Færslur: 2009 Ágúst
31.08.2009 16:55
Ungfrú Trilla Gaums......
Á þessari mynd sjáið þið hana Trillu litlu Gaums og Skútudóttir, hún fór með mömmu sinni til Glyms frá Skeljabrekku á föstudaginn. Það passaði ljómandi vel fyrir okkur að það var sónað frá höfðingjanum á föstudaginn svo að við komum heim með Létt fylfulla ca 20 daga.
Trilla litla er bara bráð snoturt folald og sýnir allan gang en fer þó mest um á tölti.
Hún var vandlega skoðuð áður en hún fór uppá kerruna og lét sér það vel líka að fá mikla athyggli. Verður líklega eins og Snekkja systir hennar spök og stillt frá fyrsta degi.
Um helgina var ansi líflegt hjá okkur og margir litu við sumir til að veiða aðrir til að skoða hrossin sín og enn aðrir að skoða okkur og jafnvel heimalingana. Bara gaman að sjá ykkur.
Við vorum líka svo heppin að hún Hildur kom hérna vestur og hélt uppá afmælið sitt svo að við mættum í þessa fínu veislu í því efra á laugardaginn.
Veðrið þessa dagana er nú ekkert sérstakt rok og ansi kalt eins gott að það verði betra um réttirnar eins og ég var víst búin að lofa.
Skrifað af Sigrún Ólafsdóttir
26.08.2009 23:05
Töðugjöd skítmokstur og sónar
Vá nú var blíða í Hlíðinni í dag 15 stiga hiti logn og smá úði öðru hvoru frábært útivistarveður fyrir menn og skepnur.
Það voru eiginlega hálfgerð töðugjöld hér í Hlíðinni í dag þó er ennþá verið að velta vöngum yfir því hvort eigi að slá há á nokkrum stykkjum. Það verður nú að segjast eins og er að heyskapurinn hefur nú oft gengið betur. Endalausar bilanir voru að stríða okkur og bið eftir varahlutum var löng og ströng. Ég hef sterkan grun um að einhverjir púkar hafi verið hér á sveimi til að tefja fyrir heyskapnum, vona bara að þeir fari að snúa sér að einhverju öðru og jákvæðara verkefni.
En allt hafðist þetta og eitthvað vel á annað þúsund rúllur komnar í stabbann.
Mummi byrjaði að moka út úr haughúsinu undir fjárhúsunum í dag, þannig að hann hefur verið í djúpum skít í orðsins fyllstu merkingu. Nú skal dreift með stæl næstu dagana. Það styttis í að hann fari norður að Hólum í skólann og ég er farin að halda að hann ætli að klára næstum ,,allt,, áður enn hann fer. Ekki slæmt fyrir okkur...............
Í gær var sónað og sónað og sónað.................allavega var hún Edda dýralæknir búin að vera að frá því klukkan 6 í gærmorgun þegar hún kom til okkar kl 24.oo í gær. En allt gekk eins og í sögu og um kl 2 var hún búin að upplýsa allan sannleikan sem var í boði hjá hryssunum hér á bæ. Ég verð að játa að ég var nú orðin syfjuð þó að ég hafi ekki vaknað kl 6 en Edda var eldhress og hreint ekkert syfjuleg að sjá.
Byrjað var að sóna í Hólslandi þar sem að Sporður frá Bergi var búinn að sinna miklum fjölda af hryssum. Útkoman var mjög góð og næstum allar hryssurnar fylfullar.
Frá okkur voru tvær hryssur hjá honum þær Sunna og Karún mín, báðar vor fylfullar.
Svo var líka vinkona mín hún Venus frá Magnússkógum hjá honum og að sjálfsögðu fylfull.
Hér heima sónuðust Skeifa gamla og Upplyfting báðar fylfullar við Gosa og Tign aftur við Sparisjóði auk þess dömur frá öðrum eigendum sem ekki verða taldar upp hér.
Ég er afar ánægð með að Tign er fengin með Sparisjóði því ég er svo ánægð með hann Kost minn þið munið litla stóðhestinn sem ég sýndi ykkur myndir af um daginn.
Ein dama bættist við hjá Sparisjóði í gær.
