Það er gott að taka sundsprett og æfa þrek og þor við frábærar aðstæður.

Blástur minn og Gangskör léku flóðhesta hjá Jakobi og Addý í Áskoti fyrir stuttu og nutu þess í botn.

Við áttum þess kost að fara með tvö hross í sundþjálfun og völdum systkynin Blástur og Gangskör.

Bæði eru þau undan Kolskör minni en Blástur er undan Gusti frá Hóli og Gangskör undan Adam frá Ásmundarstöðum.

Síðast liðið vor sprakk hófurinn á Blæstri svo að hann hefur verið frá í tæpt ár. Sprungan er að vaxa niður og því gott að æfa sig með ,,mjúkt,, undir fæti.

 

Gangskör vandaði sig og var ekki alveg örugg um að þetta væri nú lagi en þegar hún hafði vanist þessu var hún hin sprækasta.

 

Blástur var hraðsyndur og fór fyrstur sem gerið það að verkum að Gangskör gaf í og lagði sig alla fram.

 

 Þarna eru þau systkynin að koma uppúr eftir síðustu ferðina að sinni.

 

Eins og vera ber eftir svona líkamsrækt  og sund er farið í hárblástur. Myndin hér gæti þess vegna heitið Blástur í blæstri.     Gæðingurinn Skýrr frá Skálakoti var líka í sundþjálfun á sama tíma. Þarna eru þeir Jakob sundstjóri og Skýrr að fræða okkur hvor á sinn hátt.     Sumir nota sundhettu eða sundgleraugu í sundi en Skýrr notar bara þykka flotta toppinn sinn.     Já hún er glæsileg sundlaugin í Áskoti og bíður uppá góða viðbót við hefðbundna þjálfun. Takk fyrir góðar mótttökur og þjónustu Jakob og Addý.

 

 

Ólafur Kjartansson faðir minn hefði orðið 70 ára í dag ef hann hefði lifað.

Hann drukknaði í Oddastðavatni aðeins 22 ára að aldri þann 4 júní 1966 þegar ég var 1 árs gömul. Hræðilega sorglegt slys sem reyndist mörgum erfitt.
Eins og gefur að skilja kynntist ég honum ekki en hef með góðra vina hjálp reynt að fá mynd af því hvernig hann var. Eða öllu heldur bætt við þá mynd sem ég hef búið til í mínum huga um hann.
Þessa mynd hef ég átt frá því að ég man eftir mér og reglulega skoðað hana og hugsað um það hvernig pabbi liti út í dag ef að hann hefði lifað.
Ég dáðist af myndinni og þessum manni sem var eitthvað svo framandi og fallegur í mínum huga.
Þetta var sko pabbi minn.



Þessa skemmtilegu mynd sendi hún Dunna frænka mín mér um daginn en þarna eru þeir bræður Jóhann og pabbi.  Ekki veit ég hvað þeir eru gamlir þarna en allavega komnir með bindi og mjög alvarlegir fyrir framan myndavélina. Jói til vinnstri og pabbi til hægri.

Ég hef reynt að safna eins mörgum myndum af pabba eins og ég hef getað en þær hafa vafalaust ekki verið margar til.

Sem sagt í dag var dagurinn hans pabba, ég trúi því að hann líti eftir stelpunni og hnippi í hana þegar við á. Já ég hef reyndar alltaf gert ráð fyrir því að við hittumst síðar og þá er nægur tími til að kynnast og hafa gaman.

Til hamingju með daginn þinn pabbi minn.

Reiðkennaraefni frá Hólaskóla voru með skemmtilega  sýnikennslu á Miðfossum í gær.
Við brunuðu að sjálfsögðu þangað því eitt af reiðkennaraefnunum var hún Astrid okkar.
Þarna er hún á honum Fannari frá Hallkelsstaðahlíð.

Já þetta voru þau Astrid Skou Buhl í Hallkelsstaðahlíð (Danmörku) Bjarki Þór Gunnarsson, Borgarnesi og Johanna Schulz frá Þýskalandi sem hefur starfað m.a í Borgarfirði.
Þannig að það mátti segja að þau væru öll á heimavelli.
Góð mæting var á viðburðinn en rúmlega 70 manns mættu á Miðfossa.

Sýnikennslan hófst með smá fyrirlestri um þjálfunarstigann góða en þau útskýrðu í sameiningu nokkur atriði sem þau svo sýndu okkur í reið.
Það er ekki létt verk að koma fram í fyrstu skiptin jafnvel fyrir framan vini og kunningja.
Þau fóru yfir mismunandi atriði og lögðu hvert um sig áherslu á það sem þau eru að vinna í núna. Það var gaman að sjá hvað þau voru einbeitt og mettnaðarfull.
Ólíkir hestar og knapar sem fóru létt með að leiða áhorfendur með sér í gegnum verkefnin.
Verkefnin voru öll tengd við og útskýrð útfrá myndræna fyrirlestrinum í byrjun kvöldsins.

