Flokkur: Daglegt líf í Hallkelsstaðahlíð
21.12.2010 23:01
Jólin eru að koma.....
Ég var að rifja upp árið í myndasafninu mínu og fann þessar glaðlegu og hressu dömur þar.
Astrid og Króna, Anne og Freyja, Sandra og Folda.
Nú er Astrid farinn til Danmerkur í jólafrí og Anne væntanleg á milli jóla og nýárs, spurning hvenær Sandra kemur aftur ? :)
Bakstri, þrifum og öðrum skemmtileg heitum er skipt bróðurlega á milli ábúenda svo að innan skamms tökum við undir í jólalaginu.........og syngjum ,,nú mega jólin koma fyrir mér,,
Hefðin er sterk og flestar uppskriftir þær sömu og síðast en þó með smá útúr dúrum.
Þrif og gardínuþvottur á sínum stað því hin hefðbundni vorhreingerningartíminn hentar mér afar illa. Á þeim tíma eru hestamót, dómstörf, sauðburður já og bara vorið og þá hemst ekki húsfreyjan inni við.
Á morgun er það svo jólasveinastarfið sem bíður pakkadreifingar með nettu hangikjötsívafi.
Skrifað af Sigrún Ólafsdóttir
18.12.2010 12:26
Sauðfjárrækt og fundir
Það hefur margt á dagana drifið síðan ég bloggaði síðast og eins og þið hafið séð ekki verið mikill tími til ritsmíða.
Sauðfjárræktin hefur tekið drjúgan tíma,fundir og að sjálfsögðu jólaundirbúningur sem þó er kominn styttra en æskilegt getur talist. En er maður ekki alltaf á síðustu stundu hvort eð er?
Hér voru kindur sæddar dagana 15 og 16 desember samtals 55 stykki.
Hrútarnir sem að notaðir voru þetta árið eru: Kveikur frá Hesti, Hukki frá Kjarláksvöllum, Hriflon frá Hriflu, Frosti frá Bjarnastöðum, Borði frá Hesti, Laufi frá Bergsstöðum, Kostur frá Ytri-Skógum, Ás frá Ásgarði, Bogi frá Heydalsá, Bokki frá Dunki og Sómi frá Heydalsá.
Nú stendur yfir mikill vísinda verknaður það er að segja velja samna gripi fyrir heimahrútana sem hafa góðfúslega afþakkað frekari ,,heimilisaðstoð,,
Nánar um það síðar.
Á fimmtudagskvöldið komum við í stjórn Félags tamningamanna saman og skelltum okkur á jólahlaðborð í höfuðborgina.
Skemmtilegt kvöld og mikið spjallað með góðu fólki, aldeilis næg verkefni framundan.
Takk fyrir kvöldið kæru vinir.
Á föstudaginn var svo fundur hjá Fagráði í hrossarækt, langur en góður fundur og mörg málefni rædd. Alltaf nóg um að vera hjá hestamönnum.
Sauðfjárræktin hefur tekið drjúgan tíma,fundir og að sjálfsögðu jólaundirbúningur sem þó er kominn styttra en æskilegt getur talist. En er maður ekki alltaf á síðustu stundu hvort eð er?
Hér voru kindur sæddar dagana 15 og 16 desember samtals 55 stykki.
Hrútarnir sem að notaðir voru þetta árið eru: Kveikur frá Hesti, Hukki frá Kjarláksvöllum, Hriflon frá Hriflu, Frosti frá Bjarnastöðum, Borði frá Hesti, Laufi frá Bergsstöðum, Kostur frá Ytri-Skógum, Ás frá Ásgarði, Bogi frá Heydalsá, Bokki frá Dunki og Sómi frá Heydalsá.
Nú stendur yfir mikill vísinda verknaður það er að segja velja samna gripi fyrir heimahrútana sem hafa góðfúslega afþakkað frekari ,,heimilisaðstoð,,
Nánar um það síðar.