Trilla litla Gaums og Skútudóttir dafnar vel og nú fer að styttast í að hún fari í sitt fyrsta ferðalag á ævinni. Það verður sennilega á föstudaginn sem hún breggður undir sig betri fætinum eða dekkjunum og leggur í hann. Nánar frá því síðar.......
Ég fékk fyrirspurn um það afhverju væru ekki fleiri myndir af Sparisjóði inná síðunni.
Á því eru tvær haldbærar skýringar önnur er sú að hann verður ekki nægilega oft á vegi mínum þegar ég er vopnuð myndavél. Hinsvegar er hann eins og eigandinn ferkar lítið fyrir að vera þeim megin við myndavélina nema að vel yfirveguðu ráði. Það er ekki gaman að lenda inná mynd ógreiddur, nývaknaður, hrukkóttur eða illa fyrirkallaður.
Svo má ekki gleyma því að stundum geta verið kíló á þvælingi sem hreinlega myndast ekki vel nema þau séu rétt staðsett.
Skrifað af Sigrún Ólafsdóttir
24.08.2009 20:59
Skúta loksins köstuð og smá myndasaga frá vorinu.
Loksins, loksins kastaði hún Skúta hans Mumma brúnni hryssu undan Gaumi frá Auðsholtshjáleigu. Ég var búin að bíða með myndavélina á lofti í allan gærdag því þá var orðið ljóst í hvað stefndi. Mjólkin bunaði úr henni frá því um hádegi í gær. En Skúta var sniðug og ákveðin í því að láta engan ná myndum af þessu svo að hún kastaði í svartamyrkri í nótt.
Hryssan hefur hlotið nafnið Trilla í höfuðið á ömmu sinni.
Á föstudaginn kom hún Rák heim eftir skemmtilega sumardvöl hjá gamla höfðingjanum Pilti frá Sperðli. Hún sónaðist fylfull eins og til var ætlast svo nú er bara að bíða spennt eftir afkvæminu næsta vor.
En vitið þið hvað ???? mér finnst örstutt síðan í sauðburði.................
........þá voru allar stíur fullar af fé og meira að segja á tveimur hæðum sumstaðar.
Þá kom líka Ansu frá Finnlandi að hjálpa okkur.............eins og reyndar fullt af öðru góðu fólki.
.......ég og Hrannar reyndum að hugsa eitthvað gáfulegt..........sem að sjálfsögðu tókst.
Snotra og Astrid voru stundum þreyttar......................
..............................................en Lalli notaði tímann vel og hugleiddi lífið og tilveruna (stelpur eru sko í tilverunni).
Næturvaktin gat verið stembin sérstaklega á daginn...................maður verður samt að fá lit.
...........en þegar sauðburðurinn var búinn urðu sumir hoppandi kátir...............
................því þá fæddust folöld.
Smá leikur að myndum, alltaf skemmtilegt að rifja upp góðar stundir.
Á morgun verða sónaðar fleiri hryssur svo að ég get þá sagt ykkur meiri fréttir.
Skrifað af Sigrún Ólafsdóttir
20.08.2009 22:26
Úti er alltaf að snjóa.........nei sem betur fer bara slydda
Þetta er nú ekki grín...............það gránaði í fjöllin áðan og það er 20 ágúst. Reyndar hefur Geirhnjúkur gránað einu sinni áður í sumar en núna náði þessi grái niður um allt. Hellisdalur, Tindadalir, Skálarhyrnan, Snjó og Þverdalur.............grátt og ekki gaman.
Vona að berin frjósi ekki strax og kuldinn nái ekki í kartöflugarðinn.
Það var allavega ógeðslegt veður í kvöld þegar við smelltum hrossunum inn ekki gott fyrir þau greyin að fá slyddu ofan í svitann. Mér fannst þau bara fegin að fá að vera inni í nótt, smá tilbreyting þar sem þau koma alltaf inn á morgnanna og fara út á kvöldin.
Annars er búið að vera ýmislegt stúss í gangi í dag, ég brunaði eina ferð til Reykjavíkur (að sjálfsögðu á löglegum hraða ) að sækja varahlut. Þessar elskur í Vélfangi voru sneggri en við áttum von á og því allt tilbúið í dag.
Takk fyrir góða þjónustu nú í þessu bilannafári Vélfangsmenn og Skipanesdrengir.
