31.05.2018 11:35

Það er komið sumar......................fréttir úr ýmsum áttum.

Vorðboðinn ljúfi er mættur hér í Hlíðina enda ekki seinna vænna.

Já hér á bæ er það fyrsta folaldið sem er klárlega merki um vor og bjartari tíma.

Hún Karún mín kastaði brúnu hestfolaldi þann 29 maí.

Faðirinn er hann Dúr frá Hallkelsstaðahlíð sem er undan Snekkju Glotta og Konserti frá Hofi.

Dúr var nú ekki viðstaddur fæðinguna eins og flestir nútíma feður en vafalaust ríg montinn samt.

Karún sem nú er að verða 24 vetra gömul lítur út eins og ,,unglingur,, enda dekruð eins og heiðurs frú sæmir.

 

Á næstu dögum bætist við í folalda hópinn en nú eru 6 hryssur ókastaðar.

Eins og sést á myndinni fylgjist Blika vel með öllu enda er hún sennilega ein af þeim fyrstu.

Nú er bara næsta mál að velja kappa fyrir þá gömlu.

 

Annars er það helst í fréttum héðan úr Hlíðinni að maí sló öll met í leiðinda veðráttu.

Snjór, frost, rigning, rok og allt það leiðinlegasta var í boði þennan annars ágæta mánuð.

 

 

Svona var ástandið að kvöldi hvítasunnudags............. og átti bara eftir að versna um nóttina.

Þá var gott að eiga stór hús og aðeins 35 kindur úti.

 

 

Bæjarlækurinn tók brjálæðiskast einn maí daginn.

 

 

Og nýjar ár urðu til í Hlíðarmúlanum.

 

 

Þessi mynd segir nokkuð um ástand bænda og búaliðs þegar langt var liðið á sauðburð.

En sauðburðurinn hefur gengið vel og algjört met slegið hér á bæ í frjósemi en við fegnum mörg ,,bónus,, lömb.

Veðráttan hefur þó sett svip sinn á sauðburðinn og fjöldi fjár sem enn er inni er meiri en nokkru sinni fyrr.

Það stendur þó til bóta og þessa dagana er frúin í ham með markatöngina að vopni.

 

 

Þessi voru samt bara nokkuð hress og ræddu heimsmálin á jötubandinu.

Það er svo gott við fjárhúsin þar er ekkert kynslóðabil.

 

 

Hér er heilagur matartími...................

 

 

Flekka litla er samt ekki á matseðlinum.....

 

 

Um þessar mundir er víða verið að mynda meirihluta..............

Lubbi og Móra eru í störukeppni eins og víða viðgengst við þær aðstæður.

Móra er fæddur leiðtogi að eigin áliti og hefur ákveðið að hún verði aðal skítt með vilja hinna 680 kindanna.

 

 
 
 
 
 
 
 
 
 

 

 
 

11.05.2018 20:51

Sauðburðarstuð.

 

Sauðburður er í fullum gangi hér í Hlíðinni reyndar aðeins meiri en við óskuðum.

Á meðan ískalt er á nóttunni og strekkingur á daginn er lítið gaman að hafa svona kraft.

En þessar kindur nutu sólar í dag í skjóli við fjárhúsin og voru ekkert að drífa sig að bera.

 

 

Þessar hinsvegar nutu sín á gamla reiðsvæðinu okkar í bragganum en þar bíða þær óbornu.

 

 

Jóa forustukind og vinkonur hennar voru slakar.

 

 

Við höfum fengið góða gesti og frábært aðstoðarfólk til okkar síðustu daga.

Þarna ræða kindin Villi Blökk og Guðný Dís málin.

 

 

Heimalingurinn Anton Skúlason naut þess að vera dekraður af ungum dömum.

Elva og Þorbjörg alveg með þetta.

 

 

Aðeins að skoða flekkótt..............

 

 

Eldhress að vanda Björg og Maron á góðri stundu.

 

 

Georg að spjalla við besta vin sinn í hesthúsinu.

 

 

Og Halldór í léttri sveiflu.

 

 

Auður fann lamb sem þurfti á hjúkrun að halda..........

 

 

Þessi eru góð saman á jötubandinu og ræða málin.

 

 

Ein að skoða efnilegt ungviði................ góður þessi Garðabæjarlitur..............

 

Fjárhúsbros á liðinu.