Á fimmtudagskvöldið komum við í stjórn Félags tamningamanna saman og skelltum okkur á jólahlaðborð í höfuðborgina.
Skemmtilegt kvöld og mikið spjallað með góðu fólki, aldeilis næg verkefni framundan.
Takk fyrir kvöldið kæru vinir.
Á föstudaginn var svo fundur hjá Fagráði í hrossarækt, langur en góður fundur og mörg málefni rædd. Alltaf nóg um að vera hjá hestamönnum.
Skrifað af Sigrún Ólafsdóttir
12.12.2010 23:46
Skemmtilegur dagur
Formaður Félags hrossabænda og fjallkóngur Kristinn Guðnason hlustar á sitt fólk syngja ,,gordjöss,, sönginn góða í afmælisveislunni í dag.
Það var brunað á suðurlandið í dag en Kristinn í Árbæjarhjáleigu fagnaði þar 60 árum.
Eins og við var að búsast var veislan vegleg og dugði ekkert annað en stórt íþróttahús undir mannskapinn. Já hundrað manns á hver 10 ár, ekki amalegur vinahópur það.
Ágúst rektor á Hvanneyri stjórnaði samkomunni og fórst það afar vel eins og við var að búast. Rifjaði hann upp margar skemmtilegar sögur frá samstarfsárum sínum og Kristins sem að allar voru drepfyndnar. Guðni Ágústsson fór á kostum bæði á sinn kostnað og afmælisbarnsins og margir fleiri lögðu sitt af mörkum til að skemmta afmælisbarninu og veislugestum. Svo er alltaf gaman að hitta hestafólk spá og spjalla að sjálfsögðu um hross.
Já svo sannalega skemmtileg veisla og veitingarnar frábærar.
Takk fyrir skemmtilegan dag.
Ég lít nú öðru hverju á almanakið og tel dagana til jóla er samt enn róleg enda búin að baka slatta af smákökum. Verkefnalistinn er samt á sínum stað...........og fer ekki neitt.
Skrifað af Sigrún Ólafsdóttir
12.12.2010 00:18
Ýmislegt..............
Sumarslökun...............
Í dag komu þrjú folöld í hús og er þá öll hersingin komin á vetrarstaðinn sinn.
Þau sem að komu inn í dag voru Gróa Glymsdóttir, Þjóðhátíð Glymsdóttir og Jörp Hlynsdóttir.
Viðja var líka tekin inn og nú hefst alvara lífsins hjá henni enda nokkuð ljóst að hún fer ekki í sjálftekið frí eins og í fyrravetur. Já nú var ekkert djamm og flandur í boði fyrir Viðju.
Hrellir sonur hennar dafnar vel og hefur engar áhyggjur af því að faðernið er ekki alveg á hreinu hjá honum.
Nú fer að styttast í að Mummi, Fannar og Gosi fari norður að Hólum í skólann en hann byrjar 12 janúar.
Til að komast í topp aðstöðu til að æfa sig hafa þeir félagar farið út í Söðulsholt og fengið að nota reiðhöllina til æfinga. Við höfum svo tekið önnur hross með og leikið okkur þar á kvöldin. Bæði við og hrossin hafa haft gagn og gaman af enda er þetta skemmtileg tilbreyting.
Takk kærlega fyrir okkur Söðulsholtsbændur.
Skrifað af Sigrún Ólafsdóttir
07.12.2010 23:39
Of langt gengið ????
Stundum hellist yfir mann löngun í eitthvað t.d langar mig oft í súkkulaði en í kvöld var það engin spurning. Mig langaði mest af öllu að fara í hestaferð á Löngufjörur helst strax og í góðu veðri eins og myndin sýnir svo vel.
En sennilega er heppilegast að bíða til vors með þetta og í staðinn bara láta sig dreyma.