Á morgun þarf að sækja eina hryssu sem vonandi kemur fylfull heim og ýmislegt fleira er á döfinni. Það er því best að fara bara að skoða koddann.
Skrifað af Sigrún Ólafsdóttir
19.08.2009 22:37
Eins og gerst hafi í gær............og smá golf með.
Fyrsta hrossaeignin mín hún Skjóna þarna með eigandann á baki og folaldið er Litbrá.
Eins og gerst hafi í gær.............................eða þannig, þessi mynd var tekin fyrir örfáum árum að mér finnst. En árin eru nú orðin þó nokkuð mörg ég ætla ekki að segja ykkur hvað þau er mörg. Takið eftir þessum flotta bakgrunni á myndinni þessum fínu kusum sem eitt sinn voru til hér í Hlíðinni.
En eitt hefur ekki breyst frá þessum tíma, ég er alltaf jafn veik fyrir skjóttum hrossum það eldist sennilega seint af mér. Núna bíð ég bara spennt eftir því að fá folald undan Andrá minni sem fór undir Þrist frá Feti í sumar. Hulda vinkona mín er sannfærð eins og ég að það verði skjótt hryssa.................og þá kemur nafnið Huldumey sterklega til greina.
Veðrið í dag hefur nú verið full haustlegt fyrir minn smekk strekkingur og rigning. Mér finnst alltaf verra að venjast venjulegu haustveðri eftir gott sumar er hreinlega orðin of kröfuhörð.
Hugsa um það daglega hvort að verið verði nú ekki örugglega betra í leitunum en í fyrra.
Er að herða mig uppí að verða sannfærð og fullviss um að það verði ótrúleg blíða samt ekki of heitt fyrir kindur í nýjustu ullartískunni.
Það er alltaf svo spennandi að fá fréttir af hrossum sem við höfum átt. Í gær talaði ég við eina vinkonu mína sem að eignaðist hryssu frá okkur fyrir nokkrum árum. Hryssan var nýbúin að eignast folald og heldur betur lukka með litinn brúnblesótt og ,,bláeygt,, örugglega margir búnir að bíða lengi eftir því að fá svona lit.
Fínn bónus sérstaklega þegar hryssan er bara brún en samt fyrir mestu að fá góðan grip sem vonandi passar í hlutverkið sem honum er ætlað.
Ég er kannske svo skrítin að mér finnst miklu meira gaman að fá svona fréttir og gleðjast með eigandanum en að velta mér uppúr einhverju leiðinda daglegu þrasi sem kannske telst meira fréttnæmt og gáfulegra.
Ófeigur og Þorri eru bara sprækir eftir ,,herraklippinguna,, sem þeir fengu hjá honum Rúnari í fyrradag. Raunar svo sprækir að mér var farið að detta í hug að Skúli og Rúnar hefðu bara farið í golf þennan dag og sleppt öllum klippingum.
Feðgarnir á þessum bæ eru ennþá með töluverða golfdellu og hafa öðru hvoru skroppið af bæ í sumar til að lumbra á kúlunum. Mér finnst frábært hjá þeim að líta uppúr puðinu og breyta til. Ég hef velt þessu sporti fyrir mér en ekki fengið svo mikið sem snefil af löngun til að spreyta mig. Er samt viðbúin ef að kastið kemur að leggjast niður og láta það líða hjá.
Skrifað af Sigrún Ólafsdóttir
18.08.2009 21:48
Góður Aldur og Viðja týnd
Ef að þessi dama sem er á myndinni yrði reið og vildi reyta hár sitt hefði hún af nógu að taka.
Þetta er hún Skúta sem þarna er í andlegri íhugun.......................og er ekki köstuð ennþá.
Í dag var sónað frá honum Aldri frá Brautarholti sem var í girðingu í Fellsöxl, útkoman var góð og velflestar hryssurnar fylfullar.
Já ég var heldur betur kát þegar ég var búin að fá niðurstöðurnar það voru nefninlega þrjár hryssur sem mér var umhugað um og allar fylfullar. Fyrsta er að telja Kolskör mína sem sónaðist með eins og hálfsmánaðar fyl, þá var það hún Þríhella sem var með hátt í tveggja mánaða fyl og svo Perla Gustsdóttir frá Lambastöðum sem var með mánaðar gamalt fyl.