Krakkarnir stóðu sig mjög vel og voru sjálfum sér og skólanum til sóma.




Þarna er hann Bjarki Þór með hestinn sinn en hér er hann að útskýra eitthvað mikilvægt.



Jóhanna með hestinn sinn Yl frá Blönduhlíð, hún er þarna að svara spurningum frá fróðleiksfúsum áhorfendum.



................... og Astrid að svara og útskýra, Fannar lætur sér fátt um finnast og treystir á að knapinn sé þokkalega lesinn.



Hér er nú samt eins og Fannar hafi ákveðið að taka til máls, allavega tekur hann undir það sem Astrid er að segja. Eins gott þau séu sammála........



Þarna glittir í tvo sem eru reynslunni ríkari þegar kemur að hestafræðum Guðlaugur Antonsson f.v hrossaræktarráðunautur og rektorinn Ágúst Sigurðsson.
Ágúst var duglegur að koma með spurningar láta krakkana spreyta sig.



Og það var greinilega bara gaman að takast á við það............já hestamennska á að vera skemmtileg.



Þau voru kát og skemmtileg krakkarnir og það er ekki svo lítils virði þegar miðla á þekkingu.
Það hlýtur að vera eins með nemendurna eins og hestana þeim verður að líða vel og vera óhræddir við leiðtogann ???  Spenna og hræðsla í burtu og árangurinn lætur ekki á sér standa.




Fátt er mikilvægara en gott bakland þegar verkefnin eru ögrandi, þessi komu að fylgjast með krökkunum. Bjarki hefur nú örugglega verð sáttur með það, foreldrarnir og amman.




Hér er Johanna að útskýra sveigjanleika hestsins og notar til þess pískinn. Sniðug steplan :)



Kaffihléin voru vel nýtt til þess að spjalla og taka stöðuna, hér er Finnur með orðið.



Hressar dömur frá Hvanneyri.



Ekki voru þessi minna hress en þarna eru Bjarni, Helga Björk og Dúddý sem öll komu brunandi úr Borgarnesi.



Góð kvöldstund með krökkum sem lögðu sig fram um að fræða á faglegan og skemmtilegan hátt. Hlakka til að fylgjast með þeim á næstunni, þau eiga bara bjarta framtíð fyrir sér.
Takk fyrir þið eruð flott.

Eitt það besta þorrablót sem ég hef sótt var haldið í Lindartungu um síðustu helgi, húsið var troðfullt og komust færri að en vildu.  Skemmtiatriðin voru frábær, hljómsveit Geirmundar í hörkustuði og sveitungarnir einstaklega kátir og skemmtilegir. Það var ýmislegt til gamans gert t.d voru fluttir tveir fréttaþættir frá Hálfellefu fréttum, en þær slógu í gegn í fyrra. 
Síðan var það heimsfrumsýning á stórmyndinni ,,Svo á jörðu sem á himni" og að auki söngur og glens. Leikararnir fóru á kostum og nokkur nýstyrni spruttu fram á sjónarsviðið, sú sem að lék mig var eiginlega miklu betri en ég. Spurning um að fá betri nýtingu á hana ???
Á þessari fyrstu mynd eru forsöngvararnir að þenja sig af miklum krafti, Mummi, Kristján og Magnús Snorrastaðafeðgar, Ásberg í Hraunholtum, Gísli hreppsstjóri í Mýrdal og Sigurður á Kálfalæk.
Þar sem netsambandið hefur verið með daprasta móti ætla ég að smella inn nokkurum myndum á bloggið sem gefa smá innsýn í fjörið. Myndasafnið í heil mun svo koma undir flipanum album við fyrsta tækifæri.



Sú nýbreyttni var tekin upp á þessu blóti að tilnefna Kolhrepping ársins en það gerðu þeir nefndardrengir með tompi og prakt. Á myndinni er hluti nefndarinnar mættur á sviðið til að verðlauna Kolhrepping ársins en það var enginn annar en Albert á Heggsstöðum sem hlaut þennan tiltil. Það má svo sem segja að fjárstofninn hjá Heggsstaðabóndanum hafi komið honum á þennan stall en nokkur hópur kinda hjá honum hefur borið tvisvar á framleiðsluárinu. ( Sjá nánar í Skessuhorni blaði okkar vestlendinga)
F.v Albert á Heggsstöðum og því næst nefndarmennirnir Þráinn og Arnar í Haukatungu, þá Mummi en á myndina vantar Karen á Kaldárbakka sem einnig var í nefndinni.



Mummi var veislustjóri og kryddaði sögur úr einkalífinu svona á milli atriða.
Á myndinni hér að ofan má sjá viðbrögð hans heittelskuðu við sögunum................held að Þóra sé að kafna þarna við hliðina ;)




Stundum þarf að fórna sér fyrir góðan málstað og það gerði Snorrastaðabóndinn svo sannarlega. Hann kom fram fyrir hönd fráfarandi skemmtinefndar og taldi farir þeirra ekki sléttar.................en hann var með nokkuð sléttan maga.
Já þorrablótsdressin eru misjöfn og sum kannske klæðilegri en önnur.



