldfé og hrútar sem farið var með suður á Hafurstaðatún í rúllu létu ekki bjóða sér slíkan aðbúnað og settu hraðamet heim að hliði. 

Eftir síðustu rigningu og hlýnandi verður síðustu daga hefur heldur dregið úr barlómnum og fleiri og fleiri kindur telja fjallið ásættanlegt.

Enn er þó dágóður hópur á túnunum inní Hlíð og heilar 14 kindur inni, tvær óbornar og hinar undir eftirliti af ýmsum ástæðum.

 

 

 

Hér gefur að líta sýnishorn af Hlíðinni en þessi mynd var tekin uppúr miðjum maí.

Túnin græn, úthagi gulur, snjór í fjöllum og Hlíðarvatn í hárri stöðu.

 

Það eru mög handtökin sem þarf að framkvæma á stóru sauðfjárbúi t.d eru þau ansi mörg þegar sleppa á út allri hjörðinni.

Ég var ansi ung þegar ég fylgdist með hverju handtaki þegar markað var á vorin og átti þá þann draum heitastan að fá að marka.

Eftir margra ára suð fékk ég að marka fyrsta lambið og tókst það bara bærilega.

Æfinguna hafði ég fegnið við að ,,marka,, bréfmiða sem að Lóa frænka mín hafði klippt út.

Miðana bjó hún til úr pappir sem að Tíminn það gamla góða málgagn var pakkað inní þegar það var sent áskrifendum. 

Ég átti markaskrá sem sýndi öll mörkin og undir styrkri stjórn Einar heitins móðurbróður míns lærði ég þau og markaði bréfeyru.

Það voru hinsvegar Ragnar og Sveinbjörn móðurbræður mínir sem að allajafnan mörkuðu flest lömbin.

 

 

Þarna er Ragnar að marka sennilega árið 1972 en þá var ég 7 ára og fyrir löngu byrjuð að suða.

Nú hefur gamli draumurinn ræst eða gerði það fyrir svona 22 árum síðan og nú marka ég öll lömb sem fæðast hér á bæ.

Já þeir eru misjafnir draumarnir í lífinu................

En það er alltaf gaman að rifja upp gamla góða tíma og þá er nú gaman að eiga svolítið af myndum.

 

 

Þarna erum við Rassa en það hét þessi heiðurs kind sem að ég man svo vel eftir.

 

 

Það eru margar góðar minningar frá dögum þar sem að lífið snérist bara um kindur.

 

 

Þarna er ég 8 ára með Golsu mín sem var mikið uppáhaldi fyrir rollusálina mig.

 

 

Við Golsa á góðum degi hún nokkra mánaða gömul ég 5 ára í alltof stórum stígvélum og það í krummafót.

Já það getur verið gaman að vera sauðfjárbóndi................................

 

  • 1