Færslur: 2011 Ágúst

30.08.2011 23:17

Geiri kallinn.



Fyrir nokkru síðan var ég á ferðinni og smellti þá þessari mynd af honum ,,Geira,, kallinum.
Þetta er konungur fjallanna hér í Hlíðinni Geirhnjúkur sem að gnæfir yfir Hnappadalnum.
Það hafa margir gengið á fjallið í sumar og haft gaman af þó svo að aðeins taki það nú í að röllta upp.
Örlítill skafl er eftir þegar myndin er tekin en hann veður örugglega farinn um  leitir.
Myndin er tekin af Heggsstaðamelunum.



Og þegar ég snéri mér við þá var það Gullborgin og Rauðakúlan gægðist aðeins upp fyrir hraunið. Smá tilbreyting frá öllum hestamyndunum.

Það var gestkvæmt í Hlíðinni þennan daginn, góðir gestir að skoða og sumir að sækja hross í tamningu. Við erum líka farin að huga að því að sleppa ungu tryppunum sem að hafa verið í þjálfun síðan í vetur og vor. Kominn tími á haustfrí fyrir þau nóg er þó eftir og enn bætist við á næstunni.

Varahlutir og viðgerðir...................æi nei við skulum ekkert vera að ergja okkur á því strax.

29.08.2011 23:39

Kellurnar í kellureið.



Hún Astrid okkar brunaði norður að Hólum í dag en þar er hún að hefja nám á fyrsta ári hrossabrautar.
Gangi þér allt í haginn Astrid, vonandi verður þetta bæði til gagns og gamans.
Myndin hér fyrir ofan var tekin í kvennareiðinni góðu af þeim stöllum Sirrý á Hjarðarfelli og Astrid.

Ég var fyrir nokkru búin að lofa myndum úr fínu kvennareiðinni sem að við kellurnar fóru í þann 13 ágúst s.l



Þarna brunar hersingin innað Hafurstöðum og eins og glöggir og kunnugir sjá þá er Hlíðarvatn horfið um stundarsakir úr Hafurstaðalandi.



Fyrsta áning var í túninu á Hafurstöðum, það fór bara vel um flesta eins og sjá má.



Svo var riðið suður fyrir Sandfell og niður með Draugagili þar sem að við stoppuðum og kallarnir komu færandi hendi til okkar.
Þarna eru t.d þrír hressir Einar bóndi í Söðulsholti, Halldór og Mummi.



Já, já þetta var bara gaman Einar, Guðný í Dalsmynni og Laufey húsfreyja á Stakkhamri.



Þarna leggur hópurinn af stað úr Draugagilinu og lét ekki á sig fá þó að lognið í Hnappadalnum færi svolítið hratt yfir.



Eins og þið sjáið var þema dagsins ,,RAUÐUR,, sumar klæddust rauðum fötum aðrir voru með rauðan varalit, nokkrir hestar voru venjufremur rauðskjóttir og jafnvel með tjull í stertinum.



Það var svolítið napurt þennan dag og eins gott að vera vel klæddur og helst í rauðu.



Svo var grillað um kvöldið á tjaldstæðunum í Hlíðinni og ég verð nú að segja ykkur það í trúnaði að ekki var hitastigið hátt sem að kellunum var boðið uppá við borðhaldið.



.............en það var samt gaman eins og sjá má.



Skál fyrir flottum kellum og góðum degi.


27.08.2011 22:37

jamm og já.



Andrúmsloftið hefur verið mjög afslappað í hestagirðingunum síðan við komum heim úr hestaferðinni góðu.
Á myndinni eru nokkur sparihross hérna við eldhúsgluggann hjá mér að að undirbúa sig fyrir nóttina. Baltasar, Ríkur, Krapi, Skriða og Proffinn.

Annars var fyrsti vinnudagurinn hjá hestunum eftir hestaferð í dag þ.e.a.s nokkrum af þeim.
Hópur af erlendum gestum kom hér og tók sér reiðtúr í blíðunni, hestarnir vour mjög ánægðir með að þetta var ekki nema tveggja tíma túr og hrósuðu happi að mér datt ekki í hug að taka annan átta daga hring. Já hestar hugsa ég sver það...................................