Geirmundur hélt uppi stanslausu stuði langt fram á nótt eða það held ég allavega svona m.v hassperurnar sem komu fram daginn eftir.
 Þessir tveir hvíldu lúin bein og gerðu tilraun til að syngja Geira í kaf sem tókst als ekki.
Skúli og Halldór bóndi á Þverá.



Við Albert tókum létta sveiflu og vorum mun hressari en þessi mynd sýnir..........
Lítur ekki vel út fyrir mig ef að dansherrarnir þurfa að vera með lokuð augun í sveiflunni.



Hrannar var hress og naut sín vel þegar dömurnar litu svona hressilega upp til hans.
Mér sýnist samt að Sæunn sé hálf smeik um að hann helli yfir hana, er greinilega við öllu búin.
Sigfríð er kaldari og líkleg til að verjast með k og k ef á reynir.



Hreppstjórinn er línudanskóngur hreppsins en hér er hann bara í settlegum valsi við Ólöfu húsfreyju á Kálfalæk.



Það var létt yfir Hraunholtafjölskyldunni en þarna sést hluti af mannskapnum.



Þessar voru hressar að vanda.............. já já íslenski þorramaturinn er góður...... sérstaklega hákarlinn og brennivínið.



Þarna eru Magnús, Ingvi Már og Álfrún sem smelltu sér til okkar á blót, bara gaman að fá þau.



Já já það má drekka Grand oftar en í réttunum............ og Grandið bara komið í handhægar neytendapakkningar. Einmitt Grand var það heillin, frú Sigfríð.



,, Já mamma mín svona verð ég nú góður ef að þú .................,,
Frú Helga í Haukatungu og Þráinn nefndarmaður með meiru ræða málin.



Við dömurnar yngri og eldri ,,pósum,,  alltaf á þorrablóti og núna var sko Geiri í baksýn............ ekki svo slæmt.



Og það voru fleiri sem voru klár í myndatöku............ Astrid og Gunnar Hjarðafellsbóndi sem oftast er nú ljúfari á svipinn.



Allir í syngjandi sveiflu........................ já það var gaman á þorrablóti í Lindartungu.

Þetta er bara smá sýnishorn af myndasafninu sem af myndavélinni kom, fleiri myndir birtast á næstunni. Þið sem voruð á svæðinu ekki örvænta það kemur mynd af þér ;)

Það var gaman í gær þegar góður hópur félaga í Félagi tamningamanna heimsótti Fákasel nýja hestamiðstöð á Ingólfshvoli. Guðmar Þór og hans fólk tók vel á móti okkur FT félögum.
Þar sem ég var ekki með myndavélina með smellti ég inn mynd sem tekin var á 40 ára afmælishátíð FT.

Boðið var uppá hestasýningu sem var afar skemmtileg og áhrifarík þar sem risaskjár leikur stórt hlutverk. Á skjánum fær maður íslenska náttúru beint í æð ef svo má að orði komast.
Þegar gengið var í salinn hljómaði notalegt sjávarhljóð rétt eins og maður væri komin á Löngufjörur á góðum degi. Á meðan sýningin fór fram birtust svo fleiri myndir með nýjum upplifunum m.a eldgos, vont veður, sumarblíða og hvað eina sem íslensk náttúra hefur uppá að bjóða.
 Djákninn á Myrká var flottur og ég er ekki frá því að ég hafi séð honum bregða fyrir hér í Hlíðinni stöku sinnum. Já já það er stundum reimt hér í dalnum.
Opnunaratriðið var frábært en þá kemur fallegt stóð sem skokkar um salinn með skemmtilega smala og frábæran hund sem svo sannarlega kann sitt fag.
Sýningin er stutt, fjölbreytt og að lang flestu leiti góð en á örugglega eftir að slípast enn betur.

Eitt er það þó sem mér finnst ekki gott en það er þetta hjálmleysi í flestum atriðunum, algjör óþarfi. Í samstarfi við svo góðan og reyndan búningahönnuð væri leikur einn að útfæra þetta á farsælan og flottan máta.
Þetta er mín skoðun og flokkast kannske undir tuð en þeir sem hafa séð og reynt hvað hjálmurinn er mikilvægur vita sitt. Mér finnst lífið yndislegt og nota hjálm.

Það er gaman að geta bent ferðamönnum á að skoða þessa sýningu sem verður í gangi fimm sinnum í viku allt árið.
Þið sem ekki hafið enn séð sýninguna drífið ykkur það er alveg þess virði.

Það er alltaf gaman að gera eitthvað skemmtilegt með FT og það var svo sannarlega gaman í gær. Takk fyrir góða kvöldstund kæru félagar starfið hjá nýrri stjórn fer vel af stað.