Já talandi um drauma, ég hef ekki verið sérstaklega áhugasöm um drauma síðan ég var táningur og það er nú svolítið síðan. Man þó að ef að ráðningin var ekki góð í einni draumráðningabók þá var það bara að fara í þá næstu, svo að maður tali nú ekki um þá þriðju. Algengasta ráðningin var þannig að draumurinn boðaði langlífi,dauða, giftingu eða ríkidæmi. Svo var bara að velja ,,réttu,, bókina miðað við aðstæður.
En í nótt dreymdi mig nágranna mína hinu meginn við fjallgarðinn, þau voru í miklu stússi við að smala kálfum og kindum. Og þar sem að mig dreymir svo sjaldan mátti ég til að segja frá draumnum í morgun. En þar sem að ég á enga draumráðningabók þá bara réð ég hann sjálf og ákvað að þetta boðaði það að eitthvað af fénu mínu kæmi í leitirnar. Kannske var þetta nú frekar óskhyggja en ráðning. En viti menn um hádegið er hringt, fjórar kindur fundnar og það var að sjálfsögðu annar granninn sem að mig dreymdi sem fann þær.
Skemmtileg tilviljun og hver veit nema ég fari að trúa ruglinu mínu eftir þetta.
Ætla samt að sofa rótt í nótt og láta ekki draumana trufla mig.
Jólastússið gengur hægt en örugglega hér á bæ, þó eru gamlar hefðir helst í hávegum og húsfreyjan leiðinlega vanaföst í þessum efnum.
Nú í morgun heyrði ég skemmtilegan pistil um Grýlu gömlu í morgunútvarpinu. Þar komu fram margar hugmyndir um það hvernig Grýla í ,,raunveruleikanum,, liti út. Ég fór að rifja upp hvernig hún hefði verið í mínum huga á yngri árum. Myndin var alveg skýr já það var sko mynd af henni í gömlu Vísnabókinni. Hún var ekki sérlega fríð en það var eitt sem að mér fannst spennandi og jafnvel öfundaði hana af á tímabili. Já hún var með hófa.
Hvað ætli ,,hrossasóttin,, geti gengið langt hjá börnum eins og mér????
Skrifað af Sigrún Ólafsdóttir
02.12.2010 22:51
FT fundur og fleira
Það var fallegt vetrar veður hér í Hlíðinni í dag, örlítið frost, logn og sólin skein í fjöllin.
Já nú sést ekki sólin aftur hér fyrr en 14 jánúar og þá verða sko bakaðar pönnukökur að gömlum sið.
Svo er orðið svo jólalegt þegar við horfum uppí gamla hús, seríur og ljós í öllum gluggum.
Mér sýnist að ég sé nú þegar búin að tapa í fyrirhuguðu stjörnustríði.
Aðalfundur Félags tamningamanna er á morgun og verður haldinn á Kænunni í Hafnarfirði og hefst kl 18.oo
Auk venjulegra aðalfundastarfa mun Víkingur Gunnarsson deildarstjóri hrossaræktardeildar Hólaskóla kynna nýtt BS nám við skólann.
Kvöldverður í boði félagsins, vonandi sjá sér sem flestir fært að mæta og taka þátt í starfinu.
Nákvæmar hestafréttir bíða betri tíma en nú er heldur betur að lifna yfir hesthúsinu.
Ég held að besti hesturinn í dag hafi verið uppáhalds hesturinn minn.......................allavega sá næst besti.
Skrifað af Sigrún Ólafsdóttir
29.11.2010 23:11
Aðventuannir..........
Eins og þið sjáið þá er jólaundirbúningur hafinn hér á bæ og þar sem að húsfreyjan hefur verið þó nokkuð upptekin að undan förnu, réð hún starfskraft í verkið.
Salómon svarti er liðtækur í margt.
Það er spurning hvort það var af nærsýni eða vandvirkni sem að kappinn var svona staðsettur við ,,vinnuna,, en allavega var áhuginn nægur.
Þegar vel liggur á okkur Salómon og rittíminn nægur ætlum við að deila með ykkur lífsreynslusögu.