Á morgun eigum við svo von á góðum gestum sem koma til okkar að líta á hross.

Eftir góða daga í hestaferð var rokið af stað að keyra heim rúllur og til stóð að slá örlítið meira svona til að eiga örugglega nóg fyrir alla í vetur. En það verður að bíða í nokkra daga þar sem að ,,mánudagur,, búsins sagði stopp þ.e.a.s glæsigripurinn Claas Ares 657 sem er í sjálfteknu frí þar til viðeigandi varahlutir berast.
Já þessi elska er nú frekar heilsulaus verð ég að segja...............en heilsa er ekki öllum gefin.

Í gær var brunað með Kát minn suður að Kistufelli þar sem að hann skemmtir sér á meðal ógeltra glæsigripa næstu vikurnar. Hann hefur staðið í ströngu við að ,,skemmta,, hefðar hryssum sem að hafa komið hingað til hans í heimsókn.
Ég fór og skoðaði Léttlind og Blástur í leiðinni en þeir eru líka á Kistufelli hjá Tómasi bónda.
Þeir litu vel út eins og við var að búast feitir og pattaralegir.
Dimma var ekki fengin þegar sónað var frá litla ,,Glottanum,, svo að hún varð bara eftir hjá honum.

Það var líka í gær sem að Geirmundur KS vinur minn var að spila í samkomuhúsinu við Þverárrétt. Gaman hefði nú verið að skella sér á ball en skökum leti og dvínandi skemmtanafíknar sat ég heima þó með hálfum huga í gær en tómri hamingju þegar ég vakanaði í morgun.






25.08.2011 00:45

Dagur átta í hestaferðinni og sá síðasti.



Þá er það áttundi og síðasti dagurinn í hestaferðinni góðu.
Þarna erum við á heimleiðinni frá Bíldhóli og rétt að verða komin í Mjóadalinn.
Blíðan sveik ekki frekar en fyrri daginn og allt samkvæmt áætlun.



Þarna er að verða örstutt heim stóðið brunar niður Mjóadalinn í átt að Oddastöðum.

Já þetta var alveg snildar ferð í alla staði gott veður, gott fólk og góðir hestar og það sem mest er um vert og ekki sjálfsagt, allir komust heilir og glaðir heim bæði menn og hestar.
Síðasti spretturinn heim er alltaf sérstakur en þá fá hestarnir auka ,,hestöfl,, lifna við og leggja sig fram af öllum mætti.

Þeir sem að riðu með í dag voru: Mummi, Skúli, Astrid, Arnar, Haukur, Randi og ég.
Það var hress og kátur hópur sem að settist til borðs hér í kvöld eftir velheppnaðan dag.
Já og vitið þið hvað ?  Að sjálfsögðu vorum við að skipuleggja hestaferð í Borgarfjörðinn á næsta ári.
Þessi ferð verður lengi í minnum höfð enda urðu þeir bísna margir sem að komu með stutta spotta eða alla leið.
Þetta var afmælisferð fyrir Hrannar og Björgu sem að verða brátt áttatíu ára .............sko saman lagt, þetta var tamningaferð hjá okkur en síðast en ekki síst sumarfrís og skemmtiferðin okkar.
Takk fyrir samfylgdina, móttökurnar og öll skemmtilegheitin kæru vinir.
Þetta var svo gaman.

23.08.2011 22:28

Dagur sjö í hestaferðinni.



Dagur sjö í hestaferð......................liðið örmagna eða hvað ????
Nei það var nú ekki svoleiðis en bláberin voru ansi freystandi og forreiðarfólkið tók toll á leiðinni. Frábær dagur eins og allir hinir.
Við riðum frá Klungubrekku inn fyrir Litla-Langadal, yfir hjá Vörðufelli að Bíldhóli í dag.



Þarna erum við að leggja af stað upp úr Litla-Langadalnum, snillingurinn Baldursbrá frá Múlakoti kann leiðina betur en nokkur annar og er hér aðeins að laga stefnuna hjá ferðafélögunum.



Landslagið var fjölbreytt og leiðin sem svo oft var farin á árum áður skemmtileg.