 

 

Við tókum auðvitað kaffispjall á kaffistofunni................og skipulögðum hestaferð.

Já og ræddum aðeins Guðrúnu frá Lundi líka.

 

 

 
 
 
 
 
 
 
 
 
 
 
 
 
 
 

08.05.2018 12:21

Svona var það í byrjun maí.......

 

Já það er fallegt á fjöllum og gæða stundir á milli élja............. en krakka í maí á ekki að vera svona.

Þessi mynd er tekinn þann 5 maí 2018.

Ég ákvað að gefa ykkur smá innsýni í sauðburðarveðrið það sem af er maí.

Mun þó alveg á næstunni smella inn fréttum af bændum og búaliði sem stendur í ströngu þessa dagana.

 

 

Já þetta er alveg fallegt en .........................

 

 

Svona var þetta þann 6 maí...................... hvað finnst ykkur ??

 

 

Já það varð bara slóð frá hesthúsi að reiðhöll, sko í maí.

 

 

 

Þessi er tekinn 29 apríl þá var aðeins snjóléttara.

Nánari fréttir af sauðburði og fleiru koma innan skamms.

 
 
 
 

03.05.2018 15:40

Ég hélt að vorið væri komið.

 

Þessi fallegi dagur var þann 28 apríl síðast liðinn og þá hélt ég í sakleysi mínu að vorði væri komið.

En nú er ég farin að efast smá.....................................

Fjöllin með fallega hvíta ábreiðu og landið að undirbúa sig fyrir sumarið.

 

 

Þessi mynd er tekin í átt að Sandfelli, Djúpadal og Hellisdal.

Hlíðarvatnið fallega blátt.

 

 

Já þetta var góður dagur til að taka á móti vorinu.

 

 

En svo kom annar dagur og við vöknuðum upp við snjó og vetur.

Já svona hefur ástandið verið full oft að undanförnu.

 
 
 
 
 

19.04.2018 23:06

Gleðilegt sumar.

 

Gleðilegt sumar kæru vinir, já og takk fyrir veturinn.

Það er ekki ofsagt að blíðan hefur leikið við okkur síðustu daga og gefið okkur fögur fyrirheit um gott vor.

Ég verð þó að leyfa mér að efast............. en bara í smá stund.

Eftir að hafa vaknað við fuglasöng undir öruggri stjórn stelksins er ég full bjartsýni og hlakka til að mæta góðu vori.

Lóan, tjaldurinn og stelkurinn ætla ekki að fá ,,seint í kladdann,, þetta vorið. Hrossagaukurinn og spóinn eru varkárari og taka sjensinn.

Eins og vera ber alin upp með Hrafnhildi ömmu er sumar dagurinn fyrst alltaf hátíðisdagur hér í Hlíðinni.

Góður matur og veglegt kaffi var málið og ekki mátti gleyma að fara í betri fötin til að taka nú vel á móti sumrinu.

Annað sem var mjög mikilvægt hjá henni ömmu minni var að fara ekki seint á fætur á sumar daginn fyrsta. Það gat hæglega gefið tóninn um ódugnað og sluks á komandi sumri. Það var bannað.

Hér á bæ var veturinn kvaddur með virtum, bústörf og hestastúss voru málið en þegar líða fór á daginn stakk húsfreyjan af og brunaði á hestamót. Það mót var þriðja mót Hestamannafélagsins Snæfellings á árinu sem hadið var í Grundarfirði. Hin tvö hafa verið haldin í Ólafsvík og Stykkishólmi.

Snildar mót sem hafa heppnast afar vel með góðri þátttöku félagsmanna. Mikið sem það er gaman hversu mikið líf er að koma aftur í hestamennskuna hér á Snæfellsnesinu.

Sumri var svo fagnað með góðum gestum sem mættu í húsin vel fyrir hádegi (hálfellefu) síðan var brunað í Norðurárdalinn.

Þar var opið hús í fjárhúsunum hjá Brekkubændum þeim Þórhildi, Elvari og börnum. Frábært framtak, gaman að skoða hjá kollegunum og hitta skemmtilegt fólk.

Takk fyrir góða mótttökur og ánægjustundir Brekkubændur.

Þegar heim var komið biðu bústörf og kröfuharður búpeningur sem hafði engan skilning á bæjarrápi og seinkun á gjöfum. Við vorum 0 stjörnu bændur að þeirra mati og áttum fátt gott skilið.