Ég bíð mjög spennt eftir að sjá þessa gripi næsta vor.
Á meðan ég man...............ef að einhver hér á mínum slóðum rekst á þriggja vetra dökkmósótta hryssu í óskilum þá endilega látið mig vita. Hún Viðja mín er týnd reyndar búin að vera það svolítinn tíma en það gerir ekkert til að vera bjartsýn og kanna málið.
Skrifað af Sigrún Ólafsdóttir
17.08.2009 22:14
Blíðan, mikilvægar dagsetningar og vandaðar lýta aðgerðir
Veðrið í dag var skemmtilegt sól, blíða og svo helli rigning sem kom beint niður. Á eftir dembunum var allt svo hreint og fallegt. Eftir kvöldmatinn fór svo Mummi út og tók nokkrar góðar myndir sem að vonandi koma inná síðuna fljótlega.
Ég er ekki viss um að bræðurnir Ófeigur og Þorri eigi eftir að minnast þessa dags með sérstakri ánægju í framtíðinni. Þetta var nefninlega dagurinn sem að þeir bræður fóru í ,,lýta aðgerð,, svona á frekar viðkvæmum stað. Þeir fóru í bíltúr til hans Rúnars dýralæknis í Stykkishólmi og komu hálf þynnkulegir til baka. Þar sem ég taldi þetta frekar slæma lífsreynslu þá fengu þeir félagar lifrapylsu í kvöldmatinn.
Ég fór á fund með sauðfjárbændum og forustumönnum þeirra í Búðardal í dag. Þetta var ágætis fundur en ég verð að játa að ekki varð ég nú bjartsýnni eftir hann.
Sagði ekki einhver spekingur að maður ætti alltaf að búast við því versta en vona það besta.
Ég vona það allra allra besta....................
Svona til upplýsinga fyrir þessar elskur sem hafa komið til okkar undanfarin haust og smalað með okkur og réttað koma hér nokkrar mikilvægar dagsetningar.
Fyrsta smölun og réttir verða hjá okkur 17-20 september.
17 sept byrjað að smala hér í kring Múlinn og fleira.
18 sept aðalsmalamennskan í Hafurstaðafjalli (mig dreymir um að fá sem flesta) lofa betra veðri en í fyrra.
19 sept Vörðufellsrétt.
20 sept safnið rekið inn og réttað hjá okkur.
Er þegar byrjuð að huga að því að elda, baka og b..... sjáumst vonandi sem flest.
Sé til þess að rykið verði þurkað af gítarnum.
Skrifað af Sigrún Ólafsdóttir
16.08.2009 23:22
Járningar og hagfræði úttekt í kartöflugarðinum heima
Þessir voru kátir og einbeittir þegar ég mætti þeim í léttri sveiflu útá vegi um daginn.
Fannar og Mummi.......................gaman saman.
Um helgina hefur verið járnað og járnað og járnað meira. Svo að nú segir það sig sjálft að þau mál eru í mun betri farvegi en fyrir helgi. Margir folar sem ekki hafa verið járnaðir fyrr eru nú komnir á járn og flestir bara verið mjög þægir í járningu.
Það hefur verið líflegt í hesthúsinu og nokkrir hestar hafa skipt um lögheimili og mál annara í skoðun. Í vikunni koma svo líklega einhverjar hryssur heim sem hafa verið hjá stóðhestum.
Alltaf svo spennandi að sjá hverjar hafa haldið og hvernig folöldin líta út eftir nokkra vikna dvöl annars staðar.
Fyrirmyndarhestur dagsins var hann Þeytingur sem gerði allt eins og til var ætlast í sínu dagsverki.
Í kvöld ákvað ég að nú væri orðið tímabært að kanna uppskeruna í kartöflugarðinum (heima). Ég verð að taka það fram að garðrækt er ekki sérgrein mín þó svo að ég hafi alltaf látið mig hafa það að framkvæma einhver afrek þar. Er skemmst frá því að segja að kella rauk af stað með fötu og fork að vopni. Stakk upp nokkur kál og týndi þessar fínu kartöflur í fötuna. Fljóttlega gerði ég mér þó grein fyrir því að samkvæmt minni hagfræði væri ekki skynsamlegt að taka upp meira en sýnishorn. Það eru nefninlega meiri líkur á að uppskeran vaxi í garðinum en pottinum heima. Ég vona að þessi hagfræði reynist rétt og ég raunar treysti bara á það.............. svona er nú gott að vera bara sinn eiginn hagfræðingur og bera enga ábyrgð frekar en sumir aðrir. Bara bíða og vona að uppskeran verði mikil og stór.