Kindurnar voru í eftirlitinu og töldu stóðið sem að rann framhjá.



Þarna er Astrid með Rifu og Tralla Trillubörn í einum fallega áfangastaðnum í dag.

Þeir sem að riðu í dag voru: Mummi, Skúli, Astrid, Þorgeir, Arnar, Sæunn og ég.
Aðeins fækkaði í kvöld þegar að Sæunn og Þorgeir yfirgáfu okkur en nýjustu fregnir herma að við fáum góðan liðsauka á morgun.

22.08.2011 22:37

Dagur sex í hestaferð.



Dagur sex í hestaferðinni var nú með þeim betri verst að það gátu ekki allir verið með þennan daginn. Við riðum frá Skildi Álftafjörðinn að Klungubrekku veðrið gat varla verið betra skýjað, hlýtt og nærri því logn. Ég var búin að ímynda mér að vegurinn væri harður og leiðinlegur en það var nú öðru nær. Ofaníburðurinn er svo leirkenndur að það var mjög gaman að ríða eftir veginum sem að gaf eins konar fjöðrun. Landslagið var stór brotið og stórkostlegt, riðið þar sem hátt var niður í sjó og hamrar fyrir ofan okkur.
Hátt í sjötíu hross voru þæg en nokkuð áframgeng í rekstri.



Svenni yfirtrúss var að sjálfsögðu á staðnum með allt sem að vantar í hestaferð á pallinum.
Þarna er kaffitími í Álftafirðinum Svenni, Sæunn og Arnar að gæða sér á kræsingum.



Já það var líka afmælisveisla í hestaferðinni þennan daginn með vöflum og alskyns bakkelsi.
Þarna er tekið á því í átinu áður en við fórum af stað frá Skildi.

Þeir sem að riðu með í dag voru: Astrid, Þorgeir, Skúli, Mummi, Sæunn afmælisbarn, Arnar og ég.  Svo að sjálfsögðu Svenni yfirtrúss á bílnum.

Á morgun verður svo riðið frá Klungubrekku að Bíldhóli.

21.08.2011 22:07

Dagur fimm í hestaferð



Fimmti dagurinn var góður dagur...................þessi mynd gæti heitið áfram veginn.
Þurftum að fara örstuttan sprett á malbikinu til að komast í náttstað.

Við riðum í dag frá Hjarðarfelli þar sem að hestarnir áttu góðan náttstað og að Skildi í Helgafellssveit. Farið var yfir Kerlingaskarð í blíðu og logni, örlítið var búið að ,,rykbinda,, fyrir okkur á leiðinni en við sluppum alveg við rigningu.
Við rifjuðum upp sögnuna af skessunni og heyrðum glænýja sögu af draug sem að er stundum á ferli þarna uppi. Eins gott að ekki var þoka eða myrkur þá hefðu kannske einhverjir orðið smeikir.



Þessar dömur voru búralegar þegar myndavélin var á ferðinni Sæunn bóndi á Steinum og Astrid.



Kerlingaskarðið er skemmtileg leið og gaman að fara hana í friði og ró með góðu fólki og hestum. Þessi hross voru aðeins að laumast af leið.



Þeir voru slakir í dag þessir kappar, hér eru málin rædd og hugsanlega krufin til mergjar.
Mummi og Haukur Skáneyjarbóndi.



Þessi var aftur á móti djúpt hugsi og hefur örugglega verið komin langt með að skipuleggja margar hestaferðir á næstu árum. Eins gott ég fái stundum að fara með........



Þessi tvö kvísluðust á og voru í einhverju leynimakki og Krapinn fékk ekki einu sinna að vita neitt. Hlýtur að vera hernaðarleyndarmál.................en Muggur brosir.



Við fengum einn góðan sveitunga og ferðafélaga frá fyrri árum til að ríða með okkur í dag en það var hann Hjalti Oddsson sem að eitt sinn bjó á Höfða og síðar á Vörðufelli.
Það var gaman að fá Hjalta í hópinn aftur og að sjálfsögðu var leiðsögnin góð.
Takk kærlega fyrir okkur Hjalti.

Í dag riðu þessir með: Mummi, Skúli, Astrid, Björg, Hrannar,Þorgeir, Arnar, Sæunn, Laufey, Anna, Hjalti, Randi, Haukur og ég.