Sagan er dramatísk, spennandi og með hrollvekjuívafi enda komumst við svo sannarlega í hann krappan. Og erum við þó engir ,,kettlingar,,
Já njósnir, eftirför, flótti, neyðarkall og jafnvel enn alvarlegri mál koma fram í sögunni.........
Bíðið þið bara.............
Í dag var kíkt í ,,jólapakkana,, eins og það er kallað hér á bæ en það er þegar Edda dýralæknir mætir á svæðið og sónar hryssurnar. Það er skemmst frá því að segja að allar hryssurnar sem að sónaðar voru og til stóð að væru fylfullar stóðust prófið.
Ég ætti nú að vera dugleg einhvern daginn og smella inn myndum af hryssunum og stóðhestunum sem eiga von á afkvæmum næsta vor.
Nú er hrútaskráin komin á náttborðið með gleraugun ofaná, svo að nú fara hlutirnir að gerast
Skrifað af Sigrún Ólafsdóttir
29.11.2010 01:42
Örfréttir.
Góð helgi að baki þar sem farið var í skemmtilegt afmæli, árshátíð og matarboð.
Já alltaf gaman að hitta skemmtilegt fólk.
Afmælisveislan var hjá sextugum Svani sem að sló upp glæsilegri veislu með frábærum veitingum að hætti Kela verts á Görðum. Fyrrverandi borgarstjóri stjórnaði veislunni og fórst það afar vel, hagyrðingar fóru á kostum og múrarakórinn var flottur.
Virkilega gaman takk fyrir skemmtilega kvöldstund.
Flottar frænkur mættu líka í heimsókn um helgina ,,Hildirnar,, eins og ég kalla þær, hljómar samt ekki vel. En meiningin góð Hildur, E.Hildur, Ásthildur og Matthildur.
Nýbakað og flott af því tilefni í því efra.
Matarboð hjá yngra settinu í Skáney klikkar ekki, áttum skemmtilega kvöldstund þar með frábærum veitingum. Litli skemmtikrafturinn stóð sig líka vel og kunni vel að meta hversu auðvellt var að láta gestina hlæja eftir pöntun.
Skítmokstur var drifinn af föstudaginn og laugardaginn með góðri aðstoð ,,okkar,, manna.
Notaleg tilfinning þegar svona verkefni eru frá.
Já alltaf gaman að hitta skemmtilegt fólk.
Afmælisveislan var hjá sextugum Svani sem að sló upp glæsilegri veislu með frábærum veitingum að hætti Kela verts á Görðum. Fyrrverandi borgarstjóri stjórnaði veislunni og fórst það afar vel, hagyrðingar fóru á kostum og múrarakórinn var flottur.
Virkilega gaman takk fyrir skemmtilega kvöldstund.
Flottar frænkur mættu líka í heimsókn um helgina ,,Hildirnar,, eins og ég kalla þær, hljómar samt ekki vel. En meiningin góð Hildur, E.Hildur, Ásthildur og Matthildur.
Nýbakað og flott af því tilefni í því efra.
Matarboð hjá yngra settinu í Skáney klikkar ekki, áttum skemmtilega kvöldstund þar með frábærum veitingum. Litli skemmtikrafturinn stóð sig líka vel og kunni vel að meta hversu auðvellt var að láta gestina hlæja eftir pöntun.
Skítmokstur var drifinn af föstudaginn og laugardaginn með góðri aðstoð ,,okkar,, manna.
Notaleg tilfinning þegar svona verkefni eru frá.
Skrifað af Sigrún Ólafsdóttir
23.11.2010 22:46
Sparisjóður og vindurinn sem blæs............
Er ekki nauðsynlegt að smella inn svona vormyndum öðru hvoru með grænu grasi og blíðu ?
Svo gott fyrir sálina.