Um helgina var hér fullt af veiðimönnum sem gerðu það bara býsna gott. Ég hef haft fregnir af nokkrum tuga fiska sem komu á land og nokkrum stórum og matarmiklum.
Það er gaman að núna er ennþá líflegt á tjaldstæðinu, stundum hefur allt verið búið eftir verslunnarmannahelgi.
Skrifað af Sigrún Ólafsdóttir
15.08.2009 00:00
Tíminn er fljótur að líða....
Mói og Kátur tuskast................... myndin er tekin 5 júní 2009.
Það er skrítið hvað tíminn líður hratt mér finnst að það hafi verið vetur í fyrradag vor í gær og nú eigi að vera endalaust sumar. En það er nú öðru nær. Það styttist óðum í haustið krakkarnir fara að yfirgefa okkur og skólarnir að byrja.
Fyrir mörgum árum sagði vinnkona mín þá á níræðisaldri mér að ef að mér finndist helstu stórviðburðir ársins næstum ná saman þá væri ég í góðum málum og nyti lífsins.
Hún tíundaði fyrir mig hvaða atburðir væru hæfir til að teljast stórviðurðir og viðmiðunnarhæfir í þessu sambandi. Það voru jólin, þorrinn, páskarnir, sauðburðurinn, heyskapurinn, berjatýnslan, kartöfluupptakan, réttirnar, sláturtíðin og bændahátíðin.
Þetta nær allt saman hjá mér svo að ég hlýt að vera í góðum málum á reyndar fullt í fangi með að fylgjast með þessu öllu.
Ég er reyndar svo heppin að geta alls ekki gert uppá milli hvaða árstími er skemmtilegastur.
Það er allt gott að frétta úr hesthúsinu mikið riðið út í dag og þó nokkur gestagangur þar.
Nokkur tryppi hafa verið að stíga sín fyrstu skref með knapa á bakinu síðustu daga og alltaf eru hestar að koma og fara.
Fyrirmyndarhestur dagsins í dag var hann Muggison skemmtilegur fjögura vetra foli sem að Mummi á undan Skeifu Oturs og Mugg Faxasyni.
Rétt svona í lokin.................það væri nú gaman ef að þið sæuð ykkur fært að skrifa í gestabókina hér á síðunni. Það er svo skrítið að fá fullt af gestum alla daga og hafa ekki hugmynd um hverjir þeir eru.
Skrifað af Sigrún Ólafsdóttir
14.08.2009 00:30
Snotra hugsar og húsfreyjan tuðar
Ekki trufla mig ég er að hugsa........................
Það var gott veðrið í Hlíðinni í dag já alveg snildar útreiðaveður. Logn, hlýtt og smá úði.
Dagurinn byrjaði með svolitlu fáti þar sem að ég hafði yfir hlaðið fyrstu klukkustundir hans ótæpilega. Það er nefninlega þannig að bókhald og reddingar taka alltaf 5 sinnum lengri tíma en ég held í upphafi. Hlutverkin voru líka full fjölbreytt fyrir hádegi gjaldkeri, símadama, þvottakona, sauðfjárbóndi og kokkur. En allt hafðist þetta af og maturinn var tilbúinn fyrir gestina, þvotturinn þveginn, síminn þagnaði og bréfin í póst. Eftir hádegi varð þetta skaplegra og ég varð bara ,,rólegur,, tamningamaður og ,,virðuleg,, húsfreyja.
Sem sagt góður dagur eins og þeir lang flestir eru.
Enn veiðist ljómandi í Hlíðarvatninu og þónokkuð margir hafa bleytt öngla þar undanfarna daga. Tjaldstæðin hafa verið mikið notuð og margir enn að njóta sumarsins.
Eins hafa margir lagt leið sína uppí Krakavatn og veitt bara nokkuð vel allavega sumir.