Á morgun ríðum við frá Skildi að Klungubrekku, falleg leið sem að fáir í hópnum hafa riðið.

21.08.2011 00:50

Dagur fjögur



Dagur fjögur var eins og hinir dagarnir í hestaferðinni algjör snild, það er bara ólýsanleg tilfinning að ríða á fjörunum í svona færi og veðri.
Það getur enginn ímyndað sér það nema hafa prófað og þeir sem að eru í hestamennsku og hafa ekki prófað verða að gera eitthvað í því.
Við riðum frá Tröðum í Stakkhamar þar sem að við fengum ríðandi móttökunefnd þegar við vorum að nálgast bæinn. Áðum svo drjúga stund í Stakkhamri spjölluðum við bændur og riðum svo að Hrísdal. Í Hrísdal fengum við góðar mótttökur og eftir skemmtilegt spjall var riðið að Hjarðarfelli þar sem við geymum hestana í nótt.
Ég hef ekki áður riði leiðina frá Stakkhamri í Hjarðarfell en þetta er skemmtileg leið og með því að fá leyfi hjá honum Ástþóri í Dal að ríða yfir túnfótinn í Dal er þetta bara frábært.
Takk fyrir góðar mótttökur og ánægjuleg samskipti ágætu sveitungar bæði í minni sveit og annara.



Ströndin er bara falleg.....................



...................og mjúk undir fæti.



Og þessir sóluðu sig vel áður en að þeir fóru á fjörurnar.



Hjarðafellsfjölskyldan fjölmennti í hópinn í dag þarna eru Gunnar, Sigríður og Kristín.



Björg í símanum..................hefur sennilega stungið Hrannar af enda á Rík mínum sem bara yngist með degi hverjum í ferðinni.



Það var örtröð á ,,Svennabar,,  þegar við stoppuðum enda heitt í veðri og sólstrandarstemming.



Að sjálfsögðu er boði uppá gleðidrykki öðru hvoru þessi græni fíni sem að Skáneyjarbóndinn er að þamba nefnist ,,pressaðir framsóknarmenn,,
......................honum fannst þeir (framsóknarmennirnir) súrir.



Villtu í nefið ?  ...................   ,,Villtu í nefið vinur minn,,

Þeir sem að riðu með í dag Mummu, Skúli, Astrid, Hrannar, Björg, Þorgeir, Ísólfur, Arnar, Ásberg, Axel, Stefán Logi, Randi, Haukur, Sirrý, Gunnar, Harpa, Kristín, Laufey og aðstoðarkona, Guðný Margrét, Borghildur og ég.
Á morgun ríðum við svo frá Hjaraðarfelli og yfir Kerlingarskarð meira um það síðar.

19.08.2011 21:16

Dagur þrjú og nafn á litlu frænku.



Dagur þrjú í hestaferð var snildin ein eins og við var að búast, veðrið, hitinn, fólkið og hestarnir. Dýrðarinnar dásemd í orðsins fyllstu merkingu sjáið bara svipinn á frænda litla.



Við byrjuðum í Hömluholti en þar var þessi mynd tekin af liðinu áður en við fórum af stað.



Þarna er ,,óreglu,, liðið okkar.......nei djók þau eru alvega að hætta, spurning hvort að þau verði hætt á morgun?



Þarna er strollan að lesta sig við Skógarnes.



Vá hvað þetta er alltaf gaman.......................



Stefnan tekin á sjálfan Snæfellsjökul........................eins gott að stóðið stoppi...........




Eitthvað grín í gangi ..............Hrannar nýfertugi og Randi Skáneyarfrú kampakát í Stakkhamarsnesinu.



,, Sólstrandargæi,,........................það er í góðu lagi að vera ssssólstrandargæi...............í hestaferð.



Þarna er hluti af ferðafélögunum að slaka á þegar komið var að Tröðum.

Þeir sem að riðu í dag voru Mummi, Skúli, Astrid, Hrannar, Björg, Þorgeir, Ásberg, Sigga, Axel, Bjarki, Arnar, Randi, Haukur, Steinunn og ég. Síðan fylgdu Gísli og Hafrún okkur frá Hömluholti. Og vitið það hvað sennilega bætist í hópinn á morgun en þá ríðum við fjörurnar til baka og síðan upp að Hjarðarfelli.