Þarna er hann Sparisjóður minn þegar hann var á gelgjualdrinum, alltaf kátur og ljúfur kallinn. Fyrir þá sem að ekki vita þá er Sparisjóður stóðhestur á fimmtavetur undan Gusti frá Hóli og Karúnu frá Hallkelsstaðahlíð. Sparisjóður var taminn þó nokkuð í fyrravetur en veiktist illa í vor og var í fríi í vor og sumar. Nú er hann aftur á móti kominn á járn og bara gaman hjá honum og þjálfaranum. Það eru til nokkur tryppi undan honum og sum bara nokkuð snotur með góðar hreyfingar og skemmtilegt geðslag.
Það er allt komið á fullt í hesthúsinu og það orðið fullt eins og vera ber á þessum tíma. Meðalaldurinn er ekki hár en skemmtanagildið er hátt og margt bara nokkuð spennandi.
Ungu tamningahrossin eru meðal annars undan Glym frá Skeljabrekku, Krafti frá Bringu, Baugi frá Víðinesi, Gosa frá Lambastöðum, Hersveini frá Lækjarbotnum, Blæ frá Hesti og Arði frá Brautarholti. Svo eru það söluhross og þjálfunarhestar sem margir eru undan góðum höfðingjum eins og Gusti frá Hóli, Hróðri frá Refsstöðum, Randver frá Nýja-Bæ, Stæl frá Miðkoti og nokkrum fleirum.
Á næstu dögum verður formlega gengið frá hrútaviðskipum ársins og lofa ég myndum af því tilefni. Eitt skyggir þó á þegar rætt er um hrúta á þessum bæ en Sindri minn Kveiksson er ennþá týndur. Eins gott að snúa útúr og ,,trúa ekki því versta en vona það besta,,
Ég efast stórlega um að ég hafi greind til að kjósa til stjórnlagaþings svo sómi sé að svo líklega sleppi ég því bara. Er samt á því að maður eigi alltaf að nota kosningaréttinn sérstaklega ef að maður er kona. Þannig að til þess að vera sjálfri mér samkvæm verð ég að reyna að vitgast stórlega þessa síðustu daga fram að kosningum.
Er reyndar nokkuð viss um að lítið muni koma útúr þessu veseni og finnst að margir frambjóðendur hafi verið orðnir svo æstir að komast í framboð í ,,einhverju,, að þeir hefðu gripið tækifærið óháð málefnum. En vafalaust er þetta allt hið vænsta fólk.
Annars er margt sem að ég ekki skil.................ætla að deila nokkrum atriðum með ykkur.
Í kvöld hlustaði ég á fréttirnar á Ruv þar var rætt við ráðherra sem að taldi það mikla gæfu að flytja málefni fatlaðra til sveitafélaganna. Ekki ætla ég að leggja mat á það en sperrti eyrun þegar hann dásamaði hversu gott það væri að hafa þetta allt í ,,nærumhverfinu,, flytja málefnið ,,heim,, ................eitthvað svo notalegt.
Einhverntímann heyrði ég að nálægðin væri versti óvinur lítilla samfélaga, kannske hef ég bara misskilið.
Annað mál hef ég sennilega líka misskilið...................mér finnst ég oft hafa heyrt fólk tala um það með talsverðu þjósti og í leiðinda tóntegund að eitthvað sé í ríkiseigu.
Svo nefnir þetta sama fólk atriði sem að best væru komin í þjóðareign ( orðið þjóðareign er þá gjarnan sagt lágt og í mjög ljúfum tóni)
Mín niðurstaða er að einhvers misskilnings gæti jafnvel meðal annara en mín.
Ríkiseign og þjóðareign ??????????
Nærumhverfi og ,,heima við hjá fólkinu,, ????
Amma sagði stundum ,, svona eins og vindurinn blæs,, góða.
Hvað finnst ykkur?
Skrifað af Sigrún Ólafsdóttir
16.11.2010 22:57
Hún er vinsæl og veit af því
Sumir eru hreinlega vinsælli en aðrir...............hún Golsa á allavega marga vini og aðdáendur.
Um síðustu helgi komu nokkrir af vinum Golsu í heimsókn og í tilefni dagsins fékk hún pela.