 

Annars gengur lífið sinn vana gang með dásemdar stundum í reiðhöllinni já og útá vegi.

Tamningar og þjálfun í fullum gangi og allt eins og til er ætlast.

Ja nema kannski tíminn hann fer alltaf minkandi hvað sem hver segir.

 

 

 

 

04.04.2018 22:06

Ráðherra, rafmagn og frjálsar ástir.

 

Við hér í Hlíðinni fengum góða heimsókn í dag þegar Ásmundur Einar félagsmálaráðherra kom með fríðu föruneyti.

Þegar hann kom hér síðast var verið að reisa fyrstu sperruna í húsinu svo það hefur ýmislegt gerst síðan.

Að sjálfsögðu sýndum við þeim reiðhöllina og búfénaðinn en okkur sást yfir að bjóða þeim að leggja á og taka hring í höllinni.

Það verður gert í næstu heimsókn nú eða þegar formleg vígsla fer fram.

 

 

Páska hátíðin var vel nýtt hér í Hlíðinni en þá fengum við þá Guðgjöf að hemja rafvirkjan hjá okkur.

Og eins og við var að búast voru afrekin þó nokkur og erum við því vel upplýst eftir hátíðina.

Þrjár af fjórum ljósalínum komnar upp og birtan dásamleg.

Á myndinni má sjá hluta af umsvifunum sem voru í gangi.

 

En það hafa verið fleiri viðburðir hér á síðustu dögum og einn af þeim er framhald á sauðburði sem hófst í fyrra fallinu.

Það var sem sagt þann 9 mars sem að lambakóngarnir fæddust og hlutu nöfnin Blakkur og Hrappur.

Ekkert er vitað um faðernið en ljóst að Villi-Blökk mamma þeirra hefur hitt draumaprinsinn vel fyrir hrútaútgöngu bann.

 

 

Það var svo í dag stuttu eftir ráðherraheimsóknina sem hún Litla Flekka bar myndar tvílembingum.

Faðernið á þeim er alveg á hreinu.

Forystu hrúturinn Gísli hreppstjóri hafði stutta viðkomu í fjárhópnum á leið sinni úr fjallinu og inní hús.

Ekki lengi að því sem lítið er............... og þó þetta eru vænstu lömb.

Þessi litfögru lömb hafa verið nefnd og að sjálfsögðu eru þetta Ásmundur Einar og Framsókn.

Já það er ekki bara byggingin sem ráðherra þarf að líta á í næstu ferð .................

Samkvæmt því sem að Guðbrandur lambateljari sagði okkur er von á að tvær kindur í viðbót beri fyrir hefðbundinn sauðburð.

Hrúturinn Gísli hreppstjóri ber ábyrð á annari en hin hefur notið sín í frelsinu á Skógarströndinni.

Já það er líf í Hnappadalum.

 
 
 

26.03.2018 20:00

Það lítur vel út með ,,pakkana,, þetta árið...............

 

Það er alltaf spennandi þegar hann Bubbi kindasónari er væntanlegur til að framkvæma árlegu kindamæðraskoðunina.

Þessar biðu spenntar eftir honum alveg eins og við.

Frá því um árið er það spenningur í bland við kvíða sem fyllir hugann þegar þetta verkefni er framundan.

Að þessu sinni var léttir að talningu lokinni en útkoman var betri en oftast áður jafnvel sú besta.

Fjárstofninn mun því stækka verulega hér í Hlíðinni þegar líða fer á maí.

 

 

Minn draumur er að sem flestar eldri ærnar séu með hvorki fleiri né færri en tvö stykki og gemlingarnir með eitt stykki.

Það finnst mér hæfilegt. Ærnar sýndu þessum draumum mínum all góðan skilning en gemlingarnir hafa eitthvað misskilið.

Fjöldi tvílemdra var ríflegur og sem betur fer voru fleiri þannig en geldir......

 

 

Það er hátíðar stemming þegar talning fer fram og góðir grannar hjálpast að með herlegheitin.

Að sjálfsögðu mæta aldnir höfðingar í húsin og fylgjast með.

Já það lítur út fyrir krefjandi sauðburð með miklum lambafjölda og fjöri.

Vitið þið ekki örugglega um duglega sauðburðaraðstoð fyrir okkur ???