Litla frænka mín hefur fengið nöfn og þau ekki af verri endanum daman heitir Fríða María.
Til hamingju með nöfnin flottu kæra frænka.

18.08.2011 23:27

Dagur tvö og fjölgun í fjölskyldunni.



Einn enn Guðdómlegur dagur á Löngufjörum 17 stiga hiti, logn, sól og blíða ekki amalegt það. Sjáið þið færið og ekki á það nú eftir að versna þegar vestar dregur.

Við riðum frá Kolbeinsstöðum að Hömluholti í dag, gekk ferðin bara vel ,,stálum,, engum hesti svo vitað sé og bara allir kátir.
Þeir sem að voru ríðandi í dag Mummi, Skúli, Hrannar, Björg, Astrid, Þorgeir, Ásberg, Sigga, Axel, Bjarki og svo ég. Síðan komu Gísli bóndi í Hömluholti og Hafrún á móti okkur í Kolviðarnes.
Á morgun bætist svo heldur í hópinn svo að þetta verður heljar hersing sem að ríður að Tröðum á morgun.



Farið yfir Haffjarðará, sniðugt að vera á minnsta hrossinu í hópnum.

Þegar ég var á fljúgandi ferð á fjörunum í dag fékk ég skemmtilegt símtal það var frá mömmu sem var að tilkynna að Hrafnhildur systir og Fransisko hefðu eignast dóttir.
Að sjálfsögðu tók ég því þannig að þessi litla dama yrði efnileg hestakona þar sem að fréttirnar bárust til okkar á þessum stað. Nei nei engin óskhyggja ef að þið haldið það :)
Þá er bara að setja sig í stellingar og vera fyrirmyndar móðursystir, svaka virðulegur titill.

18.08.2011 00:05

Hestaferð..........dagur eitt og að auki örfréttir.



Myndgæðin ekki sérstök en stemmingin góð.........................bóndi úr Borgarfirðinum sennilega að reyna að koma á okkur böndum............eða hvað sýnist ykkur???

Jæja þá erum við komin af stað í árlega hestaferð og að sjálfsögðu er ferðinni heitið beint af augum. Við erum komin með ca 7-8 daga skipulag sem að vonandi breytis ekki stórvægilega.
Við fórum af stað um kl 19.00 og riðum niður að Kolbeinsstöðum með rúmlega 60 hross.
Þeir sem að riðu fyrsta áfangann voru Mummi, Skúli, Astrid, Hrannar , Björg, Þorgeir, Ísólfur, Arnar og ég.  Svenni var svo yfir trússarinn á bílnum, svo er líklegt að einhverjir skelli hestum á kerrur og komi og ríði einhverja daga með okkur. Bara gaman að því.
Við ríðum frá Kolbeinsstöðum að Hömluholti á morgun létt og fín dagleið sem að hæfir vel misþjálfuðum hestum og mönnum. Svo á föstudaginn eru það uppáhaldsfjörurnar sem sagt Hömluholt - Traðir. Þetta er jú sumarfrí er það ekki?

Á morgun verður myndavélin með í för svo að þið fáið kannske smá sýnishorn af ferðinni.

Af öðrum fréttum...................Rák er komin heim fylfull við Dyni frá Hvammi, Upplyfting er fylfull við Gosa frá Lambastöðum og Skúta er fylfull við spari Sparisjóði mínum.

Heyskapurinn gekk bara vel loksins þegar að hann byrjaði og ekki hefur oft verið heyjað allt í sama þurrkinum. Heyfengurinn er minni en venjulega þó úr hafi ræst, nákvæmar rúllu tölur liggja ekki fyrir að svo stöddu við lyklaborðið hjá mér.

Ég þarf svo við tækifæri að segja ykkur frá skemmtilegri kvennareið sem héðan var farin um síðustu helgi. Já heill floti af kellum sem að áttu góðan dag með reiðtúr í kringum Hlíðarvatn og grillveislu um kvöldið.