Golsa er geðprýðis kind þó svo að hún sé með allt sitt algjörlega á tæru og svona heimsóknir kann hún vel að meta. Það eru aðallega þrengslin í réttunum og svoleiðis óþægindi sem að henni falla ekki vel í geð. Eins geta bæði smalar og smalahundar verið ansi þreytandi að hennar mati enda veit hún alveg hvar helstu nauðsynjar eru og er fullfær um að finna þær.
Þar sem að tími jólaklippinga í fjárhúsunum stendur sem hæst var upplagt að Golsa fengi klippingu á meðan aldáendurnir voru í heimsókn. En fyrst varð hún náttúrulega að fá pela.
Ég smelli nokkurum myndu af viðburðinum og setti þær hér inná síðuna undir myndaalbúm.
Eins eru líka nýjar myndir af þeim Snotru og Badda í myndaalbúminu.
Skrifað af Sigrún Ólafsdóttir
15.11.2010 09:23
Snotra og Baddi frændi
Snotra mín og Baddi frændi úr Garaðabænum............vá hvað þú ert flottur frændi.
Baddi er fæddur hér í Hlíðinni undan gömlu Snotru minni og Rebba sem að lengst af bjó í Hundadal. Baddi flutti í Garðabæinn ungur að árum og hefur átt þar draumaævi hjá Erlu Guðnýju og fjölskyldu.
Hann er samt alltaf kátur að koma í heimsókn á æskuslóðirnar og fá smá útrás.
Og svo smá sirkus á hestasteininum í sólinni.
Ég set inn fleiri myndir af Snotru og Badda við tækifæri.
Við fengum góða heimsókn um helgina og var ýmislegt brallað en það er alveg klárt að Golsa heimalingur var í aðalhlutverkinu.
Myndir frá því koma inn þegar ég hef meiri tíma.
Alltaf nóg um að vera á næstunni stendur til að klára aftekningar, skítmokstur og fundir eru á döfinni, tamningar og margt fleira.
Skrifað af Sigrún Ólafsdóttir
12.11.2010 21:42
Veturinn er kominn
Æi það hefur verið svo leiðinlegt veður hér í Hlíðinni að undan förnu að mér fannst vel við hæfi að setja inn vormynd.
Þarna eru mæðgurnar Karún og Auðséð Sporðsdóttir að sóla sig og smakka á græna grasinu.
Um síðustu helgi var tekin sú ákvörðun hér á bæ að taka elstu folöldin undan og setja þau inn.
Yngstu folöldin fá að vera lengur með mæðrum sínum hér heima á túni. Ekki er annað að sjá en að allt gangi vel og eru allir að verða nokkuð kátir þó að mæðurnar séu farnar.
Veturgömlu tryppin voru tekin sér og hafa tún og rúllu útaf fyrir sig.
Nú hafa allir hestar hér í Hlíðinni fengið vetrarormalyfið sitt og ættu því að vera í góðum málum.
Síðustu dagar hafa verið járningardagarnir miklu hjá Mumma og nú er allur hópurinn að verða kominn á skafla, ekki veitir af.
Ég hef aðeins verið að ,,spjalla,, við litla vin minn hann Kát Auðsson síðustu daga til að kynnast honum betur. Kátur er styggari en afkvæmi Karúnar hafa verið en viðmótið svipað. Hann er svolítið efins um að ég sé eitthvað áhugaverð og finnst þessar heimsóknir í stíuna hans frekar þreytandi og tilgangslausar. Sennilega hálfgert kellingatuð.
Ég fékk góðar fréttir af Glotthildi sem að nú sprangar um í Svíaríki og hefur það greinilega mjög gott. Gaman af því.
Í dag kom ein af óheimtu kindunum í leitirnar og með í för var lamb sem hafði komið heim fyrr í haust en stungið svo af á vit ævintýranna.
Þá er hægt að skrifa mínus tveir á blaðið góða.
Rúningur potast áfram en slatti reyndist eftir þegar síðasta talning fór fram í dag.