Flestir okkar veiðimenn eru fyrirmyndarfólk sem að gengur vel um landið en því miður eru alltaf svartir sauðir innanum. Kunningjar okkar sem fóru uppí Krakavatn í gær höfðu frekar slæma sögu að segja okkur af umgengninni við vatnið. Þar bar fyrir sjónir ýmislegt rusl og dót sem að alveg er bannað að skilja eftir á viðavangi. Gler og dósir, girni og plast svo að eitthvað sé nefnt. Það er alveg ótrúlegt að fólk geti borið með sér ýmislegt dót uppá fjall en þegar að einungis umbúðirnar eru eftir getur það ekki tekið þær með sér heim.
Þið sem eigið eftir að fara þarna upp endilega takið nú ruslið ykkar með heim það er svo leiðinlegt að þurfa að setja sig í tuð gírinn yfir því sem á að vera sjálfsagt.
Skrifað af Sigrún Ólafsdóttir
12.08.2009 22:50
Góðir krakkar
Það var oft þétt setið við eldhúsborðið í sumar, þarna eru þau Jón Ben vísnaskáld, Nikulás girðingameistari, Ansu tamningakona frá Finnlandi, Linda systir hennar og Astrid hestaþjónn frá Danmörku. Hörkulið hress og skemmtileg. Við hin sem að teljumst heimilisfólk litum hreinlega ekki nógu vel út fyrir myndatöku.
Það skal tekið fram að það var matur á pönnunni í upphafi borðhalds.
Þarna getið þið séð að það er bara nokkuð gaman að vaska upp og ganga frá í eldhúsinu, það er helst að Salómon sé efins.
Þessi mynd heitir ,,Sveitapiltsins draumur,, þarna er Nikulás Rúnar að hamast við að fela enda. Yfirmaður endafelinga................hefur sennilega falið á annað þúsund enda í sumar.
Þarna eru Ansu og Freyja saman á góðri stund og brosa báðar út í annað. Ætli það sé svona gott veður í Finnlandi núna????
Þarna eru tveir félagar í slökun þessi mynd er tekin í brekkunni á Kaldármelum þegar íþróttamótið var haldið þar í vor.
Hvað þeir eru að hugsa er ekki gott að vita, kannske eru það tamningar og girðingavinna.....................?????? Nei sennilega ekki.
Skrifað af Sigrún Ólafsdóttir
11.08.2009 22:29
Sparisjóður með heimilishjálp og fleiri góðir viðburðir.
Sumum er hreinlega gefið meira sjálfstraust en öðrum...........þarna er hann Kostur minn að reyna að aðstoða föður sinn. Honum hefur líklega fundist full mikið annríki hjá Sparisjóði og ákveðið að vera hjálpsamur sonur. Hann er allavega sannfærður um að þetta geti hann vel.
Það hefur fjölgað ört hjá Sparisjóði síðustu daga og í gær fékk hann þrjár eðaldömur til sýn sem að honum er ætlað að þjóna. Ein af þeim er Klara vinkona mín frá Lambastöðum, en hún eignaðist um daginn rauða hryssu undan Dyni frá Hvammi. Við erum stórhrifin af þessu folaldi og hreyfingarnar er stór glæsilegar. Aldeilis spennandi gripur.
Við fórum í gær og kíktum á hann Hlyn og Edda sónaði hjá honum hryssurnar. Útkoman var nokkuð góð og vonandi nokkrir fyrirmyndar reiðhestar á leiðinni. Hlynur leit frábærlega út og var eins og ungur reiðhestur í toppþjálfun...............algjör kroppur.
Helgin hér í Hlíðinni var hreint frábær við fengum góða gesti sem að komu hér með hestana sína og riðu út með okkur. Við fengum gott veður og riðum skemmtilega leið um slóðir sem að margir af gestunum höfðu aldrei farið. Í stuttu máli og á tungu heimamanna......út hjá Heiðarbæ, niður hjá Höfða, Gjánna og niður að Rauðamel. Þar var stoppað og þegið kaffi sem að ein úrvals húsfreyja úr sveitinni kom með til okkar. Að því búnu var riðið ,,upp hraun,, og heim að Hraunholtum síðan var riðið heim í Hlíðina. Þar hitnaði í kolunum í orðsins fyllstu merkingu og undir miðnættið voru allir orðnir saddir og sælir.
Þökk sé íslensku sauðkindinni einu sinni enn...................