Ein frekar leiðinleg frétt því að hann Keli vinur minn og yfir músabani veiktist og dó um síðustu helgi. Ég veit ekki hvað kom fyrir en hann varð mikið veikur og hafði það ekki af.
Alltaf leiðinlegt að missa skemmtileg dýr af hvaða tegund sem þau eru, vona bara að honum gangi vel á músaveiðum ,,hinumegin,, en hans er sárt saknað.





09.08.2011 21:06

Réttar dagsetningar....já ég meina sko réttar.



Þessi fénaður hefur verið afar vinsæll hjá ungum gestum hér í Hlíðinni og fengið margar heimsóknir í sumar. Þó eru margir sem að vilja fá að hitta Golsu sem að var yfir heimalingur síðasta sumar en hún safnar kröftum og kílónum í fjallinu.

Ég smellti inn þessari mynd svona í tilefni af því að nú eru komnar dagsetningar fyrir réttirnar hjá okkur hér heima í haust. 
 
Smalamennskur, heimaréttir og fjör 16- 18 september og síðan á Skógarströndinni 24-25 september. Nánari útfærslur koma síðar en svona fyrir okkar sérstöku smalavelunnara er þetta gróft skipulag.

Hellingur af rúllum bættust við í dag og nú eru bara túnin sem að við köllum ,,inní hlíð,, eftir óslegin. Spurning hvort að þau tún bíð á meðan rúllusmölun fer fram ?





09.08.2011 00:11

Fallegur dagur



Þessar dömur máttu engan tíma missa við að bíta gras og fylla magnann.
Þarna eru Birta frá Lambastöðum dóttir Blæs frá Hesti og Fenju frá Árbakka, Ragna frá Hallkelsstaðahlíð dóttir Arðs frá Brautarholti og Tryggðar frá Hallkelsstaðahlíð og Ösp frá Lambastöðum dóttir Hreims frá Þúfu og Flugu frá Lambastöðum.

Enn einn skemmtilegi hestahópurinn kom hér í dag núna voru það Hólmarar, Helgfellingar og fylgdarlið. Nú er bara að leggja á með þeim á morgun og fylgja þeim eitthvað áleiðis.

Heyskapurinn gengur vel það sem af er allt komið í plast sem að við heyjum niður í sveit og hér heima klárast hver bletturinn af öðrum. Eigum þó töluvert óslegið en rúllufjöldinn fer samt að nálgast 900.

Hér á skrifborðinu hjá mér er rollubókin að verða ,,borðföst,, ég er að taka skorpur í því að skár vorupplýsingarnar inn en gengur á ýmsu. Forritið Fjárvís er eflaust bara gott en verður seint kallað heppilegt til notkunnar í lélegu netsambandi. Það rífur í mína þolinmæði að skrá upplýsingar um 700 kindur og þurfa að telja uppá minnsta kosti tuttugu á milli atriða.
Kannske verð ég orðin tamnin og stillt eftir þessa miklu æfingu í þolinmæði.

06.08.2011 00:43

Ljótar og fallegar Rebbasögur

Hún er ljót refasagan sem sögð er í Mogganum í dag en þar segir Sigurjón bóndi á Valbjarnarvöllum frá því þegar refur réðst á fullfrískt lamb og stórskaðaði það. Fleiri sögur voru raktar í blaðinu og eru þær allar á einn veg rebbi gerir skaða og óskunda í búfénaði.
Þessar sögur eru ekki ný sannindi fyrir okkur sauðfjárbændur því refum hefur stór fjölgað og verða sífellt grimmari og aðgangsharðari. Já og svo sannalega ekki bara í sumarhúsabyggðum eins og fjölmiðlum er svo tíðrætt um. Slæmar heimtur af fjalli og óútskýrð vanhöld hljóta að gefa til kynna að einhverjir ,,refir,, gangi lausir.
Ég held að tjónið sem refurinn veldur sé miklu meira en flestir gera sér grein fyrir, það á þá ekki bara við sauðfé heldur hefur fuglalíf á ákveðnum svæðum orðið fyrir miklum skaða.
Ekki er von á góðu í þessum málum á meðan hvorki er geta né vilji hjá sveitafélögum og ríki til að framfylgja þessum lögboðnu verkefnum þ.e.a.s eyðingu vargs.
Já þeir eru margir ,,refirnir,, sem herja á sauðfé og bændur um þessar mundir.