Skrifað af Sigrún Ólafsdóttir
09.11.2010 22:57
Smá..........
Nú er að verða síðasta tækifæri hjá kindunum þetta árið að njóta veður blíðunnar útá túni.
Dágóður skammtur er tekinn inná hverjum degi og klipptur en tíminn fer líka í margs konar stúss.
Í gær heimtum við tvílembu sem að Flosi bóndi á Emmubergi fann, alltaf ánægjulegt þegar fækkar á listanum. En ég bíð enn og vona að Sindri minn komi í leitirnar.
Hér kemur ein mynd úr gamla safninu sem ég er svo upptekin af um þessar mundir.
Já það leynist ýmislegt í safninu, þarna er mynd af Hótel Víkingi sem sigldi á vatninu 1964 og 1965.
Skrifað af Sigrún Ólafsdóttir
07.11.2010 23:01
Kátur minn og ýmislegt fleira
Þarna er hann Kátur, alltaf svo sjarmerandi auga sem kemur frá henni Karúnu minni.
Þarna er Kátur með vini sínum úr Borgarnesi.
Tómas á Kistufelli skilaði folunum í ljómandi standi alveg hægt að mæla með góðri þjónustu þar á bæ.
Og ekki var nú amalegt að fá sér göngutúr í Lundareykjadalnum þegar folarnir voru sóttir, algjör blíða.
Í dag komu þrír synir Hersveins frá Lækjarbotnum í tamningu, fjallmyndarlegir og spennandi folar þar á ferð. Það er alltaf svo gaman að fá hross í tamningu undan hrossum sem að við höfum ekki kynnst áður.
Í gær byrjuðu feðgarnir að klippa féð og er þó nokkur fjöldi kominn með ,,haustlínuna,,
Já það er eins gott að tolla í tískunni jafnvel þó maður sé bara rolla.
Fyrir stuttu fór einn kynbótahrútur frá okkur það var mókollóttur garpur sem að hlaut nafnið Lokkur Hlíðar frá Hallkelsstðahlíð. Til lukku með kappann Benni og Sigga.
Vonandi verður hann sér og sínum til sóma á nýjum slóðum.
Þá eru það þessar gömlu..................
Og þá er komið að gamla bæ dagsins hvar stóð þessi bær í Kolbeinsstaðahreppi???
Skrifað af Sigrún Ólafsdóttir
05.11.2010 23:07
Gamlar myndir með nýjum fréttum
Þessi mynd var tekin fyrir ,,nokkrum,, árum sko þegar ég var ung og Gjósta folald.
Í dag var brunað uppí Lundareykjadal nánar tiltekið að Kistufelli en þar hafa þrír folar verið í geymslu hjá Tómasi bónda í sumar. Ég tók nokkrar myndir en tæknin var eitthvað að stríða mér svo að ég verð sennilega að bíða eftir að tæknimaður heimilisins komi heim og bjargi málunum. Folarnir sem þarna voru í geymslu eru Kátur sonur Auðs frá Lundum og Karúnar, Léttlindur sonur Hróðs frá Refsstöðum og Léttar og Blástur sonur Gusts frá Hóli og Kolskarar. Þeir litu ljómandi vel út og höfðu greinilega haft það gott hjá Tómasi bónda.
Myndir koma síðar.
Ég og Þóra frænka mín með tvö lömb sem að ég held hafi verið undan henni Heimalingsgolsu minni. Takið eftir uppstillingunni myndin gæti heitið ,, snúum bökum saman,,
Þar sem að ég hef safnað að mér fullt af gömlum myndum sem að ég er að manna mig uppí að setja hér inní albúmin ætla ég að koma með smá sýnirhorn.
Byrja á mér og mínum svo að þetta valdi ekki titringi............
Hér er svo annað hús sem að eitt sinn stóð í Kolbeinsstaðahreppi, vitið þið hvar?
Skrifað af Sigrún Ólafsdóttir