Á sunnudaginn var síðan tekinn annar reiðtúr og þá héldu gestirnir heim á leið.
Já það er alltaf gaman að hittast og rifja upp góðar stundir með fyrrverandi samstarfskonum mínum úr Sparisjóði Mýrasýslu. Takk kærlega fyrir komuna það var gaman að fá ykkur öll.
Mummi smellti sér norður á Hvammstanga um helgina og tók þátt í íþróttamóti þar. Fór hann með kappana Fannar og Dregil. Hann var bara nokkuð kátur með árangurinn (sjá úrslitin inná http://thytur.123.is/
Mig er farið að hlakka til að skreppa í stóðréttirnar í haust og hitta ferðafélagana góðu frá því á fjörunum í sumar.
Hann Jón Ben yfirgaf okkur síðasta föstudag eftir góða samveru í sumar vonandi birtist hann sem fyrst aftur. Læt hér fylgja með vísukorn sem að hann skyldi eftir sig.
Hlátursóminn heyra má
frá álfum á Hafurstöðum.
Þar var ekkert borið á
því bila nú tæki í röðum.
Nú er að líða undir lok
bilanna sumar mikið.
Og allir komnir með uppí kok
af heyskap fyrir vikið.
Þetta þarfnast frekari skýringa fyrir þá sem ekki til þekkja..............það kemur síðar.
Skrifað af Sigrún Ólafsdóttir
11.08.2009 00:43
Kella sibbin.............
Var að koma heim eftir mjög langan dag, hef fullt af fréttum að færa ykkur en er svo syfjuð að það er ekki möguleiki á því að skrifa eitthvað af viti. Stend mig vonandi betur á morgun.
Góða nótt og hafið það sem allra best.
PS í dag sá ég eitt það fallegasta folald sem ég hef séð um æfina...............og hef ég nú séð þau nokkur. Meira um það á morgun.
Góða nótt og hafið það sem allra best.
PS í dag sá ég eitt það fallegasta folald sem ég hef séð um æfina...............og hef ég nú séð þau nokkur. Meira um það á morgun.
Skrifað af Sigrún Ólafsdóttir
05.08.2009 23:13
Ánægjuleg sónarskoðun........alveg 100%
Þessi hestur heitir Muggur og er hér í tamningu hjá okkur, ég dauðöfunda frúnna sem á hann.
Góður dagur að kveldi kominn og þá er rétt hjá húsfreyjunni að setjast niður og rifja upp ,,sumt,, af því sem gerðist hér í Hlíðinni í dag.
Það var sónarskoðað hjá honum Sparisjóði í dag og kom þá í ljós að fylprósentan er 100% ennþá.
Það var ljómandi gott að geta aðeins fækkað hjá honum því að síðast í gær var að bætast við í dömuhópinn hjá honum. Fullt að gera hjá kappanum.
Á mánudaginn verður svo sónarskoðað hjá honum Hlyni inná Lambastöðum og verður spennandi að sjá hvernig það kemur út.
Annars var heil mikið riðið út hér í dag og svo komu hér nokkrir að skoða hross. Stóðið sá ástæðu til að ösla langt útí vatn og koma heim á tún með tilheyrandi látum. Fáir höfðu húmor fyrir þessum leik og fóru vaskir sveinar með rafmagnsgirðinguna eins langt útí vatn og tæknin leyfði. Var tækifærið notað og nokkrir folar teknir höndum og settir í megrun.
Verð að segja ykkur eitt svona í trúnaði.............. ég ætla ekki að skrifa um landbúnaðartæki og viðhald þeirra eða pólitík hér í kvöld. Ástæðan er einföld ég verð svo geðvond af því.
Það verður því að bíða betri tíma.
Í dag var algjört met í heimsóknum á heimasíðuna okkar 290 heimsóknir sem er frábært. Takk fyrir innlitið alltaf ánægjulegt að fá heimsóknir hvort heldur það er í hlaðið eða á síðuna.
Skrifað af Sigrún Ólafsdóttir
05.08.2009 11:15
Söluhross
Nú hafa ný söluhross bæst við á síðuna undir hnappnum ,,söluhross,,
Endilega hafið samband ef að við getum eitthvað aðstoðað ykkur.
Skrifað af Sigrún Ólafsdóttir
- 1
- 2