En ég ætla að deila með ykkur skemmtilegri Rebbasögu eða réttara sagt myndum.




Þessi Rebbi fékk að nota stofugólfið að eigin vild og var ekki til vandræða enda undir straungu eftirliti úrvals refaskyttu.
Að auki var hann bláeygður og blíðlyndur allavega svona á mynd...........




Rebbi heillaði mig upp úr skónum og kunni greinilega vel að meta gestagang og athygli.
Þarna er hann að undirbúa sýningu fyrir okkur, sjáið hvað hann er einbeittur á svipinn.



Þarna er Rebbi að stíga villtan dans við vatnsslönguna sem var eitt aðal leikfangið hans og sýningartækið.  Ekki vantaði tilþrifin og sjáið þið fótaburðinn sem er í heimsklassa ?
Já þessi Rebbi er flottur og það sem meira er hann lofði að gera ekki ursla og glæpi í sauðfé og fuglum.............allavega ekki hérna megin.

03.08.2011 23:47

Fréttnæmt nú eða ekki........



Kátur frá Hallkelsstaðahlíð fæddur 2009.
Faðir Auður frá Lundum, móðir Karún frá Hallkelsstaðahlíð.

Nú er Karún mín komin heim eftir góða heimsókn á suðurlandið með staðfest fyl undan Spuna frá Vestukoti. Þær hryssur sem að áttu pláss hjá Spuna voru sæddar í Sandhólaferju og síðan sendar heim á meðan beðið var eftir því hvort að þær hefðu haldið. Ég er svo heppin að eiga góða að nærri Sandhólaferju svo að ég þurfti ekki að brenna suður og sækja Karúnu fyrr en staðfest hafði verið að hún væri fylfull.  Jakob yfir sundmeistari í Ásakoti gleymdi hryssuna sem að var svo sannarlega í góðu yfirlæti nánast í garðinum. Takk kærleg Jakob og Arnheiður fyrir geymsluna á drottningunni henni bregður við að hafa ekki einkahólf þegar hún kemur heim.
Ferðina austur notuðum við til að fara með hana Gefn undir stóðhestinn Leikir frá Vakurstöðum. En Astrid okkar var svo heppin að vinna folatoll undir Leikir í happadrætti í vor og nú er bara að sjá hvort að henni verði að ósk sinni og fái hryssu næsta vor.

Í kvöld fékk ég fréttir að Klara vinkona okkar frá Lambastöðum hefði kastað jarpri hryssu undan Stíganda frá Stóra-Hofi. Það verður spennandi að sjá þessa nýju hryssu, til hamingju með gripinn Lambastaðabændur.

Nokkur hross frá okkur fluttu til nýrra heimkynna í vikunni og önnur bíða þess að fljúga til annara landa. Segið svo að það sé ekkert að gerast hér í fjöllunum.
Nánar um það síðar.

Heyskapurinn er kominn á fullt, allt komið í plast á Rauðamel, Melunum og kapparnir að rúlla í Haukatungu þessa stundina. Nú er bara að vona að það haldist þurrt í nokkra daga svo að heyskapurinn gangi fljótt og vel.
Þá er næst að huga að hestaferðinni sem að vonandi verður bæði til gagns og gamans.
Tamningar, smalatrimm, gleði og gaman en ekki síst að uppfylla afmælisgjöfina sem að við gáfum sauðburðarhjúunum okkar í fyrra. Hjúin urðu 80 ára á síðasta ári svo að það er nú alveg tímabært að koma þeim í alvöru hestaferð.
Já hestaferðir eru til margra hluta nytsamlegar.

Á næstunni er mikið framboð af kvennareiðum hér um slóðir spurning hvort það ég ekki bara rétt að ríða á milli þeirra? Reiðin í Dölunum verður á laugardaginn og svo hér þann 13 ágúst. Bara gaman að hittast og fara í smá reiðtúr þó svo að mér huggnist nú alltaf betur að hafa mannskapinn allan í bland.




  • 1